Piala Dunia 1954, Jérman jadi Jawara Anyar


-

Nalika FIFA ngayakeun gempungan di Luksemburg dina ping 22 Juli 1946, salian nangtukeun anu boga hajat pikeun Piala Dunia 1950, ogé ditangtukeun yén Piala Dunia 1954 baris dilumangsungkeun di nagri Swiss. Atuh nalika gempungan satutasna Piala Dunia 1950 di Rio de Janeiro dina ping 22 Juli 1950, dikuatkeun deui pikeun milih Swiss jadi anu boga hajat Piala Dunia 1954. Dipilihna nagri Swiss ieu henteu leupas tina kajadian perang dunia kadua saméméhna anu ngalindes nagri-nagri di Éropah. Anggahota FIFA mikahayang supaya tempat dilumangsungkeunana Piala Dunia téh di tempat anu nétral. Nagri anu ngalumangsungkeunana henteu biluk ka salasahiji pihak anu ngiluan perang. Sakumaha anu dipikanyaho, urut atawa tapak perang dunia kadua dina waktu harita masih kénéh nyangkaruk di unggal nagri anu ngiluan perang. Swiss mangrupakeun salasahiji nagri anu henteu biluk kana éta perang. Salian ti éta, Swiss mibanda ékonomi anu alus dirojong ku ayana tempat tatandang (stadion) anu alus pikeun ngalumangsungkeun tatandang ukuran Piala Dunia. Béh dituna, FIFA arék sakalian ngayakeun hajat miéling milangkala FIFA anu ka-50.

Piala Dunia kalima ieu dilumangsungkeun ti mimiti ping 16 Juni nepikeun ka ping 4 Juli 1954. Pikeun tempatna, aya genep dayeuh anu bakal ngayakeun ieu tatandang. Kagenep dayeuh ieu nyaéta dayeuh Basel (stadion Santo Yakobus), Bern (stadion Wankdorf), Jenewa (stadion Charmiles), Lausanne (stadion La Pontaise), Lugano (stadion Comunale de Cornaredo) jeung Zurich (stadion Hardturm).

Sakumaha Piala Dunia 1950, Piala Dunia 1954 ogé diiluan ku 16 nagri. 14 tim/nagri asalna ti undakan kualifikasi ditambah nagri Swiss salaku anu boga hajat reujeung nagri Uruguay salaku anu nyangking jawara Piala Dunia saméméhna. Undakan kualifikasi diiluan ku sababaraha nagri anu asalna ti padaratan Éropah, Amérika katut Asia.

Nagri Jérman anu dina Piala Dunia saméméhna teu meunang ilubiung, ayeuna mah meunang ngiluan. Kusabab Jérman jadi dua Jérman Kulon jeung Jérman Wétan, duanana diondang pikeun ngiluan undakan kualifikasi. Lamun Jérman Kulon saged ngiluan tur asup undakan puncer Piala Dunia, Jérman Wétan mah embungeun ngiluan. Jérman Kulon bisa asup undakan puncer sanggeus bisa ngéléhkeun Norwégia jeung Saarland. Aya anu matak hook dina ieu Piala Dunia kuasupna Turki kalawan ngéléhkeun Spanyol, reujeung asupna nagri Bélgia anu ngéléhkeun Swédia. Ti wewengkon Amérika mucunghul Brasil jeung Méksiko pikeun undakan puncer Piala Dunia. Sedengkeun ti wewengkon Asia diwakilan ku nagri Koréa Kidul. Kukituna, Éropah diwakilan ku 12 nagri, Amérika Kalér sanagri, Amérika Kidul tilu nagri ditambah Asia sanagri.

Tatandang antara tim Brasil ngalawan tim Yugoslavia
Tatandang antara tim Brasil ngalawan tim Yugoslavia

Sistem tatandang dina undakan puncer Piala Dunia 1954 ieu kacida bédana reujeung saméméhna, utamana dina undakan kahiji. Nepikeun ka ayeuna ieu sistem tara dipaké deui. Sanajan opat tim aya dina hiji grup, tapi unggal tim henteu ngalumangsungkeun ti tatandang. Unggal tim ngan ukur ngalakonan dua kali tatandang. Opat tim dina sagrup téh dibagi dua jinis: dua tim anu jadi pinunjul, jeung dua tim lain pinunjul. Tatandang munggaran nepungkeun tim anu jadi pinunjul ngalawan tim anu henteu jadi pinunjul. Tatandang kaduana, nepungkeun tim anu jadi pinunjul ngalawan anu jadi pinunjul, jeung tim anu lain pinunjul reujeung sajinisna. Tidak hasil dua kali tatandang ieu, dua tim anu mibanda niléy pangalusna di unggal grup langsung asup kana undakan kadua (parapatfinal). Saterusna mah ngagunakeun sistem gugur (éléh langsung mulang).

Pikeun anu munggaran, jumlah pamilon anu ngiluan undakan puncer Piala Dunia téh jangkep, henteu ngurangan deui. Tina sakabéh pamilon, aya hiji tim anu geus mayung, nyaéta tim Hungaria. Dina wanci harita mah ieu tim mangrupakeun rajana hususna di wewengkon Éropah Wétan. Ieu tim dieusi ku sababaraha urang pamaén anu aralus kalawan cara maén anu matak pikaresepeun nu lalajo. Saméméh Piala Dunia 1954 dilumangsungkeun, tim Hungaria bisa meunangkeun tatandang nepikeun ka 31 tatandang, kaasup nalika meunangkeun medali emas Olimpiade 1952. Dina salasahiji tatandang ngalawan tim Inggeris waé, tim Hungaria bisa nyitak loba gul: 6-3 nalika maén di Wembley jeung 7-1 nalika maén di Budapest. Sababaraha béntang anu aya dina tim Hungaria ieu diantarana waé Ferenc Puskas, Sandor Kocsis, Nandor Hidegkuti, Joszef Bozsic, jeung anu séjénna. Teu anéh lamun loba anu ngajagokeun tim Hungaria pikeun nyangking kalungguhan jawara Piala Dunia 1954 ieu.

Hal ieu bisa dibuktikeun dina tatandang di Piala Dunia 1954. Dina undakan kahiji, tim Hungaria jadi pinunjul kahiji di grup 2 sanggeus bisa ngéléhkeun tim Koréa Kidul kalawan gul 9-0 jeung Jérman Kulon kalawan gulna 8-3. Tim Jérman bisa nyusul Hungaria ka undakan saterusna sanggeus bisa ngéléhkeun Turki dina babak tambahan (play-off) 7-2 kusabab dua tim ieu mibanda niléy anu sarua. Ti grup séjénna, Brasil jadi jawara grup 1 sanggeus ngéléhkeun tim Méksiko 5-0 jeung imbang ngalawan Yugoslavia. Sagédéngeun Brasil aya Yugoslavia anu jadi jawara kaduana sanggeus saméméhna ngéléhkeun Perancis 1-0. Salaku tim anu jadi jawara Piala Dunia saméméhna, Uruguay bisa asup ogé sanggeus ngéléhkeun Cekoslowakia 2-0 jeung Skotlandia 7-0. Uruguay dituturkeun ku Austria. Anu boga hajat, Swiss bisa asup ka undakan saterusna reujeung Inggeris sanajan ngalaman éléh heula ku Inggeris.

Tatandang dina undakan semifinal antara tim Hungaria ngalawan tim Uruguay
Tatandang dina undakan semifinal antara tim Hungaria ngalawan tim Uruguay

Kadigjayaan Hungaria masih kénéh katempo. Dina tatandang di undakan kadua (parapatfinal), tim Hungaria bisa ngéléhkeun jagoa Amérika Kidul, Brasil kalawan gulna 4-2. Nilik kana kajadian dina ieu tatandang, cenah mah mangrupakeun tatandang anu pangraména. Teu ramé kumaha, wasit Arthur Ellis anu mingpin ieu tatandang nepikeun ka ngaluarkeun kartu beureum nepikeun ka tilu kalina kusabab maraénna kasar.

Tatandang parapatfinal séjénna, tim Uruguay bisa ngéléhkeun tim Inggeris 4-2. Jérman Kulon ogé bisa nyusul sanggeus ngéléhkeun Yugoslavia 2-0. Sedengkeun Austri ngéléhkeun tim anu boga hajat, Swiss 7-5.

Opat tim asup undakan semifinal: Hungaria, Jérman Kulon, Uruguay jeung Austria. Tatandang semifinal nepungkeun Hungaria reujeung Uruguay, Jérman Kulon ngalawan Austria. Hasilna, tim Hungaria bisa ngéléhkeun tim Uruguay dina tatandang anu dilumangsungkeun nepikeun ka babak tambahan. Dina tatandang waktu normal dua tim bisa nyitak dua gul, 2-2. Dina babak tambahan, tim Hungaria bisa nyitak dua gul tambahan bari henteu bisa dibales. 4-2 pikeun tim Hungaria. Sedengkeun dina tatandang saméméhna, tim Jérman bisa ngéléhkeun tim Austria kalawan gulna 6-1. Atuh, tatandang dina undakan final téh bakal nepungkeun tim Hungaria ngalawan tim Jérman.

