Perancis, Jawara Méngbal di Rusia


Réngsé ogé kajawaraan méngbal di Rusia. Sanggeus tatandang panungtungan anu dilumangsungkeun peuting tadi. Piala Dunia 2018 di Rusia dipungkas ku tatandang undakan puncer pikeun nangtukeun nagri mana anu jadi jawarana. Dua nagri anu asup kana undakan puncer silih éléhkeun: Perancis jeung Kroasia.

Hasilna?

Tatandang antara Perancis ngalawan Kroasia

Nagri Perancis bisa jadi jawara Piala Dunia pikeun kadua kalina sanggeus bisa ngéléhkeun nagri Kroasia kalawan gulna 4-2. Tatandang antara dua nagri asal Éropah ieu lumangsung kalawan campuh. Duanana papada hayang bisa ngéléhkeun lawanna. Papada hayang nyitak gul ka gawang lawanna. Pamaén anu dipaénkeun ku dua nagri mangrupakeun pamaén anu aralus wungkul sakumaha pamaén anu ngiluan dina tatandang undakan semifinal.

Babak kahiji, nincak menit ka-18 nagri Perancis bisa ngabuskeun bal ka gawang nagri Kroasia sanggeus tajongan Antoine Griezmann dihéden ku Mario Mandzukic. Hanjakal héden éta téh nyababkeun bal asup ka gawangna sorangan. Teu lila ti harita nagri Kroasia bisa nyarua jumlah gul sanggeus tajongan Ivan Perisic asup ka gawang Hugo Lloris. Teu lila ogé, nagri Perancis bisa nyitak gul deui ka gawang Kroasia sanggeus meunangkeun pinalti anu ditajong ku Antoine Griezmann. 2-1 teu robah nepikeun ka réngsé babak kahiji.

Nincak babak kadua, nagri Perancis bisa nambahan deui gul ngaliwatan Paul Pogba reujeung Kylian Mbappe. Gulna jadi 4-1. Saméméh tatandang réngsé, nagri Kroasia bisa nyitak gul ngaliwatan Mario Mandzukic sanggeus meunangkeun bal tajongan kiper Perancis. Nepikeun ka tatandang réngsé, gul teu roba tetep 4-2 pikeun Perancis.

Ku hasil ieu, nagri Perancis bisa meunangkeun Piala Dunia pikeun kadua kalina. Jawara Piala Dunia kahijina dimeunangkeun dina taun 1998 anu dilumangsungkeun di nagrina sorangan.

Advertisements

Ngéléhkeun Perancis, Portugal Jadi Jawara Anyar Piala Éropa


Ahirna mah ceungceuman Portugal pikeun jadi jawara Éropah bisa kalaksanakeun ogé sanggeus dina undakan puncer Piala Éropa entragan 2016 bisa ngéléhkeun anu boga hajat, tim Perancis. Dina tatandang anu dilumangsungkeun di Stade de France dayeuh Paris ieu Portugal bisa ngéléhkeun Perancis kalawan gulna sasiki anu dicitak dina babak tambahan.

Perancis salaku anu boga hajat leuwih dijagokeun pikeun jadi jawara Piala Éropa 2016 tibatan tim Portugal. Teu anéh lamun salila tatandang tim Perancis leuwih loba ngawasa jalanna méngbal. Hanjakal sagala panarajang pamaén Perancis neunggar hahalang pamaén Portugal. Mangpirang-pirang kasempetan anu dipibanda ku pamaén Perancis teu bisa dijadikeun gul. Pamaén Portugal sorangan sakali-kali mah ngayakeun panarajang balesan. Ngan nyakitu téa taya anu bisa dijadikeun gul.

