Jérman, Jawara Piala Dunia pikeun Kaopat Kalina


Jadi jawara di Piala Dunia 2014 anu dilumangsungkeun di nagri Brasil, mibanda harti yén Jérman geus nyangking jawara Piala Dunia opat kali. Hal ieu bisa nyaruaan ka nagri Itali anu sarua geus nyangking kalungguhan opat kali jawara Piala Dunia. Tinggaleun hiji deui ti nagri Brasil anu geus nyangking lima kali jawara. Saméméhna, Jérman pernah nyangking jawara Piala Dunia dina taun 1954, 1974 jeung 1990.

Salian ti jadi jawara pikeun kaopat kalina, nagri Jérman jadi nagri asal padaratan Éropah anu munggaran anu bisa jadi jawara di wewengkon padaran Amérika (Kidul).

-
-
-
-
-
-
Advertisements

Lionel Messi, Pamaén Bal Pangalusna di Piala Dunia 2014


Salian ti marebutkeun ‘titél’ jawara kahiji pikeun tim atawa nagri anu ngiluan Piala Dunia, pikeun pribadi pamaén aya sababaraha panglélér séjén anu lumayan alus. Pikeun diri pamaén anu ngiluan méngbal dina Piala Dunia mibanda kasempetan pikeun jadi pamaén bal pangalusna salila kajawaraan Piala Dunia. Pamaén anu pangalusna bakal dilélér hadiah Bal Emas ti Adidas. Kabeneran anu meunangkeun ieu panglélér dina Piala Dunia 2014 téh nyaéta pamaén Argéntina, Lionel Messi.

Salian ti milih pamaén pangalusna salila dilumangsungkeunana Piala Dunia, FIFA ogé nangtukeun tilu jinis panglélér séjénna nyaéta Sapatu Emas ti Adidas pikeun pamaén anu panglobana ngagulkeun bal ka gawang lawan. Atuh dina Piala Dunia 2014 ieu sanajan timna henteu nepikeun asup ka undakan Final, tapi gul anu dicitak ku James Rodriguez (pamaén Kolombia) henteu kaudag ku pamaén séjénna. Antukna, Jamez Rodriguez dilélér ieu hadiah.

Pikeun kiper pangalusna dilélér hadiah Sarung Leungeun Emas ti Adidas anu dibikeun ka kiper Jérman, Manuel Neuer. Aya deui pikeun pamaén ngora pangalusna dilélér hadiah Pamaén Ngora ti Hyundai (Hyundai Young Player) anu dibeunangkeun ku pamaén Perancis, Paul Pogba.

Lionel Messi
Lionel Messi
James Rodriguez
James Rodriguez
Manuel Neuer
Manuel Neuer
Paul Pogba
Paul Pogba

(Gambar meunang nginjeum ti pesbukna FIFA World Cup)

Tatandang Undakan Final: Jérman Jadi Jawara Kahiji Piala Dunia 2014


Satutasna ngékéak Brasil nepikeun ka tujuh gul, tim Jérman kacida gedé wawanén pikeun nyinghareupan tatandang dina undakan final ngalawan tim Argéntina. Ku anu ngalatihna, Joachim Low, Tim Jérman diperedih supaya langsung nyerang ka daérah tukang tim Argéntina. Supaya tim Argéntina loba caricing di satengah lapang bagéan maranéhna. Cenah mah hal ieu téh dipiharep ogé ku tim Argéntina anu leuwih loba nungguan bal di wewengkon maranéhna. Nalika pamaén Jérman loba anu nyerang ka daérah tukang Argéntina, pamaén Argéntina kudu gagancangan ngarebut bal supaya bisa langsung nyerang balik ka gawang Jérman.

Tatandang undakan final antara tim Jerman ngalawan tim Argentina
Tatandang undakan final antara tim Jerman ngalawan tim Argentina

Dina menit ka-30, Argéntina sabenerna mah bisa nyitak gul ngaliwatan Gonzalo Higuain sanggeus narima operan bal ti Ezequiel Lavezzi. Hanjakal gulna henteu dianggap ku wasit kusabab Higuain kaburu opsét. Salila babak kahiji taya gul anu bisa dicitak sanajan dua tim mibanda sababaraha kali kasempetan anu alus pikeun ngagulkeun bal.