Kapten tim Jerman sasalaman reujeung kapten tim Hungaria samemeh tatandang dina undakan final
Kapten tim Jerman sasalaman reujeung kapten tim Hungaria samemeh tatandang dina undakan final

Saméméh tatandang undakan final dilumangsungkeun loba anu ngajagokeun tim Hungaria pikeun ngéléhkeun tim Jérman kalawan gampang. Nilik kana tatandang saméméhna, dina undakan kahiji tim Jérman apanan dikékéak ku tim Hungaria kalawan gul anu bédana gedé, 8-3. Ditambah deui ku bukti yén tim Jérman mah ngan ukur dieusi ku pamaén amatir wungkul anu henteu latihan di kleub méngbal, sedengkeun tim Hungaria mah dieusi ku pamaén anu keur mangsana nyongcolang dina wanci harita. Malahan, nu ngalatih Jérman, Sepp Herberger nyebutkeun yén tim Jérman pasti bakal éléh ngalawanan Hungaria dina saméméh prungna maén. Siga anu kuméok méméh dipacok.

Gumbirana pamaen tim Jerman sanggeus bisa nyitak gul ka gawang tim Hungaria
Gumbirana pamaen tim Jerman sanggeus bisa nyitak gul ka gawang tim Hungaria

Tatandang undakan final ieu dilumangsungkeun nalika hujan. Ceuk tim Jérman mah kaayaan hujan éta téh disebutkan ‘Cuaca Fritz Walter’. Cenah, kapten tim Jérman, Fritz Walter kacida resepna lamun méngbal nalika kaayaan hujan. Manéhna bisa alus maénna lamun keur hujan.
60 rébu urang anu lalajo minuhan stadion Wankdorf pikeun nyakséni ieu tatandang. Kakara ogé maén, tim Hungaria bisa ngabuktikeun yén maranéhna mémang digjaya ngalawan tim Jérman. Dina menit kagenep, Feren Puskas bisa nyitak gul ka gawang tim Jérman disusul ku gul anu dicitak gul Zoltan Czibor dina menit kadalapan, 2-0 pikeun tim Hungaria. Kusabab bisa langsung nyitak dua gul, tim Hungaria jadi henteu ati-ati dina maénna jeung mibanda kayakinan bakal meunang. Ieu hal dimangpaatkeun ku tim Jérman pikeun ngabales. Atuh dina menit ka-10 jeung ka-18, tim Jérman bisa males nyitak gul ka gawang tim Hungaria ngaliwatan Max Morlock jeung Helmut Rahn.

Pamaen tim Hungaria
Pamaen tim Hungaria

Ti dinya tim Hungaria langsung nyerang ka gawang tim Jérman pikeun nambahan gul. Hanjakal kasempetan anu dipibanda ku tim Hungaria ngaliwatan tilu urang pamaén hareupna, Kocsis-Puskas-Hidegkuti bisa ditahan ku kiper tim Jérman, Toni Turek. Kiper Jérman bisa nahan panarajang tim Hungaria nepikeun ka bisa ngamankeun gawangna. Salian ti bisa nahan panarajang tim Hungaria salila babak kadua nepikeun ka henteu kagulan deui, tim Jérman ogé bisa nyitak gul panambah dina menit ka-84 ngaliwatan Helmut Rahn. Nepikeun ka waktu tatandang réngsé, gul 3-2 henteu robah. Tim Jérman bisa nyangking jawara Piala Dunia sanggeus bisa malikeun sawangan umumna jalma harita anu leuwih ngajagokeun tim Hungaria tibatan tim Jérman.

Tim Jerman reujeung piala Jules Rimet
Tim Jerman reujeung piala Jules Rimet
DATA NGEUNAAN PIALA DUNIA 1954
Waktu : 16 Juni – 4 Juli 1954
Jawara : Jerman Kulon
Jawara Kadua : Hungaria
Jawara Katilu : Austria
Jawara Kaopat : Uruguay
Jumlah Pamilon : 16
Jumlah Tatandang : 26 kali tatandang
Jumlah Gul : 140
Rata-rata gul : 5,4 gul unggal tatandang
Kartu Beureum :
Gol Ka Gawang Sorangan :
Jumlah Nu Lalajo : 889.500
Rata-rata nu Lalajo : 34.211 urang nu lalajo unggal tatandang
Lalajo Panglobaan :
Panglobana Gul : 11 – Sandor Kocsis (Hungaria)
Ngaran Stadion : Stadion Santo Yakobus (Basel), Stadion Wankdorf (Bern), Stadion Charmiles (Jenewa), Stadion La Pontaise (Lausanne), Stadion Comunale de Cornaredo (Lugano), Stadion Hardturm (Zurich)
tim mengbal Jerman (Kulon)
tim mengbal Jerman (Kulon)
DATA TATANDANG PIALA DUNIA 1954
NO WAKTU TEMPAT TATANDANG GUL
UNDAKAN KAHIJI
Grup 1
1 Brasil – Meksiko 5 – 0
2 Yugoslavia – Perancis 1 – 0
3 Brasil – Yugoslavia 1 – 1
4 Perancis – Meksiko 3 – 2
Grup 2
5 Jerman Kulon – Turki 4 – 1
6 Hungaria – Korea Kidul 9 – 0
7 Hungaria – Jerman Kulon 8 – 3
8 Turki – Korea Kidul 7 – 0
Grup 3
9 Uruguay – Cekoslowakia 2 – 0
10 Austria – Skotlandia 1 – 0
11 Uruguay – Skotlandia 7 – 0
12 Austria – Cekoslowakia 5 – 0
Grup 4
13 Swiss – Itali 2 – 1
14 Inggeris – Belgia 4 – 4
15 Itali – Belgia 4 – 1
16 Inggeris – Swiss 2 – 0
UNDAKAN KADUA (PARAPATFINAL)
17 Austria – Swiss 7 – 5
18 Uruguay – Inggeris 4 – 2
19 Hungaria – Brasil 4 – 2
20 Jerman Kulon – Yugoslavia 2 – 0
UNDAKAN KATILU (SEMIFINAL)
21 Hungaria – Uruguay 4 – 2
22 Jerman Kulon – Austria 6 – 1
UNDAKAN MAREBUTKEUN JAWARA KATILU
23 Austria – Uruguay 3 – 1
UNDAKAN FINAL
24 Jerman Kulon – Hungaria 3 – 2

DATA TATANDANG UNDAKAN FINAL PIALA DUNIA 1954
Tatandang : Jerman Kulon – Hungaria
Waktu : 4 Juli 1954
Tempat : Stadion Wankdorf, Bern
Wasit :
Kartu Koneng :
Kartu Beureum :
Nu Lalajo :
Nu Ngagulkeun : Max Morlock 10’, Helmut Rahn 18’, 84’ (Jerman Kulon); Ferenc Puskas 6’, Zoltan Czibor 8’ (Hungaria)
Tim Jerman Kulon : Toni Turek, Werner Kohlmeyer, Horst Eckel, Josef Posipal, Werner Liebrich, Karl Mai, Helmut Rahn, Max Morlock, Fritz Walter, Hans Schafer, Ottmar Walter; Sepp Herberger (Nu Ngalatih)
Tim Hungaria : Gyula Grosics, Jeno Buzanszky, Gyula Lorant, Mihaly Lantos, Jozsef Bozsik, Jozsef Zakarias, Zoltan Czibor, Sandor Kocsis, Ferenc Puskas, Mihaly Toth, Nandor Hidegkuti;
Advertisements

Piala Dunia 1950, Uruguay Ngajungkelkeun Pinunjul Brasil


-

Kajawaraan Piala Dunia anu mimiti dilumangsungkeun dina taun 1930 kapegat heula ku perang dunya kadua. Piala Dunia 1942 henteu bisa diayakeun kusabab waktu harita geus asup wancina perang dunya kadua di wewengkon Éropah katut sagara Pasifik. Pon kitu deui reujeung Piala Dunia 1946 henteu bisa dilumangsungkeun kusabab kakara réngsé perang. Loba nagri anu ngiluan perang reujeung nagri anu dijadikeun tempat perang, ngalaman hirup katalangsara.

Sanggeus perang réngsé dina taun 1945, FIFA seja neruskeun deui kajawaraan Piala Dunia ieu anu bakal dilumangsungkeun dina taun 1950. Hanjakal masih kénéh loba nagri anu hususna di padaratan Eropah anu tacan rinéh. Loba nagri anu masih kénéh keur ngawangun nagrina tina urut ruksak kusabab perang. Teu anéh nalika gempungan FIFA anu dilumangsungkeun di Luxemburg, ping 1 Juli 1946 euweuh nagri ti wewengkon padaratan Eropah anu hayangeun jadi nu boga hajat ieu Piala Dunia. Anu maju kalawan hayangeun jadi anu boga hajat Piala Dunia 1950 téh nagri Brasil ti wewengkon padaratan Amérika Kidul. Antukna FIFA milih Brasil jadi anu boga hajat Piala Dunia 1950.

Mapag kajawaraan Piala Dunia 1950, Brasil langsung ngawangun sababaraha tempat tatandang (stadion) anyar diantarana waé stadion pangaggréngna dina waktu harita anu dingaranan Maracana. Stadion ieu mangrupakeun stadion pangedéna sadunya anu bisa ditempatan ku nu lalajo nepikeun ka 200 rébu urang.