Dina babak kahijina, teu pati loba kasempetan anu dipibanda ku dua patandang pikeun ngagulkeun. Dina ieu babak, béntang lapangan Portugal sakaligus kaptén timna, Cristiano Ronaldo cilaka nepikeun ka teu bisa neruskeun méngbalna. Hal ieu sanggeus ngalaman katabrak ku Dimitri Payet dina menit kadalapan. Tuur kenca manéhna kadupak ku suku pamaén Perancis kasebut. Sanajan maksakeun pikeun neruskeun méngbalna, ahirna mah dina menit ka-24 pamaén asal Real Madrid éta teu bisa neruskeun méngbalna tur diganti ku Ricardo Quaresma.

Tatandang di undakan puncer Piala Eropa 2016 antara Perancis ngalawan Portugal
Tatandang di undakan puncer Piala Eropa 2016 antara Perancis ngalawan Portugal

Nincak babak kadua, pamaén Portugal leuwih wani pikeun ngawasa jalanna tatandang. Pikeun ngungkulanana, Perancis ngaganti pamaén Dimitri Payet ku Kingsley Coman. Antukna, jalanna méngbal leuwih campuh. Dua tim silih tarajang, hanjakal kasempetan pikeun ngagulkeun batal teu bisa ngajadi gul. Kasempetan alus anu dipibanda ku pamaén ti dua patandang teu bisa dijadikeun gul. Waktu normal tatandang dipungkas ku gedeg, 0-0.

Tatandang diteruskeun kana babak tambahan. Dina babak tambahan ieu, pamaén Portugal leuwih tanghinas dina ngayakeun panarajangna. Sawatara kasempetan pikeun ngagulkeun dipibanda ku pamaénna. Untung waé kiper Perancisna bisa ngungkulanana. Ahirna mah ku terus-terusan ditarajang mah gawang Perancis kagulan ogé. Dina menit ka-109 pamaén gaganti, Eder bisa ngasupkeun bal ka gawang Perancis. 1-0 pikeun Portugal.

Tinggaleun sagul, pamaén Perancis sakuat tanaga pikeun ngabalesna. Hanjakal nepikeun ka waktu tambahan béak, taya deui gul anu bisa dicitak. Tungtungna, Portugal jadi jawara anyar Piala Éropa. Kahayang Portugal pikeun jadi jawara Éropah téh bisa kacumponan sanggeus dina taun 2004 anu dilumangsungkeun di nagrina bolay kusabab diéléhkeun ku tim Yunani.

(Potret meunang nginjeum ti internet)

Undakan Final Piala Éropa 2016


Tatandang undakan semifinal Piala Éropa 2016 geus réngsé. Dua patandang anu meunang dina undakan semifinal tersebut langsung asup kana undakan puncer Piala Éropa pikeun marebutkeun jawara Piala Éropa 2016. Dua patandang anu asup kana undakan puncer éta nyaéta Portugal reujeung Perancis.

Pikeun Portugal sorangan, asup kana undakan puncer Piala Éropa mangrupakeun anu kadua kalina sanggeus dina entragan 2004. Sedengkeun pikeun Perancis mangrupakeun anu katilu kalina sanggeus bisa asup kana undakan puncer Piala Éropa dina entragan 1984 jeung 2000. Ngeunaan nyangking jawara Piala Éropa, Portugal mah tacan pernah jadi jawarana kusabab dina undakan puncer Piala Éropa taun 2004 diéléhkeun ku tim Yunani. Sedengkeun tim Perancis mah pernah dua kali jadi jawara Piala Éropa taun 1984 jeung 2000.

Nurutkeun sawangan sawatara pengamat méngbal, jalanna tatandang undakan puncer Piala Éropa 2016 bakal saimbang. Hal ieu dumasar kana hasil tatandang saméméhna dina undakan semifinal. Ngan, kusabab Perancis mah salaku anu boga hajat, leuwih dipunjulkeun.

Tatandang undakan puncer Piala Eropa 2016 anu nepungkeun Perancis reujeung Portugal
Tatandang undakan puncer Piala Eropa 2016 anu nepungkeun Perancis reujeung Portugal

Tatandang undakan puncer Piala Éropa 2016 bakal dilumangsungkeun dina poé Senén wanci janari leutik.

