Ngungkulan Érror 5B00 Printer Canon G2000


Hasil citakan printer réngsé dibenerkeun

Biasana mah lamun nyitak tulisan maké printer téh ngan ukur rupa (warna) hideung wungkul, tara maké warna-warni. Pék sakali maké nyitak poto dina keretas, geningan rupana anéh. Siga anu teu kaluar sawaréh warnana. Pas dipariksa ngagunakeun kamonésan printer pikeun mariksa hasil citakan printer, bener waé rupa M (Magenta)-na teu kaluar. Dicobaan di-Cleaning, angger waé. Ahirna dicoba sababaraha kali nepikeun ka System Cleaning, angger kalahka error printerna. Cenah printerna error 5B00. Kudu dibenerkeun ka tukangna cenah !
Aduh, kumaha ieu ? Mangkaning kudu nyitak sababaraha lembar tulisan. Ieu mah lain ngan ukur nyitak rupa-rupa wungkul, nyitak hideung wungkul ogé teu bisa.
Tungtungna néangan cara ti internét, kumaha cara ngungkulan error 5B00. Alhamdulillah, manggihan cara anu gampang. Teu kudu maké pakakas nanaon, ngan ukur mencétan kenop anu aya dina printer wungkul.
Ceuk loka E-Print, pikeun ngungkulan erro 5B00 printer Canon G2000 kacida gampangna. Carana nyadiankeun keretas pikeun nyitak hasil ngecekna jeung mencetan kenop Stop jeung Power.

  1. Printer kudu pareum saméméh dibenerkeun ku ieu cara. Lamun hurung, kudu dipareuman heula.
  2. Printer kudu dieusian ku sababaraha lambar keretas.
  3. Pencét kenop Stop (kenop anu digambaran segitilu dibuleudan), ulah dileupaskeun. Terus pencét oge kenop Power reujeung teu dileupaskeun.
  4. Kakara leupaskeun kenop Stop bari teu ngaleupaskeun kenop Power. Satutasna, pencétan kenop Stop 5 kali bari teu ngaleupaskeun kenop Power. Réngsé éta, kakara kenop Power dileupaskeun. Mangka lampu warna héjo bakal kikiceupan. Tunggu nepikeun ka lampu héjona henteu kikiceupan.
  5. Sanggeus lampu héjo hurungna anteng, pencét kenop Stop lima kali, disusul tepus ku mencét kenop Power sakali. Tungguan nepikeun ka printer réngsé nga-reset tug nepikeun nyitak dina keretas. Printer bakal nyitak aksara D=000.0 dina keretas.
  6. Tuluy pencét kenop Stop tilu kali disusul ku kenop Power sakali. Printer bakal nyitak dina keretas satengah lambar. Teu kaharti, naon waé anu ditulis dina keretas téh, da kodeu wungkul. Lamun geus nyitak lambaran ieu, hartina printer geus réngsé dibebenerna.
  7. Pareuman printer terus hurungkeun deui. Printer geus bisa digunakeun.

Tujuh Taun Ngageugeuh WordPress


Manjing tujuh taun ngageugeuh di WordPress
Manjing tujuh taun ngageugeuh di WordPress

Teu karasa geus manjing tujuh taun cenah mah ngageugeuh di mandala WordPress téh. Ping ayeuna, tujuh taun anu geus kaliwat mimiti daptar jadi anggahota WordPress téh. Sanajan geus kawilang lila, tapi beuki dieu asa beuki jarang pikeun ngahaja kokotrétan di mandala WordPress téh. Teuing atuh, sigana mah manco teuing kana pagawéan, jadi blog di WordPress téh katambélarkeun.

Keun baé kétang, ieu mah sakasampeurna waé, lamun keyeng nya dileukeunan pikeun medalkeun tulisan anyar. Mugia ka hareupna leuwih remen deui medalkeunana.

Cag ah….

Ngaronjatkeun Flyme di Meizu M2 Note


Meunang inpo ti internét, heuseusna loka Flyme, cenah sistem operasi Android pikeun parabot keupeul Meizu anu dingaranan Flyme geus aya anu anyar nyaéta entragan 5.1.

Dina pintonan hareup éta loka nembrak gambar angka jeung Flyme 5 katut katerangan pondokna. Katerangan anu ngajelaskeun yén Flyme 5 mangrupakan sistem operasi anu dijieun dumasar kana Android 5.1. Sistem operasi Flyme 5 leuwih alus jeung leuwih kuat tibatan entragan saméméhna.

Flyme 5 bisa dipaké pikeun parabot keupeul jinis M2 Note jeung MX4. Kari ngundeur waé tina lambaran Download, terus pilih parabot keupeul anu dipibanda. Pikeun ngundeurna alusna mah ngagunakeun parabot keupeulna langsung ngagunakeun panyungsi internét. Gedéna payil waktu ngundeur pikeun Meizu M2 Note 801 méga. Lambaran heuseus ngundeur payilna bisa langsung nyungsi ka alamat http://www.flymeos.com/firmwarelist?modelId=3&type=1. Pilih baris Flyme 5.1.5.0G terus teken kenob Download. Tungguan waé nepikeun ka réngséna.
Kumaha cara masangna?