Nincak babak kadua, dua tim anu maén leuwih ati-ati dina maénna. Henteu sagawayah kitu waé ngayakeun panarajang ka lawanna séwang-séwangan. Pamaén hareupna henteu bisa nyerang kitu waé ka gawang lawanna. Nepikeun ka waktu normal béak, taya gul anu bisa dicitak ku dua tim.

Antukna mah tatandang diteruskeun kana babak tambahan. Dina babak tambahan ieu, tim Jérman bisa nyitak gul ka gawang Argéntina. Dina menit ka-113, Mario Gotze bisa nyitak gul sanggeus narima bal operan ti Andre Schurrle. 1-0 pikeun tim Jérman.

Ieu kaayaan henteu robah nepikeun ka waktu tambahan lekasan. Jérman ahirna mah bisa nyangking jawara Piala Dunia 2014 sanajan dilumangsungkeun di wewengkon Amérika Latin.

-

Tatandang Marebutkeun Jawara Katilu: Walanda Ngéléhkeun Brasil


Salaku anu boga hajat, tim Brasil gagal meunang deui dina tatandang panungtungan anu kudu dilakonan. Dina tatandang anu dijudulan marebutkeun jawara katilu, ngalawan tim Walanda, tim Brasil kuméok deui. Sanggeus saméméhna dikékéak ku Jérman kalawan gulna 7-1, ayeuna Brasil éléh deui kalawan gul anu lumayan, 3-0. Atuh, tim Brasil kudu daék ngan ukur nyangking salaku jawara kaopat dina Piala Dunia 2014 ieu.

Tatandang tim Walanda ngalawan tim Brasil dina undakan marebutkeun jawara katilu
Tatandang tim Walanda ngalawan tim Brasil dina undakan marebutkeun jawara katilu

Walanda bisa nyangking jawara katilu sanggeus ngéléhkeun Brasil tilu gul langsung. Tilu gul ieu dicitak ku Robin van Persie jeung Daley Blind dina babak kahiji ditambah gul ti Giorginio Wijnaldum dina babak kadua.

Kakara ogé maén tim Brasil geus nyieun kasalahan. Thiago Silva anu geus bisa maén deui nyieun kasalahan ku jalan ngenyang Arjen Robben anu asup ka kotak pinalti nepikeun ka labuhna. Teu antaparah deui, wasit anu mingpin ieu tatandang langsung méré hadiah pinalti ka tim Walanda. Robin va Persie anu nyapak bal pinalti ieu bisa ngasupkeun bal ka gawang Brasil.

Sanajan saterusna Brasil nyobaan nyerang ka gawang Walanda, kalahka manéhna sorangan anu kagulan. Dina menit ka-17 bagéan David Luiz anu nyieun kasalahan. Bal kiriman pamaén Walanda ka hareupeun gawang Brasil ku manéhna dipiceun. Hanjakal miceunna kalahka nojo ka pamaén Walanda, Daley Blind anu bébas di kotak pinalti. Teu miceun waktu deui, Daley Blind langsung najong bal ka jero gawang Brasil. Asup, 2-0.

Dina sésa waktu babak kahiji, dua tim teu bisa nyitak gul tambahan. Brasil gagal waé ngamangpaatkeun kasempetan anu dipibanda pikeun ngasupkeun bal ka gawang Walanda.

Nincak babak kaduana, Brasil leuwih remen deui nyerang ka gawang Walanda pikeun males gul anu dicitak Walanda. Hanjakal gul téh teu datang waé. Sababaraha urang pamaénna diganti ku anu leuwih bisa nyerang. Lumayan bisa nambahan jumlah serangan anu dijieun ku Brasil. Nepikeun ka waktu tatandang anu normal arék érép, Brasil masih kénéh tacan bisa ngagulkeun. Malahan di menit panungtungan, lain Brasil anu bisa ngagulkeun téh, tapi Walanda. Ngaliwatan Georginio Wijnaldum, Walanda bisa nambahan gul jadi tilu siki, 3-0.

Nepikeun ka waktuna érép, gul henteu robah deui.

-

Jadwal Tatandang Undakan Final Piala Dunia 2014


Kajawaraan méngbal Piala Dunia 2014 geus nincak kana undakan Final anu marebutkeun jawara Piala Dunia entragan ayeuna. Dua tim méngbal anu meunang dina undakan semifinal asup ka undakan final pikeun marebutkeun saha anu bakal jadi pinunjul kahijina. Dua tim anu éléh dina dina undakan semifinal bakal ngalumangsungkeun tatandang ogé pikeun marebutkeun saha anu baris nyangking jawara katilu.