(Gambar meunang nginjeum ti Kompas)

Ahirna mah Jérman Éléh Ogé


Tatandang undakan semifinal kaduana nepungkeun calon jawara anu tacan pernah kaéléhkeun dina tatandang Piala Éropa 2016, Jérman reujeung anu boga hajat, tim Perancis. Tatandang ieu dilumangsungkeun di Stade Velodrome dina poé Jumaah tadi subuh. Hasilna, anu boga hajat ahirna mah bisa ngéléhkeun tim Jérman sanggeus sawatara puluh taun teu bisa meunang.

Loba anu nyawang, tatandang ieu bakal lumangsung campuh pisan. Teu disawang kitu kumaha, da dua tim anu jadi patandang ieu undakan semifinal ieu mangrupakeun patandang pinunjul dina Piala Éropa 2016. Tim Jérman mangrupakeun hiji tim anu tacan pernah kaéléhkeun salila dilumangsungkeunana Piala Éropa 2016. Sedengkeun tim Perancis mangrupakeun anu boga hajat ieu Piala Éropa.

Jalanna tatandang campuh pisan. Munggaran maén, pamaén Perancis langsung ngayakeun panarajang ka gawang Jérman. Hanjakal panarajangna teu bisa dijadikeun gul. Satutasna, kakara pamaén Jérman bisa ngadalikeun jalanna méngbal. Sawatara kasempetan pikeun ngagulkeun bal dipibanda ku pamaén Jérman. Hanjakal kiper Perancis alus pisan dina ngajaga gawangna. Atuh, teu bisa dijebol ku pamaén hareup jeung pamaén tengah Jérman.

Sanajan pamaén Jérman anu remen narajang ka gawang Perancis, kasempetan pikeun ngagulkeun mah kalahka kapibanda ku pamaén Perancis. Saméméh babak kahiji béak, tim Perancis meunangkeun tajongan pinalti sanggeus leungeun pamaén tengah Jérman, Bastian Schweinsteiger kakeunaan ku bal dina kotak pinalti. Tajongan pinalti dicokot ku Antoine Griezmann. 1-0 pikeun Perancis. Babak kahiji ditutup kalawan Perancis meunang hiji gul.

Nincak babak kadua, Jérman bisa ngawasa jalanna méngbal deui. Hanjakal waé sawatara kasempetan pikeun ngagulkeun angger teu bisa dijadikeun gul. Malahan, kaayaan jadi sabalikna. Jérman anu kagulan deui sanggeus Antoine Griezmann bisa nyitak gul deui dina menit ka-72. Nepikeun ka waktuna béak, gulna teu robah deui.

Tatandang antara Perancis ngalawan Jerman
Tatandang antara Perancis ngalawan Jerman

Perancis asup ka undakan puncer Piala Éropa 2016 anu geus ditungguan ku tim Portugal.

(Potret meunang nginjeum ti Sidomi)

Opat Patandang Undakan Semifinal Piala Éropa 2016


Sanggeus ngaréngsékeun sakabéh tatandang undakan parapatfinal atawa undakan katilu, ahirna kapilih opat patandang anu asup kana undakan kaopat atawa undakan semifinal. Opat patandang anu asup kana undakan semifinal ieu nyaéta Portugal, Wales, Jérman jeung anu boga hajat Perancis. Opatanana bakal marebutkeun dua tempat anu bakal tatandang dina undakan puncer Piala Éropa 2016.

Tatandang undakan semifinal Piala Eropa 2016
Tatandang undakan semifinal Piala Eropa 2016

Opat patandang dina undakan semifinal bakal ngalakonan dua tatandang anu nepungkeun Portugal jeung Wales katut Jérman reujeung Perancis. Dua tatandang ieu disawang bakal lumangsung kalawan campuh. Tatandang kahiji anu nepungkeun tim Portugal jeung tim Wales bakal ngilukeun dua béntang lapangan anu ngeusi nagarana séwang-séwangan. Dua béntang anu asalna sakleub di kleub Real Madrid bakal silih éléhkeun supaya bisa mawa timna asup kana undakan puncer Piala Éropa 2016. Béntangna, Cristiano Ronaldo di tim Portugal jeung Gareth Bale di tim Wales.

