Milangkala ka-84, Pérsib Bandung Kadatangan Michael Essien


Manjing poéan milangkala Pérsib Bandung anu ka-84, kleub kameumeut urang Jawa Barat éta ngawanohkeun pamaén anyar. Pamaén anyar anu kawilang geus kahot dina dunya méngbal utamana di wewengkon Éropah. Pamaén anu saméméhna ngiluan ka kleub gedé di Éropah kayaning Chelsea, Real Madrid jeung AC Milan. Éta pamaén téh nyaéta Michael Essien.

Ayana pamaén kahot ieu jadi hadiah milangkala Pérsib Bandung anu ke-84, utamana pikeun Bobotoh Pérsib Bandung jeung anu micinta ieu kleub. Heuseusna pikeun nyangheurapan kompetisi taun 2017, Liga 1.

miechel-essien-di-persib
Pamaen anyar Persib Bandung, Michael Essien

Wilujeng sumping Michael Essien….

(Potret meunang nginjeum ti Pikiran Rakyat)

Advertisements

Wilujeng Milangkala Persib Bandung ka-84


milangkala-ka-84
Wilujeng Milangkala Persib Bandung ka-84 taun 2017

Tilu Kali Maén, Kakara Meunang Sakali


Persib Bandung ngelehkeun Bali United dina tatandang kamari
Persib Bandung ngelehkeun Bali United dina tatandang kamari

Teu karasa, Pérsib Bandung geus tilu minggu ngiluan Indonésia Soccer Championship (ISC) A taun 2016, anu hartina geus tilu kali ngalakonan tatandang ngalawan kleub séjén anu ngiluan ISC A. Tina tilu kali maén, Pérsib Bandung kakara bisa meunang sakali. Sedengkeun anu dua kalina deui mah imbang/séri.

Dina tatandang munggaran, Pérsib Bandung ditahan imbang ku kleub lawanna nyaéta Sriwijaya FC. Sanajan ieu tatandang dilumangsungkeun di Stadion Si Jalak Harupat, Sriwijaya FC bisa nahan Pérsib Bandung. Dina tatandang munggaran ieu, Pérsib Bandung kagulan ti heula ngaliwatan gul anu dicitak ku Beto Golcanves dina tungtung babak kahiji. Untung waé ditungtung babak kadua Pérsib Bandung bisa males ngaliwatan gul anu dicitak ku Tantan.

Dina tatandang kaduana, anu dilumangsungkeun di dayeuh Samarinda ngalawanan Pusamania Bornéo FC, Pérsib bisa naha imbang sanajan salaku kleub anu nyorog. Taya gul anu bisa dicitak dina ieu tatandang.

Tatandang anu katiluna, anu dilumangsungkeun di Stadion Si Jalak Harupat deui, Pérsib Bandung ahirna mah bisa ngéléhkeun lawanna. Dina tatandang anu dilaksanakeun dina poé saptu kamari, Pérsib bisa nyitak dua gul kalawan teu bisa dibales ku Bali United anu jadi lawanna. Gul Pérsib Bandung dicitak ku Vladimir Vujovic ngaliwatan tajongan pinalti dina menit ka-29 sanggeus saurang pamaén Bali United hén, bal keuna kana leungeunna. Gul kaduana dicitak ku David Laly anu najong bal ti juruk kotak pinalti dina menit ka-39.

Tina hasil dua kali imbanh jeung sakali meunang, Pérsib Bandung bisa meunangkeun réngking kaopat pikeun saheulaanan dina klasemén ISC A kalawan mibanda niléy 5.

(Potret meunang nginjeum ti AntaraFoto)

Pérsib Bandung Geus Ngawanohkeun Tim di ISC A


Pérsib Bandung geus ngawanohkeun tim anu baris ilu biung kana kajawaraan méngbal Indonésia Soccer Championship (ISC) A taun 2016. Timna geus diwanohkeun dina poé Saptu mangkukna, ping 23 April anu tempatna di Stadion Siliwangi. Dina raraga ngiluan ISC A, Pérsib Bandung dieusi ku 27 pamaén kaasup pamaén anyar reujeung anu geus maneuh ti mangsa ngiluan kajawaraan saméméhna.

Salian ti ngawanohkeun pamaén, dina ieu acara diwanohkeun ogé kaos tim salila ngiluan ISC A entragan 2016. Terus diwanohkeun ogé produk mobil édisi Pérsib anu dikaluarkeun ku Datsun anu jumlahna ngan ukur 80 siki.

Pérsib Bandung ngawanohkeun tim di ISC A
Pérsib Bandung ngawanohkeun tim di ISC A

27 urang pamaén anu ngeusi tim Pérsib Bandung pikeun kajawaraan ISC A nyaéta: I Made Wirawan, Muhammad Natshir Fadhil Mahbuby, Muhammad Ridwan (kiper); Jajang Sukmara, Tony Sucipto, Vladimir Vujovic, Hermawan, Purwaka Yudhi Pratomo, Dias Angga Putra, Rudolof Yanto Basna, Jujun Saepulloh, Muhammad Agung Pribadi (pamaén tukang/bek); Taufiq, Atep Rizal, Hariono, David Laly, Rachmad Hidayat, Kim Jeffrey Kurniawan, Febri Hariyadi, Gian Zola Nasrulloh, Robertino Pugliara (pamaén tengah); Tantan, Samsul Arif Munip, Yandi Sofyan Munawar, Rudiyana, Juan Carlos Rodriguez Belencoso, Zulham M. Zamrun (pamaén hareup). Sedengkeun anu ngalatihna tetep Dejan Antonic anu ngagantikeun Djadjang Nurdjaman anu keur keurseus ka nagri Itali.