Pamaen Jerman galumbira kusabab bisa ngelehkeun Brasil dina undakan semifinal
Pamaen Jerman galumbira kusabab bisa ngelehkeun Brasil dina undakan semifinal

Dua tim meunang di undakan semifinal, Jérman jeung Argéntina bakal silih éléhkeun dina tatandang dina undakan final. Tatandang ieu bakal dilumangsungkeun di stadion Maracana. Ngeunaan waktuna ieu tatandang téh diayakeun dina poé Senén wanci janari leutik.

Dua tim anu éléh dina undakan semifinal, Brasil jeung Walanda bakal silih éléhkeun dina tatandang marebutkeun jawara katilu. Ieu tatandang di stadion Nacional de Brasilia dina poé Ahad wanci janari leutik.

Jadwal tatandang undakan final salengkepna nyaéta:

No Waktu Tempat Patandang Wasit
1 Ahad, 13 Juli 2014 03:00 WIB Estadio Nacional de Brasilia Brasil – Walanda
2 Senen, 14 Juli 2014 03:00 WIB Stadion Maracana Argentina – Jerman

 

 
 

Tatandang Undakan Semifinal Kadua: Argéntina Ngéléhkeun Walanda


Tatandang semifinal kadua antara jagoan ti wewengkon Éropah jeung jagoan ti padaratan Amérika Kidul, anu mangrupakeun musuh bubuyutan ogé ti baheula utamana dina Piala Dunia 1978, kacida campuhna.

Tatandang tim Argentina ngalawan tim Walanda
Tatandang tim Argentina ngalawan tim Walanda

Dina babak kahiji, pamaén Argéntina bisa ngawasaan kana bal di lapang. Sanajan henteu diiluan ku Angel Di Maria anu cilaka, Alejandro Sabella ngahaja ngalobaan pamaén tengah anu dipaénkeunana. Hal ieu lumayan alus pikeun ngalawanan Walanda hususna nalika babak kahiji.

Babak kahiji dimimitian, tim Argéntina bisa ngawasa kana ieu tatandang. Sababaraha kali tim Argéntina mibanda kasempetan pikeun ngagulkeun. Ngaliwaran pamaén hareupna saperti Ezequiel Lavezzi, Gonzalo Higuain jeung Lionel Messi, tim Argéntina bisa asup ka kotak pinalti Walanda. Hanjakal éta kasempetan téh taya anu bisa dijadikeun gul kusabab kahalangan waé ku pamaén tukang Walanda anu dieusi ku Stefan De Vrij, Ron Vlaar, jeung Bruno Martins Indi. Lamun Argéntina bisa ngabahayakeun gawang Walanda, sabalikna Walanda mah susah pisan pikeun ngadeukeutan gawang Argéntina. Sababaraha kali usaha anu dipigawé ku Arjen Robben jeung Robin van Persie gagal waé. Komo deui nalik Arjen Robben mamawa bal, osok dihalangan waé ku pamaén Argéntina nepikeun ka dikepung ku tilu urang. Teu anéh dina babak kahiji, teuaya gul anu bisa dicitak ku dua tim.

Asup babak kadua, Walanda ngasupkeun Daryl Janmat pikeun ngaganti Bruno Martins Indi. Hal ieu bisa mantuan tim Walanda pikeun leuwih ngawasa bal. Ngan angger waé ari panarajang tim Walanda ngaliwatan Arjen Robben mah neunggar témbok panahan tim Argéntina. Di tim Argéntina, pikeun nambahan panarajangna, ngasupkeun pamaén hareup Sergio Aguero jeung Rodrigo Palacio. Hanjakal nepikeun ka waktu normal érép, euweuh gul anu kacitak.

Diteruskeun kana babak tambahan. Dina ieu babak kusabab duanana mikahayang nyitak gul supaya meunang, maén balna leuwih ramé deui. Teu anéh lamun kasempetan pikeun ngagulkeun téh leuwih hadé deui. Ngan kusabab kiperna anu alus bisa ngahalangan gul dicitak. Sababaraha kasempetan dibeunangkeun ku dua tim pikeun ngasupkeun bal ka gawang musuhna séwang-séwangan. Hanjakal nepikeun ka réngséna babak tambahan, taya gul anu datang.