Pikeun kajawaraan Piala Dunia 1950 ieu, ngaranna diganti anu tadina World Cup jadi World Football Championship. Sedengkeun piala anu diparebutkeunana dingaranan Jules Rimet. Ieu ngaran dicokot pikeun ngahargaan ka anu mitemeyan mibanda kahayang ngalumangsungkeun Piala Dunia, nyaéta Jules Rimet salaku pupuhu FIFA anu nyangking ieu kalungguhan salila 25 taun.

Stadion pangagrengna waktu harita, Stadion Maracana
Stadion pangagrengna waktu harita, Stadion Maracana

Sakumaha Piala Dunia 1938, jumlah pamilon dina undakan puncer Piala Dunia 1950 téh nyaéta 16 tim. 14 tim anu asalna tina undakan kualifikasi ditambah jawara Piala Dunia saméméhna reujeung anu boga hajat. Dina undakan kualifikasi, aya 34 nagri anu ngiluan. Jawara kadua dina Piala Dunia saméméhna: Hongaria, Cekoslowakia jeung Argéntina henteu ngiluan kana ieu undakan kualifikasi.

Hasil tina undakan kualifikasi, ti wewengkon Amérika Kidul diwakilan ku Chili, Bolivia, Paraguay jeung Uruguay ditambah nu boga hajat, Brasil. Ti wewengkon Eropah diwakilan ku Yugoslavia, Swiss, Spanyol, Inggeris, Swédia, Turki, Skotlandia ditambah jawara Piala Dunia saméméhna, Itali. Ti wewengkon Amérika Kalér mucunghul dua tim: Amérika jeung Méksiko. Ditambah satim wakil ti Asia, India.

Aya genep stadion anu dipaké tatandang salila Piala Dunia 1950 ieu kaasup stadion Maracana. Stadion anu disayagakeun pikeun ngalumangsungkeun tatandangna nyaéta: Estadio Sete de Setembro di Belo Horizonte, Estadio Durival de Britto (Curitiba), Estadio dos Eucaliptos (Porto Alegre), Estadio Ilha do Retiro (Recife), Estadio do Maracana (Rio de Jeneiro) jeung Estadio do Pacaembu (Sao Paulo).

Wangunan tatandang dina undakan puncer Piala Dunia 1950 rada béda lamun dibandingkeun reujeung wangunan saméméhna (Piala Dunia 1934 jeung 1938). Lamun Piala Dunia saméméhna mah ngagunakeun sistem gugur (éléh langsung balik), dina Piala Dunia 1950 mah ngagunakeun sistem grup kalawan tatandangna satengah kompetisi (dua tim ngan ukur tatandang sakali). Dina undakan kahiji, pamilon Piala Dunia dibagi kana opat grup. Jawara kahiji unggal grup langsung asup kana undakan kadua. Opat tim ieu dihijikeun kana hiji grup pikeun nangtukeun tim mana anu jadi jawarana. Jadi pikeun nangtukeun jawarana, henteu hiji lawan hiji, tapi kudu ngumpulkeun niléy panggedéna. FIFA ngagunakeun ieu sistem supaya anu éléh henteu langsung balik ka sarakanana sakumaha Piala Dunia 1934 jeung 1938.

Pikeun milih tim anu asup ka grup mana waé, diayakeun undian anu dilumangsungkeun di dayeuh London ping 30 April 1950. Nalika diayakeun undian ieu, tilu tim/nagri teu jadi ngiluan undakan puncer Piala Dunia. Tilu tim ieu nyaéta Turki, Skotlandia jeung India. Cenah mah salasahiji pasualan anu nyababkeun India teu jadi ngiluan téh kusabab dina méngbalna kudu maraké sapatu. Ari pamaén India mah resepeun kénéh teu maké sapatu. Atuh, undakan puncer Piala Dunia 1950 téh ngan ukur diiluan ku 13 tim. Sedengkeun Skotlandia bolay ngiluan kusabab sakumaha jangjina moal ngiluan Piala Dunia lamun henteu jadi jawara di tatandang British Home Championship. Ari alesan Turki mah, cenah ampir sarua reujeung India.

Tim Inggeris mimiti ngiluan Piala Dunia
Tim Inggeris mimiti ngiluan Piala Dunia

Dina undakan kahiji, tim Inggeris anu mitemeyan ngiluan Piala Dunia, langsung gagal, kaéléhkeun ku tim Spanyol. Tim Itali salaku jawara Piala Dunia saméméhna ogé sarua henteu bisa asup kana undakan saterusna, kusabab kaéléhkeun ku Swédia. Hal ieu bisa dikaitkeun reujeung tiwasna sababaraha urang pamaén béntang Itali anu asalna ti tim Torino. Dina bulan Méi 1949, kapal ngapung Superga anu mawa pamaén Torino ngalaman cilaka anu niwaskeun pamaén Torino éta.

Sanggeus ngaliwatan tatandang dina undakan kahiji, kaluar opat tim anu jadi jawara unggal grupna, nyaéta Brasil (grup 1), Spanyol (grup 2), Swédia (grup 3) jeung Uruguay (grup 4). Opat tim dihijikeun di hiji grup dina undakan kadua. Sakumaha tatandang dina undakan kahiji, dina undakan kadua ogé unggal tim baris ngalakukan tatandang sakali ngalawan hiji tim séjénna. Atuh, unggal tim bakal ngalakonan tilu kali tatandang.

Tim Brasil anu dieusi ku pamaén béntangna waktu harita kayaning Ademir, Zizinho, Jair jeung Chico bisa meunang dua kali dina dua kali tatandang munggaran dina undakan kadua. Nalika ngalawan Swédia, Brasil bisa nyitak tujuh gul kalawan kaasupan sagul (7-1). Nalika ngalawan Spanyol ogé Brasil bisa nyitak loba gul, genep bari dibales sagul (6-1). Nilik kana ieu kaayaan, loba anu ngajagokeun tim Brasil pikeun jadi jawara Piala Dunia 1950. Pon kitu deui reujeung rahayat Brasil waktu harita, geus mibanda kayakinan yén nagrina bakal jadi jawara Piala Dunia 1950. Komo deui dina tatandang panungtungan, Brasil kudu ngalawanan tim Uruguay anu henteu dijagokeun. Ditambah deui nilik kana tatandang saméméhna, tim Uruguay ngan ukur bisa meunang kalawan béda sagul nalika ngalawan Swédia jeung ditahan ku Spanyol dua gul, 2-2. Sanajan tatandang Brasil ngalawan Uruguay ieu mangrupakeun bagéan tina tatandang di grup, tapi ibarat undakan final. Sababna mah hasil tina ieu tatandang kacida mangaruhan kana saha anu jadi jawarana.

Tina dua kali tatandang saméméhna, Brasil ngumpulkeun niléy opat (harita mah niléy nalika meunang téh dua, sedengkeun imbang niléyna hiji). Ari Uruguay ngumpulkeun niléy tilu. Niténan kana jumlah niléy anu geus dikumpulkeun, pikeun tim Brasil ku maén imbang ogé geus ngajadikeunana jawara Piala Dunia 1950, komo deui lamun meunang. Ngan lamun Brasil éléh, tangtuna Uruguay anu bakal jadi jawarana.

Dina ping 16 Juli 1950 jam tilu pasosoré kalawan ngagunakeun tempat di stadion Maracana, dayeuh Rio de Janeiro, tatandang tim Brasil ngalawan tim Uruguay dilumangsungkeun. Tatandang minangka undakan final ieu dipingpin ku wasit asal Inggeris, Goerge Reader, kalawan disaksian ku nu lalajo di stadion anu jumlah leuwih ti 203 rebu urang. Jumlah anu lalajo ieu nepikeun ka ayeuna acan aya anu nyaruaan. Lobana anu lalajo ieu bisa disebutkeun teu anéh. Rahayat Brasil geus mibanda kayakinan yén Brasil bakal nyangking kalungguhan jadi jawara Piala Dunia. Malahan maranéhna geus nyayagakeun raraméan anu lumayan rongkahna pikeun mapag jawara Piala Dunia anu anyar.

Tatandang dimimitian. Salila babak kahiji, daérah tukang tim Uruguay katut gawangna susah pisan diliwatanana ku pamaén tim Brasil. Julio Perez, Juan Schiaffino, Ghiggia jeung Obdulio Varela babarengan nahan panarajang pamaén Brasil. Babak kahiji dipungkas bari taya gul anu bisa dicitak.

Gul anu dicitak ku Schiaffino pikeun males gul Brasil
Gul anu dicitak ku Schiaffino pikeun males gul Brasil

Nincak babak kadua, tim Brasil kakara bisa nyitak gul. Dina menit ka-46, Albino Friaca Cardoso nyitak gul ka gawang Uruguay. 1-0 pikeun Brasil. Nu lalajo geus surak galumbira, Brasil bakal meunang. Kari nungguan waktu tatandang béak, Brasil jadi jawara.