Pikeun masangna, teken waé payil hasil ngundeurna. Bakal kaluar jandela anu negeskeun ngeunaan ngaronjatkeun Flyme. Lamun bener-bener arék ngaronjatkeun, kari teken waé Reboot. Pilihan céklis Wipe User Data dipaké pikeun mupus data dina parabot keupeul. Sanggeus pareum bakal hurung deui bari kaluar katerangan Checking Firmware. Tungguan waé nepikeun réngséna.

Saterusna bakal nincak kana undakan ngaronjatkeun Flyme (Upgrading). Tungguan sabab rada lila. Sanggeus réngsé bakal pareum sorangan terus hurung deui. Disambung ku undakan Optimizing app. Lilana gumatung kana lobana aplikasi anu geus aya dina parabot keupeul. Tungguan nepikeun ka réngséna.

Sawatara pintonan anyar sanggeus Meizu M2 Note dironjatkeun sistem operasina kana Flyme 5.1
Sawatara pintonan anyar sanggeus Meizu M2 Note dironjatkeun sistem operasina kana Flyme 5.1

Sanggeus réngsé, parabot keupeul Meizu M2 Note geus bisa dipaké kalawan sistem operasi anu anyar. Naon waé atuh kamonésan jeung kapinunjulan anu dipibanda ku Flyme 5? Tungguan waé dina tulisan saterusna….

Kabita Ku Meizu M2 Note


Sabenerna mah geus sawatara waktu anu geus kaliwat. Nilik kana kapinunjulanana, sanajan ieu hénpon téh jieunan pabrik di Cina, matak kabita. Ditambah deui ku hargana anu jauh lamun dibandingkeun reujeung hénpon sarimbagan anu dijieun ku pausahaan anu geus kawentar. Da cenah, ayeuna mah béda reujeung anu enggeus-enggeus. Sanajan jieunan Cina tapi kualitasna mah leuwih alus atawa bisa nyaruaan kana hénpon jieunan pausahaan anu kawentar.

Henpon Meizu M2 Note
Henpon Meizu M2 Note

Nilik kana data anu diancokeun ku sawatara loka mah, aya sababaraha kapinunjulan anu dipibanda ku éta hénpon. Diantara kapinunjulan anu diancokeun nyaéta:

  1. Ukuran layarna anu gedé nyaéta 5,5 inci. Kawilang gedé pikeun ukuran hénpon biasa. Condong kénéh disebutna téh phablet (hénpon tablet). Ditambah deui ku teknologi anu dipaké dina layarna nyaéta geus ngagunakeun téknologi IGZO anu alus pikeun ngurangan pangabutuh listrik. Terus resolusinya ogé gedé nyaéta 403 PPI kalawan kontrasna nepikeun ka 1.000 banding 1.
  2. Ukuran hénponna anu kawilang ipis jeung hampang. Kandelna ngan ukur 8,7 miliméter kalawan beuratna 149 gram. Cangkan tukangna mibanda rupa-rupa warnana. Tinggal milih hayang anu rupa kumaha: aya anu héjo, hawuk, kayas jeung bodas.
  3. Pikeun ngajalankeun gawéna, hénpon Meizu M2 Note dibekelan ku prosesor 64-bit dalapan inti (octa-core) anu dilengkepan ku prosesor grafis tilu inti (triple-core). Prosesor anu dipakéna kaluaran ti Mediatek nyaéta seri MT6753. Prosesor ieu bisa ngajalankeun sagala rupa pagawéan ti mimiti pagawéan anu hampang nepikeun ka anu beurat kayaning kaulinan tilu dimensi (game 3D).
  4. Pikeun nyambungkeun ka jaringan seluler, ieu hénpon dibekelan ku dua tempat kartu SIM. Duanana mibanda kamampuan pikeun nyambung kana jaringan seluler 4G, jadi lain ngan hiji. Duanana bisa jalan babarengan, teu kudu ganti-ganti. Hanjakal waé ukuran SIM-na geus ukuran nano, jadi lamun mibanda kartu SIM biasa, kudu diteukteuk heula da moal asup.
  5. Terus kamerana. Hénpon Meizu M2 Note dibekelan dua kaméra, di tukang jeung di hareup. Anu tukang mibanda resolusi 13 megapiksel sedengkeun anu hareup 5 megapiksel. Kaméra anu tukang dilengkepan ku lampu léd dua siki (dual-tone flash) pikeun nyaangan anu arék dipotrét.
  6. Pikeun ngalistrika ieu hénpon, Meizu M2 Note dilengkepan ku batré anu ukuranana 3.100 mAh kaluaran ti SONY/ATL. Kawilang gedé.
  7. Terus sistem operasina geus ngagunakeun Android entragan 5.1 atawa Lollipop. Sistem operasina geus diropéa kalawan dingaran Flyme 4.5. Jadi dina pintonanana, henteu dina wangunan Android 5.1 Lollipop deui, tapi geus robah.

Tina sawatara kapinunjulan éta, ahirna mah nyeungceum waé ieu hénpon.

(Gambar meunang nginjeum ti Meizu)

1.500 Pedalan di Blog Kampung Ciburuan


1.500 pedalan di blog Kampung Ciburuan
1.500 pedalan di blog Kampung Ciburuan

Nempo kana jumlah pedalanana, Alhamdulillah geningan ieu blog téh bisa medalkeun tulisan nepikeun ka 1.500 pedalan. Mugia waé ka hareupna leuwih mayeng deui….