(Potret meunang nginjeum ti RRI)

Persib Bandung, Jawara Piala Presiden 2015


Kapten Persib Bandung, Atep Rizal narima piala Presiden ti Presiden Joko Widodo sanggeus mawa Persib Bandung jadi jawara Piala Presiden 2015
Kapten Persib Bandung, Atep Rizal narima piala Presiden ti Presiden Joko Widodo sanggeus mawa Persib Bandung jadi jawara Piala Presiden 2015 (potret: Liputan6.com)

Ahirna, Pérsib Bandung Asup Undakan Puncer Piala Présidén 2015


Sanajan éléh nalika tatandang nyorog ka Kalimantan, dina tatandang kaduana di Bandung Pérsib Bandung bisa ngéléhkeun lawanna, Mitra Kukar. Sanajan dibeungbeuratan kudu meunang kalawan béda gulna leuwih ti hiji, Pérsib Bandung bisa nyitak gul tiheula ngaliwatan pamaén hareup Zulham Zamrun. Hanjakal gulna teu diaku ku wasit kusabab aya pamaén Persib anu opsét.

Gul Pérsib anu bener bisa dicitak dina menit ka-7. Gul ieu dicitak ku pamaén tukang Mitra Kukar anu teu dihaja ngasupkeun bal ka gawangna. Kakara gé samenit, Mitra Kukar bisa males ieu gul ngaliwatan Carlos Raul.

Gul panambah pikeun Pérsib Bandung bisa dicitak dina menit ka-20 ngaliwatan tajongan Atép Rizal anu najong bal téngtogan ti kiper Mitra Kukar anu teu bisa néwak bal kalawan sigep. Gul katiluna bisa dicitak dina menit ka-26 ngaliwatan tajongan Ilija Spasojevic anu meunang operan bal ti korner.

Babak kahiji dipungkas bari taya deui gul anu dicitak. Babak kadua, méngbalna beuki campuh. Dua kleub papada hayang ngagulkeun. Pikeun Pérsib sorangan, najan pikeun sawatara waktu bisa meunang 3-1, tapi masih kénéh tacan tenang kusabab lamun dibales sanajan hiji gul, kleub Mitra Kukar anu bakal asup kana undakan puncer.
Manjing ahir waktu babak kadua mah bakating ku hayang ngagulkeun, loba pamaén Mitra Kukar anu ngahaja maju ka wilayah maén pamaén Pérsib Bandung. Beuki lila beuki ramé, teu anéh lamun wasit nepikeun ka ngaluarkeun kartu konéng. Malahan pamaén Pérsib Bandung, Hariono mah ditibanan kartu beureum kusabab nyieun codéka ka pamaén Mitra Kukar, Raul Sciucatti dina menit ka-81.

Tatandang antara Persib Bandung ngalawan Mitra Kukar
Tatandang antara Persib Bandung ngalawan Mitra Kukar

Untung waé, sanajan maénna ngan kari sapuluh urang, gawang Pérsib Bandung anu dikepung pamaén Mitra Kukar teu bisa katambahan gulna. Nepikeun ka béakna waktu babak kadua, gulna teu robah. 3-1 pikeun Pérsib Bandung.

(Potret meunang nginjeum ti Simamaung.com)

Méngbal di Kalimantan, Pérsib Bandung Éléh Deui


Tatandang munggaran dina undakan semifinal Piala Présidén 2015, Pérsib Bandung kudu ngaladénan kleub Mitra Kukar di tempatna. Tatandang anu dilumangsungkeun poé kamari di Stadion Aji Imbut dayeuh Tenggarong, dimeunangkeun kunu boga imah. Kalawan gul anu bisa dicitakna ngan ukur hiji, 1-0.

Dina ieu tatandang, Pérsib Bandung teu bisa maénkeun genep urang pamaén intina kusabab meunang dua kartu konéng dina tatandang saméméhna reujeung masih kénéh can cageur bener. Pamaén anu teu bisa dipaénkeunana nyaéta Vladimir Vujovic, Achmad Jufriyanto, Hariono, Zulham Zamrun, Ilija Spasojevic katut M. Ridwan.

Sanajan kitu, dina prakna tatandang Pérsib Bandung masih bisa ngaladénan Mitra Kukar. Salila méngbal, pamaén dua kleub silih serang papada hayang gera ngagulkeun. Hanjakal gul téh susah dicitakna. Babak kahiji dipungkas ku taya gul anu bisa dicitak.

Mitra Kukar ngelehkeun Persib Bandung
Mitra Kukar ngelehkeun Persib Bandung

Babak kaduana ogé sarua, susah pisan nyitak gulna. Sanajan kasempetan pikeun nyitak gul mah aya, teu bisa dijadikeun gul. Gul kakara bisa dicitak dina menit ka-84. Pamaén tengah kleub Mitra Kukar, Carlos Raul Sciucatti bisa nyitak gul ka gawang Pérsib Bandung ngaliwatan hédenan sanggeus meunang operan ti Zulkifli Syukur.
Sanajan éléh, Pérsib Bandung masih mibanda kasempetan pikeun asup kana undakan final. Asal dina tatandang kadua anu baris dilumangsungkeun di Bandung bisa meunang leuwih ti hiji gul. Tatandang kaduana bakal dilumangsungkeun dina poé Saptu ping 10 Oktober 2015.

(Potret meunang nginjeum ti Simamaung)