Gul kadua tim Uruguay anu dicitak ku Alcides Ghiggia ka gawang tim Brasil, malikeun kaayaan. Uruguay meunang 2-1
Gul kadua tim Uruguay anu dicitak ku Alcides Ghiggia ka gawang tim Brasil, malikeun kaayaan. Uruguay meunang 2-1

Tapi tim Uruguay bisa males ieu gul dina menit ka-66 ngaliwatan Juan Alberto Schiaffino. Saterusna, tim Brasil bisa ngawasa jalanna tatandang. Nu lalajo henteu hariwang sanajan tim anu dirojongna ditahan ku tim Uruguay ogé. Saterusna, dua tim anu tatandang angger silih serang nepikeun ka nincak menit ka-79, Alcides Edgardo Ghiggia mawa bal mapay sisi kénca daérah tukang Brasil, ditungtungan ku ngasupkeun bal ka gawang Brasil. Uruguay malikeun gul jadi 2-1. Nepikeun ka waktu tatandangna érép, gul henteu robah. Nu lalajo anu tadina gumbira bakal mapag tim Brasil jadi jawara, henteu jadi. Malikan jadi sedih kingkin, ceurik balilihan. Ieu kajadian nepikeun ka ayeuna nelah Maracanazo (Cilaka di Macarana).

Kapten Uruguay narima Piala Jules Rimet
Kapten Uruguay narima Piala Jules Rimet
DATA NGEUNAAN PIALA DUNIA 1950
Waktu : 24 Juni – 16 Juli 1950
Jawara : Uruguay
Jawara Kadua : Brasil
Jawara Katilu : Swedia
Jawara Kaopat : Spanyol
Jumlah Pamilon : 13
Jumlah Tatandang : 22
Jumlah Gul : 88
Rata-rata gul : 4 gul
Kartu Beureum :
Gol Ka Gawang Sorangan :
Jumlah Nu Lalajo : 1.036.000 urang
Rata-rata nu Lalajo : 47.091 urang unggal tatandang
Lalajo Panglobaan : 203.000 urang (tatandang final Brasil ngalawan Uruguay)
Panglobana Gul : 9 – Ademir Marques de Menesis (Brasil)
Ngaran Stadion : Estadio Sete de Setembro di Belo Horizonte, Estadio Durival de Britto (Curitiba), Estadio dos Eucaliptos (Porto Alegre), Estadio Ilha do Retiro (Recife), Estadio do Maracana (Rio de Jeneiro) jeung Estadio do Pacaembu (Sao Paulo)
Tim Uruguay anu nyangking kalungguhan jawara Piala Dunia 1950
Tim Uruguay anu nyangking kalungguhan jawara Piala Dunia 1950
DATA TATANDANG PIALA DUNIA 1950
NO WAKTU TEMPAT TATANDANG GUL
UNDAKAN KAHIJI
Grup 1
1 24 Juni 1950 Brasil – Meksiko 4 – 0
2 25 Juni 1950 Yugoslavia – Swiss 3 – 0
3 28 Juni 1950 Brasil – Swiss 2 – 2
4 28 Juni 1950 Yugoslavia – Meksiko 4 – 1
5 1 Juli 1950 Brasil – Yugoslavia 2 – 0
6 2 Juli 1950 Swiss – Meksiko 2 – 1
Grup 2
7 25 Juni 1950 Inggeris – Chili 2 – 0
8 25 Juni 1950 Spanyol – Amerika 3 – 1
9 29 Juni 1950 Spanyol – Chili 2 – 0
10 29 Juni 1950 Amerika – Inggeris 1 – 0
11 2 Juli 1950 Spanyol – Inggeris 1 – 0
12 2 Juli 1950 Chili – Amerika 5 – 2
Grup 3
13 25 Juni 1950 Swedia – Itali 3 – 2
14 29 Juni 1950 Swedia – Paraguay 2 – 2
15 2 Juli 1950 Itali – Paraguay 2 – 0
Grup 4
16 2 Juli 1950 Uruguay – Bolivia 8 – 0
UNDAKAN KADUA (FINAL)
17 9 Juli 1950 Brasil – Swedia 7 – 1
18 9 Juli 1950 Uruguay – Spanyol 2 – 2
19 13 Juli 1950 Brasil – Spanyol 6 – 1
20 13 Juli 1950 Uruguay – Swedia 3 – 2
21 16 Juli 1950 Uruguay – Brasil 2 – 1
22 16 Juli 1950 Swedia – Spanyol 3 – 1

DATA TATANDANG UNDAKAN FINAL PIALA DUNIA 1950
Tatandang : Brasil – Uruguay
Waktu : 16 Juli 1950 jam 3 pasosore
Tempat : Estadio Maracana, Rio de Jenerio
Wasit : George Reader (Inggris)
Kartu Koneng :
Kartu Beureum :
Nu Lalajo : 203.000 urang
Nu Ngagulkeun : Albino Friaca Cardoso 46′ (Brasil); Juan Alberto Schiaffino 66′, Alcides Edgardo Ghiggia 79′
Tim Brasil : Barbosa, Augusto, Juvenak, Bauer, Danilo, Bigode, Friaca, Zizinho, Ademir, Jair, Cico; Flavio Costa (Nu Ngalatih)
Tim Uruguay : Roque Maspoli, Matias Gonzales, Eusebio Tajero, Schuber Gambetta, Obdulio Varela, Victor Andrade, Alcides Ghiggia, Julio Perez, Omar Miguez, Juan Schiaffino, Ruben Moral; Juan Lopez (Nu Ngalatih)

Piala Dunia 1938, Itali jadi Jawara Kadua Kalina


-

Manjing ahir taun 1930-an, kaayaan dunya hususna di wewengkon padaratan Éropah keur harénghéng. Kaayaan pulitik di ieu wewengkon keur meumeujeuhna panas. Hal ieu disababkeun nagri Jérman ngaleyek (nyerang) sababaraha nagri tatanggana ditambah ku perang sodara di nagri Spanyol. Sanajan kaayaanana keur harénghéng, henteu ngaruntagkeun kahayang FIFA pikeun ngalumangsungkeun Piala Dunia entragan katiluna, taun 1938. Dina gempungan (kongres) FIFA anu dilumangsungkeun di dayeuh Berlin dina ping 15 Agustus 2936, FIFA milih nagri mana anu baris jadi nu boga hajat Piala Dunia 1938. Aya tilu nagri anu daptar jadi calon nu boga hajat. Tilu nagara éta nyaéta Jérman, Perancis jeung Argéntina. Hasil gempungan, nangtungkeun Perancis jadi nagri anu bakal ngalumangsungkeun Piala Dunia 1938.

Hasil ieu kacida nguciwakeun pikeun sababaraha nagri anu aya di wewengkon Amérika Kidul, hususna nagri Argéntina anu ngahaja daptar jadi anu boga hajat. Pikeun urang Amérika Kidul mah Piala Dunia 1938 téh kuduna dilumangsungkeunana di wewengkon Amérika. Gantian sanggeus saméméhna diayakeun di wewengkon Éropah. Kusabab kitu, sababaraha nagri ti Amérika Kidul anu tadina arék ngiluan kana ieu Piala Dunia, henteu jadi ngiluan. Amérika Kidul ngan ukur diwakilan ku nagri Brasil. Nagri Argéntina reujeung Uruguay, teu jadi ngiluan.

Dipilihna Perancis jadi anu boga hajat ku FIFA téh lain taya sabab. FIFA mibanda tinimbangan pakait reujeung tempat lumangsungna Piala Dunia. Lamun dilaksanakeun di wewengkon Amérika (Kidul) jauh teuing tempatna, ditambah deui leuwih loba nagri anu jadi anggahota FIFA anu cicingna di wewengkon Éropah.

Sakumaha Piala Dunia saméméhna, dina nyanghareupan Piala Dunia entragan 1938 ogé diayakeun heula undakan kualifikasi. Pikeun nangtukeun pamilon Piala Dunia 1938, FIFA ngayakeun undakan kualifikasi anu diiluan ku 37 tim/nagri. Aya dua tim anu langsung asup ka undakan puncer Piala Dunia 1938, nyaéta anu boga hajat (Perancis) katut jawara Piala Dunia saméméhna (Itali). Kusabab jumlah pamilon undkaan puncer Piala Dunia ngan ukur 16 tim, anu bisa asup ngaliwatan undakan kualifikasi ngan ukur 14 tim/nagri. Dina undakan kualifikasi ieu salian Uruguay jeung Argéntina anu mundur, nagri Spanyol ogé mundur kusabab di nagrina aya pacogrégan (perang sodara).

Hasil tina undakan kualifikasi ieu mucunghul 14 tim anu asup kana undakan puncer Piala Dunia 1938. Ti wewengkon Éropah aya 11 tim/nagri, ditambah satim ti Amérika Kidul, satim ti lautan Karibia reujeung satim ti wewengkon Asia. Ti wewengkon Asia pikeun anu munggaran tim Indo Walanda (ayeuna mah nagri Indonésia) bisa asup ka undakan puncer Piala Dunia. Indo Walanda asup ka Piala Dunia kusabab Jepang anu jadi lawanna teu jadi ngiluan undakan kualifikasi. Ti wewengkon Karibia diwakilan ku nagri Kuba. ti Amérika Kidul diwakilan ku nagri Brasil. Ti wewengkon Éropah diwakilan ku 13 nagri kaasup jawara saméméhna reujeung anu boga hajat. Ti 13 tim ieu, dina prungna undakan puncer Piala Dunia anu jadi ngiluan téh ngan ukur 12 tim. Sababna mah nagri Austria bedo ngiluan Piala Dunia kusabab nagrina runtag sanggeus dicaplok ku nagri Jérman. FIFA henteu ngaganti tempat Austria ku Latvia anu dina undakan kualifikasi diéléhkeun ku Austria. Antukna, anu ngiluan kana undakan puncer Piala Dunia 1938 ngan ukur 15 tim/nagri.

