Mikawanoh Blog


Danget ayeuna mah anu ngaranna internét téh geus teu anéh deui. Pon kitu deui pangeusi dunya internét, lain barang anu ahéng deui. Di dunya internét aya anu ngaranna situs wéb anu nyadiakeun sagala hal, sagala rupa: aya tulisan, gambar, pidio, sora jeung anu séjénna. Ti mimiti hal anu heureuy nepikeun ka anu bener-bener, aya di dunya internét. Salasahiji pangeusi internét téh nyaéta aya anu ngaranna blog atawa weblog.

Blog mangrupakeun hiji jinis situs wéb anu eukeur nanjung, disagigireun situs social network saperti fésbuk. Asal mulana, sakumaha anu dicutat tina situs wikipedia, blog téh mangrupakeun singketan tina wéb log, nyaéta hiji wangunan wéb anu nyarupaan kana tulisan-tulisan dina situs wéb biasa. Tulisanana diéntép kalawan dibalik (tulisan anu pangheula ditulis diteundeun dihandapeun tulisan anu anyar). Tapi teu salawasna kitu, aya anu sabalikna.

wordpress.com

Blog ngabogaan loba mangpaat. Ti ngan ukur catetan pribadi, nepikeun ka jadi tempat ngajual barang atawa kampanyeu pulitik.
Blog munggaran ditanjeurkeun ku blogger.com, anu dipimilik ku PyraLab. Ngan dina taun 2002 PyraLab dibeuli kua google.com. Sanggeus éta, marucunghulan blog-blog séjénna. Salian ti tempat pikeun neundeun blog anu beuki loba, aplikasi blog anu bisa dipaké pikeun nyieun blog ogé beuki loba.

Saha waé anu hayang ngabogaan blog, kiwari mah kacida gampangna. Saha waé bisa miboga blog. Asal ngabogaan kahayang, bisa nyieun blog. Arék anu mayar arék anu haratis, tinggal milih.

Sakumaha nyieun situs wéb, nyieun blog ogé merlukeun tempat neundeun blog jeung merlukeun ngaran tempat blogna. Tempat jeung ngaran blog, sarua waé aya anu mayar aya anu haratis. Lamun hayang anu haratis, tinggal daptar ka situs wéb anu nyadiakeun tempat jeung ngaran pikeun nyieun blog. Lamun hayang anu mayar tinggal meuli ngaran jeung nyéwa tempat neundeun éta blog.
Situs web anu nyadiakeun tempat pikeun neundeun blog haratis diantarana wae nyaeta wordpress, blogspot, blogsome, jeung rea-rea deui.