alamat blog

Saméméhna miboga blog dina WordPress, anu kudu dipilampah téh nyaéta daptar heula di WordPress pikeun nyieun blogna. Daptar blog ka WordPress henteu merlukeun waktu anu lila.

Asup ka loka WordPress.com terus teken kenop warna konéng anu tulisanana Get Started here. Mangka bakal asup kana lambaran nyieun blog.
Pilih ngaran alamat blogna (ngaran domain) ku ngaran anu béda reujeung batur (béda reujeung ngaran anu geus aya dina WordPress). Ngaran alamat ieu baris digunakeun pikeun ngajugjugan blog anu keur dijieun.
Lamun ngaran alamat blogna bisa dipaké, bakal kaluar tanda warna héjo anu nuduhkeun alamat anu ditulis bisa dipaké (acan aya anu maké). Ngaran alamat bisa ngagunakeun anu haratis atawa anu kudu mayar. Anu haratis mah alamatna blogna ditambahan ku kecap wordpress.com. Lamun daptar kana wordpressna ngan ukur hayang bisa nyieun pairan wungkul dina hiji blog anu aya dina WordPress, teken panumbu Sign up for just a username.
Asupkeun sandi asma kana kotak eusian Username anu baris dijadikeun ngaran identitas dina WordPress. Sandi asma ieu dipaké ogé pikeun asup kana jero WordPres pikeun ngatur blog. Sandi asma anu diasupkeun kudu ngaran anu acan dipaké ku batur.
Asupkeun sandi kecap kana kotak eusian Password. Sandi kecap anu diasupkeun kudu bener-bener susah ditebak ku batur, kecapna ngan ukur sorangan wungkul anu apalna. Sandi kecap ieu diasupkeunana dua kali. Bakal kaluar tanda kakuatan sandi kecap anu diasupkeun.
Asupkeun alamat sérélék anu nyambungkeun kana akun anu nyieun blog. Pastikeun alamat sérélék ieu bener-bener anu dipiboga ku anu nyieun blog.
Pilih basa anu baris digunakeun.
Terus teken kenop Signup.
Téang dina jero sérélék kiriman sérélék ti WordPress pikeun ngaaktipkeun blog. Buka sérélékna, terus teken link anu disadiakeun.
Bérés nyieun blog. Saterusna mah ngajajah Dasbor katut ngaropéa pidangan blog jeung nyieun eusi blogna.