Tim Jérman salaku anu nyaplok Austria, nyokotan ogé sababaraha urang pamaén bal Austria anu aralusna pikeun ngiluan ka tim méngbal Jérman. Pamaén Austria kayaning Wilhelm Hahnemann (ti kleub  Admira Wien), Hans Mock, Josef Stroh, Leopold Neumer (Austria Wien), Hans Pesser, Rudolf Raftl, Stefan Skoumal, Franz Wagner (Rapid Wien), jeung Willibald Schmaus (First Vienna) diilukeun ka tim Jérman. Ieu lalampahan dilakukeun pikeun mapakan kapinunjulan tim Itali.

Nincak undakan puncer Piala Dunia 1938 anu dilumansungkeun mimiti ping 4 Juni nepikeun ka ping 19 Juni 1938. Tatandangna dilumangsungkeun di sapuluh stadion anu sumebar di salapan dayeuh anu aya di nagri Perancis. Stadion anu dipaké tatandang ieu nyaéta: Parc Des Princes (di dayeuh Paris), Stade de la Meinau (Strasbourg), Stade Olympique de Colombes (Paris), Stade de la Cavee Verte (Le Havre), Stade Chapou (Toulouse), Stade Velodrome Municipal (Reims), Velodrome (Marseille), Stade Victor Boucquey (Lille), Stade du Fort Carre (Antibes) jeung Parc Lescure (Bordeaux).

Cara tatandang dina undakan puncer Piala Dunia ieu sarua reujeung Piala Dunia 1934. Tatandangna mimiti undakan kahiji ngagunakeun format sistem gugur (anu éléh langsung balik). 16 tim ngalumangsungkeun tatandang dina undakan kahiji pikeun milih dalapan tim anu asup kana undakan kadua (parapatfinal). Unggal tatandang anu dilumangsungkeun, sakumaha biasa salila 90 menit. Lamun salila waktu normal éta angger gulna sarua, diteruskeun kana babak tambahan salila 30 menit. Lamun dina babak tambahan ieu angger waé gulna sarua kénéh, tatandangna bakal dibalikan deui nepikeun ka aya anu meunang.

Kusabab nagri Austria henteu jadi ngiluan, lawan dina undakan kahijina nyaéta Swédia meunang bari henteu kudu tatandang heula. Swédia langsung asup ka undakan parapatfinal. Tim Jérman anu ngahaja ngagunakeun pamaén ti Austria, teu bisa asup kana undakan kadua sanggeus diéléhkeun ku tim Swiss ngaliwatan tatandang ulang. Anu boga hajat reujeung jawara Piala Dunia saméméhna, bisa ngéléhkeun lawanna séwang-séwangan (Perancis ngéléhkeun Bélgia 3-1 langsung, Itali ngéléhkeun Norwégia 2-1 ngaliwatan babak tambahan). Indo Walanda salaku wakil Asia diéléhkeun ku tim Hungaria kalawan gul anu loba, 6-0. Cékoslowakia ogé meunang dina undakan kahiji ngalawan tim Walanda 3-0.

Tatandang Brasil ngalawan Cekoslowakia dina undakan Parapatfinal
Tatandang Brasil ngalawan Cekoslowakia dina undakan Parapatfinal

Nincak undakan kadua (parapatfinal), tim anu boga hajat kudu ngalayanan tim jawara saméméhna. Hasilna, Itali meunang ngalawan Perancis, 3-1. Swédia meunang ogé ngalawan Kuba kalawan gulna 8-0. Brasil ngéléhkeun Cékoslowakia sanggeus tanding ulang, Hungaria ngéléhkeun Swiss.

Undakan semifinal dieusi ku opat tim: Itali, Hungaria, Swédia jeung Brasil. Dina ieu undakan, Hungaria kudu ngalawanan Swédia, sedengkeun Itali ngalawan Brasil. Hasilna, Hungaria bisa ngéléhkeun Swédia kalawan gulna 5-1. Jawara Piala Dunia saméméhna bisa ngéléhkeun Brasil kalawan gulna 2-1. Dina ieu tatandang, tim Brasil ngahaja henteu ngasupkeun pamaén pangalusna, Leonidas. Nu ngalatih Brasil ngahaja sigana mah henteu ngilukeun Leonidas kana ieu tatandang, da mibanda kayakinan bakal bisa ngéléhkeun Itali.

Undakan final ngadukeun Itali reujeung Hungaria. Sedengkeun Brasil kudu ngalawan Swédia pikeun marebutkeun jawara katiluna. Brasil ahirna bisa nyangking jawara katilu sanggeus bisa ngéléhkeun Swédia 4-2.

Tatandang undakan final dilumangsungkeun di Stade Olympique de Colombes, Paris. Kusabab anu maénna lain nagri Perancis anu jadi boga hajat, anu lalajo téh henteu minuhan ieu stadion. Kakara sabaraha menit ieu tatandang dimimitian, tim Itali geus bisa nyitak gul. Dina menit kagenep, Gino Colaussi bisa nyitak gul pikeun Itali. Hanjakal ieu gul téh bisa dibales ku Hungaria dua menit satutasna ngaliwatan al Titkos. Saterusna, Silvio Piola bisa nambahan gul Itali dina menit ka-16. Dina menit ka-35, Colaussi bisa nyitak gul kaduana. Babak kahiji dipungkas kalawan gul 3-1 pikeun Itali.

Kapten Itali, Giuseppe Meazza sasalaman jeung kapten Hungaria Gyorgy Sarosi saacan tatandang final
Kapten Itali, Giuseppe Meazza sasalaman jeung kapten Hungaria Gyorgy Sarosi saacan tatandang final

Babak kadua dibuka. Itali mintonkeun strategi defensif (nungguan jeung nahan panarajang) kusabab geus meunang kalawan béda dua gul dina babak kahiji. Sanajan susah ditembusna, panahan panarajang tim Itali ieu ahirna mah katembus ogé. Dina menit ka-70, tim Hungaria bisa nyitak gul ngaliwatan Gyorgi Sarosi. Kagulan ku Hungaria, Itali bisa nambahan deui gul ngaliwatan Silvio Piola dina menit ka-82 pikeun ngajaga béda gul tetep dua. Nepikeun ka waktu normal érép, taya deui gul anu dicitak. Itali meunang 4-2. Itali bisa nyangking jawara Piala Dunia pikeun kadua kalina.

Tatandang undakan final Piala Dunia 1938
Tatandang undakan final Piala Dunia 1938

Hanjakal Piala Dunia 1938, sakumaha Piala Dunia 1934, ninggalkeun carita anu henteu leupas tina urusan pulitik. Pamingpin Itali waktu harita, Benito Mussolini ngancam pamaén Itali supaya kudu jadi jawara deui. Nalika tatandang parapatfinal ngalawan Perancis, Itali bisa meunang sanggeus ngémbarkeun perkara béda ras. Dina tatandang di undakan final ogé, cenah mah pamaén bal Hungaria ngarasa karunya ka pamaén Itali, sieun dirogahala. Lamun Hungaria meunang ngalawan Itali, pamaén Itali bakal ditelasan patina. Atuh, tim Hungaria milih ngéléhan manéh tibatan kudu ngorbankeun pamaén Itali.

Tim Itali ngarumpul sanggeus jadi jawara Piala Dunia pikeun kadua kalina
Tim Itali ngarumpul sanggeus jadi jawara Piala Dunia pikeun kadua kalina
DATA NGEUNAAN PIALA DUNIA 1938
Waktu : 4 – 19 Juni 1938
Jawara : Itali
Jawara Kadua : Hungaria
Jawara Katilu : Brasil
Jawara Kaopat : Swedia
Jumlah Pamilon : 15 tim
Jumlah Tatandang : 18
Jumlah Gul : 84
Rata-rata gul : 4,67 unggal tatandang
Kartu Beureum : 4
Gol Ka Gawang Sorangan : 1
Jumlah Nu Lalajo : 483.000 urang
Rata-rata nu Lalajo : 26.833 urang
Lalajo Panglobaan : 59.000 (Itali ngalawan Prancis dina undakan parapatfinal)
Panglobana Gul : 7 – Leonidas (Brasil); 6 – Gyula Zsengeller (Hungaria); 5 – Gyorgy Sarosi (Hungaria), Silvio Piola (Itali)
Ngaran Stadion : Parc Des Princes (di dayeuh Paris), Stade de la Meinau (Strasbourg), Stade Olympique de Colombes (Paris), Stade de la Cavee Verte (Le Havre), Stade Chapou (Toulouse), Stade Velodrome Municipal (Reims), Velodrome (Marseille), Stade Victor Boucquey (Lille), Stade du Fort Carre (Antibes), Parc Lescure (Bordeaux)