Antukna mah dipungkas ku babak adu pinalti. Walanda najong bal ti heula. Ron Vlaar anu nyanghareupan bal. Hanjakal tajonganana bisa ditepak ku kiper Sergio Romero. Sedengkeun Argéntina bisa ngagulkeun ngaliwatan tajongan Lionel Messi. Walanda tinggaleun sagul. Tajongan saterusna, bisa asup. Ngan hanjakal tajongan katilu anu dicokot ku Wesley Sneijder gagal, sedengkeun tajongan Argéntina bisa asup. Ahirna tajongan kaopat Argéntina mungkas ieu babak kalawan gul 4-2.

 
 

Tatandang Undakan Semifinal Kahiji: Jérman Ngékéak Brasil


Tatandang ieu bisa disebutkeun kacida anéhna. Tim anu dijagokeun pikeun jadi jawara kusabab mangrupakeun salasahiji tim anu pangremenna jadi jawara ditambah ogé salaku anu boga hajat, tim Brasil bisa dikékéak ku tim Jérman. Lamun nempo kana pamaén anu maénna mah kétang henteu anéh teuing lamun tim Brasil kudu éléh ku tim Jérman. Loba pamaén Jérman anu geus kawentar boh di nagrina sorangan atawa di nagri Éropah séjénna, sedengkeun pamaén Brasil mah masih kénéh loba anu tacan dipikawanoh. Ditambah deui ku henteu bisa maénna béntang Brasil, Neymar katut békna Thiago Silva. Ngan anu jadi kahémeng téh, jumlah gulna anu kacida lobana. Asa acan pernah tim Brasil kagulan nepikeun ka tujuh siki.

Tatandang antara tim Brasil ngalawan tim Jerman
Tatandang antara tim Brasil ngalawan tim Jerman

Mangsa ngamimitian maén mah taya anu anéh da. Tim Brasil langsung bisa nyerang ka daérah gawang tim Jérman. Menit katilu, pamaén tukang Brasil bisa nyépang bal ka deukeuteun gawang tim Jérman. Hanjakal henteu ngabahayakeun. Sanajan bisa ngamimitian nyerang, kalahka tim Jérman anu pangheulana bisa ngagulkeun mah. Dina menit kasawelas Thomas Muller bisa nyitak gul ka gawang Brasil sanggeus meunang operan bal ti Toni Kroos. Dina menit ka-23, giliran Miroslav Klose anu ngagulkeun téh. Samenit ti harita, Brasil kagulan deui sanggeus Toni Kroos bisa ngagulkeun bal hasil operan ti Philipp Lahm.

Kagulan nepikeun ka tilu siki, pamaén Brasil beuki ripuh. Teu anéh lamun pamaén tim Jérman beuki laluasa waé nyerang ka daérah gawang Brasil. Dua menit ti harita, tim Jérman ngaliwatan Toni Kroos pikeun kadua kalina bisa nyitak gul ka gawang Brasil sanggeus narima bal operan Sami Khedira. Dina menit ka-30, bagéan Sami Khedira anu ngagulkeun bal sanggeus narima operan bal ti Mesut Ozil. Babak kahiji réngsé kalawan Brasil kagulan lima siki.

Nincak babak kadua, Brasil nyobaan pikeun males gul ka Jérman. Oscar nyobaan nyitak gul, hanjakal bal kirimanana henteu bisa jadi gul. Sanajan diserang terus-terusan, pamaén Jérman mah antaré waé maénna téh, henteu gurung gusuh.

Dina menit ka-69, kalahka tim Jérman anu bisa nyieun gul tambahan. Bagéan Andre Schurrle anu ngagulkeun. Dina menit ka-79, ieu pamaén ngagulkeun deui. Atuh, gulna jadi 7-0.

Nincak waktu panungtungan, pamaén Jérman hususna pamaén tukangna siga anu ngahaja méré kasempetan ka pamaén Brasil pikeun nyitak gul. Itung-itung ngupahan supaya ulah sedih teuing sigana mah sanggeus maranéhna nyitak tujuh gul ka gawang Brasil. Ahirna mah, tim Brasil bisa nyitak gul ngaliwatan Oscar anu narima operan bal ti Marcelo. 7-1 nepikeun ka waktuna réngsé henteu robah.