DATA TATANDANG PIALA DUNIA 1938
NO WAKTU TEMPAT TATANDANG GUL
UNDAKAN KAHIJI
1 5 Juni 1938 Parc Des Princes, Paris Swiss – Jerman 1 – 1 (babak tambahan)
2 5 Juni 1938 Stade de la Meinau, Strasbourg Brasil – Polandia 6 – 5 (babak tambahan)
3 5 Juni 1938 Stade Olympique de Colombes, Paris Perancis – Belgia 3 – 1
4 5 Juni 1938 Stade de la Cavee Verte, Le Havre Cekoslowakia – Walanda 3 – 0 (babak tambahan)
5 5 Juni 1938 Stade Chapou, Toulouse Kuba – Rumania 3 – 3 (babak tambahan)
6 5 Juni 1938 Stade Velodrome Municipal, Reims Hungaria – Indo Walanda 6 – 0
7 5 Juni 1938 Stade Gerland, Lyon Austria – Swedia w.o.
8 5 Juni 1938 Velodrome, Marseille Itali – Norwegia 2 – 1 (babak tambahan)
Tatandang Tambahan (Tatandang balikan deui)
9 9 Juni 1938 Parc Des Princes, Paris Swiss – Jerman 4 – 2
10 9 Juni 1938 Stade Chapou, Toulouse Kuba – Rumania 2 – 1
UNDAKAN KADUA (PARAPATFINAL)
11 12 Juni 1938 Stade Victor Boucquey, Lille Hungaria – Swiss 2 – 0
12 12 Juni 1938 Stade Parc Lescure, Bordeaux Brasil – Cekoslowakia 1 – 1 (babak tambahan)
13 12 Juni 1938 Stade Olympique de Colombes, Paris Itali – Perancis 3 – 1
14 12 Juni 1938 Stade du Fort Carre, Antibes Swedia – Kuba 8- 0
Tatandang Tambahan (Tatandang balikan deui)
15 14 Juni 1938 Stade Parc Lescure, Bordeaux Brasil – Cekoslowakia 2 – 1
UNDAKAN KATILU (SEMIFINAL)
16 16 Juni 1938 Parc Des Princes, Paris Hungaria – Swedia 5 – 1
17 16 Juni 1938 Velodrome, Marseille Itali – Brasil 2 – 1
UNDAKAN MAREBUTKEUN JAWARA KATILU
18 19 Juni 1938 Parc Lescure, Bordeaux Brasil – Swedia 4 – 2
UNDAKAN FINAL
19 19 Juni 1938 Stade Olympique de Colombes, Paris Itali – Hungaria 4 – 2

DATA TATANDANG UNDAKAN FINAL PIALA DUNIA 1934
Tatandang : Itali – Hungari 4 – 2
Waktu : 19 Juni 1938
Tempat : Stade Olympique de Colombes, Paris
Wasit : Georges Capdeville (Perancis)
Kartu Koneng :
Kartu Beureum :
Nu Lalajo : 55.000
Nu Ngagulkeun : Gino Colaussi 6′, 35′, Silvio Piola 16′, 82′ (Itali); Gal Titkos 8′, Gyorgi Sarosi 70′ (Hungaria)
Tim Itali : Vittorio Pozzo (nu ngalatih); Olivieri, Foni, Rava, Serantoni, Andreolo, Locatelli, Biavati, Meazza, Piola, Ferrari, Colaussi
Tim Cekoslowakia : Alfred Schaffer (nu ngalatih); Szabo, Polgar, Biro, Szalay, Szucs, Lazar, Sas, Zsengeller, Sarosi, Vincze, Titkos

Piala Dunia 1934, Piala Dunia Pindah ka Éropah


 

Sanggeus réngsé ngayakeun Piala Dunia anu munggaran di nagri Uruguay dina taun 1930, ieu kajawaraan téh diteruskeun deui ku FIFA ku jalan ngayakeun Piala Dunia anu kadua dina taun 1934. Pikeun entragan kadua ieu, aya dua nagara anu marebutkeun hancengan pikeun jadi anu boga hajatna. Duanana mangrupakeun nagri ti wewengkon Éropah, nyaéta Itali reujeung Swédia. Sanggeus gagal jadi anu boga hajat Piala Dunia anu munggaran, dua nagri ieu papada hayang pisan ngalumangsungkeun Piala Dunia anu kadua. Pikeun nangtukeunana, FIFA kudu ngalumangsungkeun gempungan nepikeun ka dalapan kalina. Anu tungtungna mah Komite Eksekutif FIFA dina gempungan panungtungan anu dilumangsungkeun di Stockholm ping 9 Oktober 1932 nunjuk nagri Itali jadi nu boga hajat bari henteu maké surat sora.

Mikeun hancengan ka nagri Itali ieu sigana mah henteu leupas tina pangaruh pamingpin Itali waktu harita, Benito Mussolini anu kacida hayangna ngalumangsungkeun Piala Dunia di nagri anu dipingpinna. Inyana nepikeun ka nyawiskeun waragad anu gedena 3,5 yuta Lira pikeun ngarojong dilumangsungkeunana Piala Dunia di Itali. Sanggeus ditunjuk jadi anu boga hajatna, Itali nyayagakeun dalapan tempat pikeun Piala Dunia 1934 ieu. Dayeuh-dayeuh kayaning Turin, Milan, Genoa, Bologna, FLorence, Roma, Napoli jeung Trieste disayagakeun pikeun ngalumangsungkeun tatandang Piala Dunia. Utamana stadion-stadion di éta dayeuh disayagakeun pikeun lumangsungna tatandang pamilon Piala Dunia: Stadion San Siro (Milan), Luigi Ferraris (Genoa), Giovanni Berta (Firenze), Littoriale (Bologna), Giorgio Ascarelli (Napoli), Nazionale PNF (Roma), Littorio (Trieste), jeung Benito Mussolini (Turin). Stadion San Siro di dayeuh Milan mangrupakeun stadion pangedéna anu disayagakeun kalawan bisa dieusi ku 55 rébu urang jalma.

Ngeunaan pamilonna, FIFA geus nangtukeun jumlah tim anu bisa ngiluan kana ieu Piala Dunia nyaeta ngan 16 tim/nagri. Sedengkeun jumlah nagri anu daptar hayangeun ngiluan Piala Dunia 1934 aya 32 tim. Atuh ku kituna, dina nangtukeun pamilon ieu henteu saperti Piala Dunia saméméhna ku ngaliwatan ondangan. Dina Piala Dunia 1934 mah mimiti diayakeun undakan kualifikasi pikeun nangtukeun nagri mana waé anu bisa asup ka undakan puncer Piala Dunia. Ieu undakan téh angger dilumangsungkeun nepikeun ka ayeuna. Itali salaku anu boga hajat ogé kudu ngiluan undakan kualifikasi ieu.

Dina undakan kualifikasi salian diiluan ku nagri ti wewengkon Éropah jeung Amérika, ogé diiluan ku sababaraha nagri ti Afrika jeung Asia kayaning Mesir, Paléstina (British Mandate Palestine) jeung Turki anu dihijikeun ka Grup 12 zona Asia & Afrika. Mesir jadi wawakil ti ieu grup sanggeus ngéléhkeun nagri Paléstina kalawan Turki anu teu jadi ngiluan kusabab acan siap. Ahirna, Piala Dunia 1934 ieu diiluan ku 12 tim ti wewengkon Éropah, dua tim Amérika Kidul, satim ti Amérika Kalér jeung satim ti Afrika.

Husus tim ti Amérika Kidul, salaku jawara Piala Dunia 1930 tim Uruguay henteu ilubiuang kana ieu Piala Dunia. Anu ngiluan téh ngan ukur Brasil jeung Argéntina wungkul anu bisa langsung asup kusabab lalawanana Chili jeung Peru teu jadi ngiluan. Cenah mah, Uruguay téh pundung kusabab dina Piala Dunia 1930 loba tim ti wewengkon Éropah anu henteu ngiluan kana Piala Dunia 1930. Ti wewengkon Amérika Kalér diluuhan ku tim Amérika. Sedengkeun 12 tim ti wewengkon Éropah nyaéta Itali, Spanyol, Austria, Perancis, Hongaria, Swiss, Walanda, Cékoslowakia, Rumania, Swédia, Jérman, Bélgia.

Undakan puncer Piala Dunia 1934 dilumangsungkeun dina ping 27 Méi nepikeun ka ping 10 Juni 1934. Dina undakan kahijina, béda reujeung tatandang di Piala Dunia 1930 anu ngagunakeun format grup. Dina Piala Dunia 1934 mah ngagunakeun format sistem gugur. 16 tim ngalumangsungkeun tatandang hiji lawan hiji, tim anu dipunjulkeun ngalawan tim anu henteu dipunjulkeun. Dalapan tim anu dipunjulkeun nyaéta Argéntina, Brasil, Jérman, Italia, Walanda, Austria, Cékoslowakia jeung Hungaria ngalawanan tim anu henteu dipunjulkeun nyaéta Spanyol, Prancis, Bélgia, Swiss, Rumania, Amérika, Mesir jeung Swédia. Sanajan jadi pinunjul, tim Argéntina, Brasil, jeung Walanda gagal asup ka undakan saterusna (parapatfinal). Lima tim séjénna mah bisa asup kana éta babak saterusna.

Cenah mah dina Piala Dunia 1934 itu, hasilna kacida dipangaruhan ku urusan pulitik. Tim méngbal Itali salaku anu boga hajat kudu jadi jawarana ku pamingpin Itali harita. Malahan nepikeun ka diancam sagala supaya kudu jadi jawarana. Lamun henteu, cenah bakal diparaéhan. Salian ti éta, aya sababaraha kawijakan ti wasit anu mingpin tatandang tim Itali anu kacida nguntungkeun tim Itali. Nalika tatandang dina undakan semifinal jeung final loba kawijakan wasit anu nguntungkeun Itali.

Tatandang undakan parapat final, tim Jérman bisa ngéléhkeun tim Swédia 2-1. Sedengkeun tim Cékoslowakia sanajan kudu susah bisa ngéléhkeun tim Swiss 3-2. Tim Austria ogé bisa ngéléhkeun Hungaria 2-1. Hiji deui tatandang anu ngadukeun tim Itali ngalawan Spanyol ditungtungan ku tanding deui (tanding ulang). Sanggeus meunangkeun hasil imbang 1-1, Itali kudu tanding deui ngalawan Spanyol. Hasilna, Itali bisa meunang 1-0.

Tatandang antara tim Itali ngalawan tim Austria di undakan semifinal
Tatandang antara tim Itali ngalawan tim Austria di undakan semifinal

Nincak undakan semifinal, Itali kudu ngalawan Austria sedengkeun Cékoslowakia ngalawanan Jérman. Hasilna, Itali bisa ngéléhkeun Austria 1-0, sedengkeun Cékoslowakian bisa ngéléhkeun Jérman 3-1.

Kapten tim Itali keur sasalaman reujeung kapten tim Cekoslowakia samemeh tatandang undakan final
Kapten tim Itali keur sasalaman reujeung kapten tim Cekoslowakia samemeh tatandang undakan final

Undakan final matandangkeun tim Itali reujeung Cékoslowakia. Tatandang geus méakeun waktu sajam, tapi taya gul anu bisa dicitak. Itali kagét nalika tim Cékoslowakia bisa ngagulkeun ti heula. Dina menit ka-71, Antoni Puc bisa nyitak gul ka gawang Itali. Untung selang 10 menit ti harita, Itali bisa males gul Cékoslowakia ngaliwatan Raimundo Orsi. Gul 1-1 teu robah sanajan waktu 90 menit. Nincak babak tambahan, Itali untung bisa ngagulkeun deui ngaliwatan Angelo Schiavio.

Tatandang anu campuh di undakan final antara tim Itali ngalawan tim Cekoslowakia
Tatandang anu campuh di undakan final antara tim Itali ngalawan tim Cekoslowakia

Kalawan dieusi ku sababaraha urang pamaén luar Itali anu asalna ti padaratan Amérika Kidul kayaning Luis Monti, Raimundo Orsi, Enrico Guaita, jeung Anfilogino Guarisi, tim Itali jadi jawara Piala Dunia 1934.

Gumbirana tim Itali sanggeus jadi jawara di Piala Dunia 1934
Gumbirana tim Itali sanggeus jadi jawara di Piala Dunia 1934
DATA NGEUNAAN PIALA DUNIA 1934
Waktu : 27 Méi 1934 – 10 Juni 1934
Jawara : Itali
Jawara Kadua : Cekoslowakia
Jawara Katilu : Jerman
Jawara Kaopat : Austria
Jumlah Pamilon : 16 tim
Jumlah Gul : 70
Rata-rata gul : 4,12 unggal tatandang
Kartu Beureum : 1
Gol Ka Gawang Sorangan :
Jumlah Nu Lalajo : 395.000 urang
Rata-rata nu Lalajo : 23.235 urang
Lalajo Panglobaan : 55.000 urang (Itali – Cekoslowakia di final)
Panglobana Gul : 4 – Oldrich Nejedly (Cekoslowakia); 4 – Angelo Schiavio (Itali), Edmund Conen (Jerman); 3 – Raimundo Orsi (Itali), Leoporld Keilholz (Swiss)
Ngaran Stadion : Luigi Ferraris, Benito Mussolini, Giovanni Berta, San Siro, Littorio, Stadio Nazionale del P.N.F., Giorgio Ascarelli, Littorale

DATA TATANDANG PIALA DUNIA 1934

NO WAKTU TEMPAT TATANDANG GUL
UNDAKAN KAHIJI
1 27 Mei 1934 Luigi Ferraris Spanyol – Brasil 3 – 1
2 27 Mei 1934 Benito Mussolini Austria – Perancis 3 – 2
3 27 Mei 1934 Giovanni Berta Jerman – Belgia 5 – 2
4 27 Mei 1934 San Siro Swiss – Belanda 3 – 2
5 27 Mei 1934 Littorio Cekoslowakia – Rumania 2 – 1
6 27 Mei 1934 Stadio Nazionale del P.N.F. Itali – Amerika 7 – 1
7 27 Mei 1934 Giorgio Ascarelli Hungaria – Mesir 4 – 2
8 27 Mei 1934 Littorale Swedia – Argentina 3 – 2
UNDAKAN KADUA (PARAPATFINAL)
9 31 Mei 1934 Benito Mussolini Cekoslowakia – Swiss 3 – 2
10 31 Mei 1934 San Siro Jerman – Swedia 2 – 1
 11 31 Mei 1934 Littorale Austria – Hungaria 2 – 1
12 31 Mei 1934 Giovanni Berta Itali – Spanyol 1 – 1 (babak tambahan)
13 1 Juni 1934 Giovanni Berta Itali – Spanyol 1 – 0 (tanding ulang)
UNDAKAN KATILU (SEMIFINAL)
14 3 Juni 1934 Stadio Nazionale del P.N.F. Cekoslowakia – Jerman 3 – 1
15 3 Juni 1934 San Siro Itali – Austria 1 – 0
UNDAKAN MAREBUTKEUN JAWARA KATILU
16 7 Juni 1934 Giorgio Ascarelli Jerman – Austria 1 – 0
UNDAKAN FINAL
17 10 Juni 1934 Stadio Nazionale del P.N.F. Itali – Cekoslowakia 2 – 1 (babak tambahan)

 

DATA TATANDANG UNDAKAN FINAL PIALA DUNIA 1934
Tatandang : Itali – Cekoslowakia
Waktu : 10 Juni 1934
Tempat : Stadio Nazionale PNF, Roma
Wasit : Ivan Eklind (Swedia)
Kartu Koneng :
Kartu Beureum :
Nu Lalajo : 50.000 urang
Nu Ngagulkeun : Raimundo Orsi 81′, Angelo Schiavio 95′ (Itali); Antonin Puc 71′ (Cekoslowakia)
Tim Itali : Vittorio Pozzo (Nu Ngalatih); Gianpiero Combi, Eraldo Monzeglio, Luigi Allemandi, Attilio Ferraris, Luis Monti, Luigi Bertolini, Enrique Guaita, Giuseppe Meazza, Giovanni Ferrari, Raimundo Orsi, Angelo Schiavio
Tim Cekoslowakia : Karel Petru (Nu Ngalatih); Frantisek Plánicka, Josef Ctyroky, Ladislav Zenisek, Rudolf Krcil, Stefan Cambal, Josef Kostalek, Antonín Puc, Oldrich Nejedly, Frantisek Svoboda, Frantisek Junek, Jiri Sobotka

Piala Dunia 1930, Piala Dunia Munggaran di Nagri Uruguay


Logo Piala Dunia 1930
Logo Piala Dunia 1930

Nalika ngayakeun gempungan di dayeuh Amsterdam ping 26 Méi 1928, FIFA (Federation Internationale de Football Association) miboga kahayang pikeun nyieun kajawaraan méngbal profesional husus disagédéngeun kajawaraan Olimpiade. Ieu kajawaraan téh bisa diiluan ku sakabéh anggahota FIFA, anu ka tompérnakeun nelahna kajawaraan Piala Dunia. Pupuhu FIFA waktu harita, Jules Rimet miboga kahayang supaya nagri Uruguay jadi anu boga hajat dina kajawaraan anu munggaran. Ieu kahayang téh didadasaran kusabab nagri Uruguay mangrupakeun jawara cabang olahraga méngbal dina Olimpiade 1924 di Paris, Perancis.

Dina gempungan saterusna di dayeuh Barcelona taun 1929, FIFA kalawan resmi nangtukeun yén nagri Uruguay jadi anu boga hajat Piala Dunia anu munggaran anu bakal dilumangsungkeun dina taun 1930. Kawijakan FIFA anu nunjuk Uruguay jadi nu boga hajat Piala Dunia ieu henteu leupas tina nyongcolangna tim méngbal Uruguay dina Olimpiade 1924 jeung 1928. Dina dua kali Olimpiade éta, tim méngbal Uruguay bisa jadi jawarana. Salian ti éta, dasar tinimbangan séjénna, nyaéta nagri Uruguay bakal miéling milangkala 100 taun konstitusina. Ditambah ogé Uruguay sanggupeun pikeun ngawaragadan sakabéh pamilon anu ngiluan Piala Dunia jeung Uruguay sanggupeun pikeun ngawangun stadion anyar anu gedé. Sabenerna mah, salian ti Uruguay aya nagri séjén anu nyalonkeun jadi anu boga hajat Piala Dunia ieu nyaéta Itali, Spanyol, Walanda jeung Swedia.

Pikeun nangtukeun pamilon ieu Piala Dunia, FIFA ngahaja ngondang sakabéh anggahotana pikeun ngiluan ieu Piala Dunia. Jadi harita mah henteu ngaliwatan undakan kualifikasi heula. Hanjakal henteu sakabéh anggahota FIFA anu diondang daraékeun ngiluan kana ieu kajawaraan. Utamana nagri-nagri anu aya di wewengkon Éropah. Salian ti pundung kusabab henteu kapilih jadi anu boga hajat, sababaraha nagri embungeun ngiluan kusabab nagrina keur dina kaayaan werit. Maranéhna embungeun ngirimkeun tim méngbalna ka nagri anu jauh kacida, kudu ngaliwatan sagara anu lega (sagara Atlantik). Anu nyatujuan jadi pamilon mah nyaéta sababaraha nagri anu aya di wewengkon Amérika kayaning Argéntina, Brasil, Bolivia, Chili, Méksiko, Paraguay, Peru jeung Amérika.

Ti wewengkon Éropah, lamun euweuh pameredih ti pupuhu FIFA mah sigana moal aya anu datang. Untung waé Jules Rimet salaku pupuhu FIFA harita ménta ka sababaraha nagri di wewengkon Eropah pikeun ngirimkeun tim méngbalna. Ahirna mah opat nagri ti wewengkon Eropah sayaga pikeun indit Uruguay ngaliwatan sagara. Bélgia, Perancis, Rumania jeung Yugoslavia ngirimkeun tim méngbalna ka ieu kajawaraan. Tim méngbal Rumania naék kapal SS Conte Verde di dayeuh Genoa Itali, terus nyampeur tim méngbak Perancis di Villefranche-sur-Mer katut tim méngbal Bélgia di Barcelona. Nyimpang ogé ka Rio de Janeiro pikeun nyampeur tim méngbal Brasil. Ieu kapal nepi ka Uruguay dina ping 4 Juli 1930. Sedengkeun tim méngbal Yugoslavia mah naék kapal Florida di Marseille.

Kajawaraan Piala Dunia 1930 dilumangsungkeun ti mimiti ping 13 Juli nepikeun ka ping 30 Juli 1930. Tempat tatandangna dilaksanakeun di dayeuh Montevideo wungkul, utamana di Stadion Centenario anu ngahaja diwangun husus pikeun ieu kajawaraan. Salian ti Stadion Centenario aya dua stadion séjénna anu dijadikeun tempat tatandang nyaéta Stadion Pocitos jeung Stadion Parque Central. Jumlah pamilon anu ngiluan kana ieu kajawaraan Piala Dunia 1930 ieu nyaéta 13 tim méngbal (nagri): tujuh tim ti wewengkon Amérika Kidul (Uruguay, Argéntina, Brasil, Bolivia, Chili, Paraguay jeung Peru), dua tim ti wewengkon Amérika Kalér (Méksiko jeung Amérika) ditambah opat tim ti wewengkon Éropah (Perancis, Bélgia, Rumania, Yugoslavia).

Dina ngalumangsungkeun ieu kajawaraan, 13 tim pamilon dibagi kana opat grup. Grup 1 dieusi ku tim Argéntina, Perancis, Chili jeung Méksiko. Grup 2 dieusi ku Yugoslavia, Brasil, jeung Bolivia. Grup 3 dieusi ku Uruguay, Rumania jeung Peru, sedengkeun Grup 4 diiluan ku Amérika, Paraguay jeung Bélgia.

Tatandang munggaran Piala Dunia 1930 dilumangsungkeun di Stadion Pocitos, Montevideo. Ieu tatandang ngadukeun tim Perancis reujeung tim Méksiko. Dina ieu tatandang, tim Perancis bisa ngéléhkeun tim Méksiko kalawan gulna 4-1. Pamaén Perancis, Lucien Laurent jadi pamaén anu pangheulana (munggaran) ngagulkeun sapanjang kajawaraan Piala Dunia.

Opat tim ti opat grup dina tatandang undakan kahiji ieu, asup ka undakan saterusna (undakan semifinal). Opat tim anu asup undakan semifinal ieu nyaéta Argéntina ti Grup 1, Yugoslavia ti Grup 2, Uruguay ti Grup 3 jeung Amérika ti Grup 4. Dina tatandang undakan semifinal ieu, tim Argéntina ngalawan tim Amérika, sedengkeun tim Uruguay ngalawanan tim Yugoslavia. Hasilna, tim Argéntina bisa ngéléhkeun tim Amérika kalawan gulna 6-1. Sedengkeun tim Uruguay bisa ngéléhkeun Yugoslavia 1-0. Atuh, dua tim anu asup undakan final téh mangrupakeun final anu ditutunggu hususna ku urang Amérika Kidul. Dua tim anu dina mangsa harita mah nyongcolang pisan jeung geus jadi musuh bubuyutan ti jaman Copa Amérika anu dimimitian ti taun 1916. Tatandang ieu ogé bisa disebutkeun mangrupakeun tatandang ulangan final Olimpiade saméméhna, 1924 reujeung 1928 anu dimeunangkeun ku tim Uruguay.

Pamaen Uruguay Jose Nasazzi jeung pamaen Argentina Manuel Ferreira mingpin timna asup ka lapangan di Final
Pamaen Uruguay Jose Nasazzi jeung pamaen Argentina Manuel Ferreira mingpin timna asup ka lapangan di Final

Tatandang undakan final ieu dilumangsungkeun di Stadion Centenario anu miboga kamampuhan pikeun dieusi ku 100 rébu urang nu lalajo. Kabeneran anu nyaksian langsung kana ieu tatandang téh lobana 93 rebu urang. Loba anu lalajo ieu teu anéh kusabab manjing ieu tatandang, tikét kapal ti Buenos Aries ka Montevideo érép dibeulian ku anu hayang lalajo langsung di stadion. Saméméh tatandang dilaksanakeun, wasit anu mingpin ieu tatandang undakan final, John Langenus bingungeun. Sababna mah, dua tim anu arék tanding téh mawa bal séwang-séwangan. Bal saha atuh anu arék dipaké? Ahirna mah wasit nyieun kawijakan bakal ngagunakeun dua bal anu dibawa ku unggal tim dina dua babak tatandang. Sanggeus suten (diundi), babak kahiji ngagunakeun bal bawaanana tim Argéntina, sedengkeun babak kaduana maké bal bawana tim Uruguay. Hasilna, teuing kabeneran teuing henteu. Dina babak kahiji tim Argéntina bisa meunang ngalawan tim Uruguay 2-1, sedengkeun dina babak kaduana tim Uruguay bisa malikeun jumlah gul anu ahirna bisa ngéléhkeun tim Argéntina 4-2.

Gul kaopat tim Uruguay ti Hector Castro ka gawang Argentina
Gul kaopat tim Uruguay ti Hector Castro ka gawang Argentina

Dina babak kahiji, tim Argéntina bisa mingpin jumlah gul 2-1 ngaliwatan Carlos Paucelle jeung Guillermo Stabile anu dibales ku gul Pablo Dorado. Dina babak kadua, tim Uruguay bisa nyitak tilu gul pikeun malikeun kaayaan ngaliwatan Pedro Cea, Santos Iriarte jeung Hector Castro. Ahirna, tim Uruguay bisa jadi jawara Piala Dunia anu munggaran.

Pamaen tim Uruguay sanggeus ngelehkeun tim Argentina
Pamaen tim Uruguay sanggeus ngelehkeun tim Argentina

Hasil lengkep tatandang Piala Dunia 1930

Undakan Kahiji

Grup 1: Perancis – Meksiko 4 – 1; Argentina – Perancis 1 – 0; Chili – Mekskiko 3 – 0; Chili – Perancis 1 – 0; Argentina – Meksiko 6 – 3; Argentina – Chili 3 – 1;

Grup 2: Yugoslavia – Brasil 2 – 1; Yugoslavia – Bolivia 4 – 0; Brasil – Bolivia 4 – 0;

Grup 3: Rumania – Peru 3 – 1; Uruguay- Peru 1 – 0; Uruguay – Rumania 4 – 0;

Grup 4: Amerika – Belgia 3 – 0; Amerika – Paraguay 3 – 0; Paraguay – Belgia 1 – 0;

No Tim Mengbal Maen Meunang Imbang Eleh Gul Niley
Grup 1
1 Argentina 3 3 0 0 10 – 4 6
2 Chili 3 2 0 1 5 – 3 4
3 Perancis 3 1 0 2 4 – 3 2
4 Meksiko 3 0 0 3 4 – 13 0
Grup 2
1 Yugoslavia 2 2 0 0 6 – 1 4
2 Brasil 2 1 0 1 5 – 2 2
3 Bolivia 2 0 0 2 0 – 8 0
Grup 3
1 Uruguay 2 2 0 0 5 – 0 4
2 Rumania 2 1 0 1 3 – 5 2
3 Peru 2 0 0 2 1 – 4 0
Grup 4
1 Amerika 2 2 0 0 6 – 0 4
2 Paraguay 2 1 0 1 1 – 3 2
3 Belgia 2 0 0 2 0 -4 0

Undakan Semifinal

Argentina – Amerika 6 – 1; Uruguay – Yugoslavia 6 – 1;

Undakan Final

Uruguay – Argentina 4 – 2 (Pablo Dorado 12′, Pedro Cea 57′, Santos Iriarte 68′, Hector Castro 89′; Carlos Peucelle 20′, Guillermo Stabile 37′)

Pupuhu FIFA, Jules Rimet masrahkeun piala ka pupuhu organisasi mengbal Uruguay, Dr. Raul Jude
Pupuhu FIFA, Jules Rimet masrahkeun piala ka pupuhu organisasi mengbal Uruguay, Dr. Raul Jude