Tatandang kadua anu nepungkeun tim Jérman jeung Perancis ogé sarua disawang bakal ramé. Duanana mangrupakeun urut jawara Piala Éropa saméméhna. Dua tim ieu dieusi ku sawatara béntang lapangan di kleubna séwang-séwangan. Ieu tatandang bakal dilumangsungkeun di Stade Vélodrome dayeuh Marseille.

Dua tatandang undakan semifinal ieu bakal dilumangsungkeun dina poe Kemis jeung Jumaah. Waktuna, nalika wanci janari waktu Indonésia.

(Gambar meunang nginjeum ti Bola Kompas)

Perancis Jadi Pangjangkep Patandang Semifinal


Tatandang panungtungan dina undakan parapatfinal anu nepungkeun patandang tim Perancis reujeung Islandia. Salaku anu boga hajat, tim Perancis dijagokeun pikeun bisa ngéléhkeun tim Islandia. Pikeun Islandia sorangan dipiharep bisa méré panghalang pikeun Perancis dina ieu hahalang supaya teu bisa kitu waé asup undakan saterusna. Sakumaha anu katohyan, saméméhna tim Islandia bisa ngéléhkeun tim Inggris dina undakan kadua.

Tatandang ieu dilumangsungkeun di Stade de France, dayeuh Saint Denis. Hasilna, Perancis ahirna mah bisa ngéléhkeun tim Islandia kalawan gulna kawilang loba, 5-2. Pikeun Islandia sorangan lumayan alus bisa males dua gul.

Tatandang antara Perancis ngalawan Islandia
Tatandang antara Perancis ngalawan Islandia

Jalanna tatandang sorangan bisa disebut dikawasa ku pamaén tim Perancis utamana dina undakan kahiji. Pamaén tim Perancis bisa ngawasa jalanna méngbal kalawan bisa ngasupkeun bal opat kali ka gawang Islandia dina babak kahiji. Gul munggaran Perancis dicitak ku pamaén hareupna, Olivier Giroud dina menit ka-12. Gul ieu dicitak ku inyana sanggeus narima operan bal ti Blaise Matuidi. Meunang sagul, Perancis nambahan deui gulna dina menit ka-20 ngaliwatan hédenan Paul Pogba sanggeus narima operan bal tina tajongan juru lapangan. Gul katiluna dicitak ku Dimitri Payet dina menit ka-42 sanggeus narima operan ti Antoine Griezmann. Mungkas babak kahiji, Perancis nambahan gulna ngaliwatan Antoine Griezman dina menit ka-44.

Asup kana babak kadua, pamaén Islandia bisa males hiji gul ngaliwatan Sigthorsson anu bisa ngasupkeun bal ka gawang Perancis dina menit ka-56. Kagulan, Perancis langsung males deui ngaliwatan gul anu dicitak ku Olivier Giroud dina menit ka-59. Saméméh waktu béak, pamaén Islandia bisa nyitak gul hiji deui ngaliwatan Bjarnason dina menit ka-84.

Pikeun Perancis, sanggeus bisa ngéléhkeun Islandia, dina babak semifinal Piala Éropa 2016 bakal nangtang Jérman anu ngéléhkeun Itali.

(Potret meunang nginjeum ti Detik Sport)

Geus Atra Dalapan Tim Undakan Parapatfinal Piala Éropa 2016


Sanggeus ngalumangsungkeun dalam tatandang anu diiluan ku 16 patandang, ahirna mah jelas ogé patandang mana waé anu asup kana undakan saterusna atawa undakan parapatfinal Piala Éropa 2016. Patandang anu meunang dina undakan kadua langsung asup kana undakan parapatfinal. Patandang atawa tim anu asup kana undakan katilu ieu nyaéta: Polandia, Portugal, Wales, Bélgia, Jérman, Itali, Perancis jeung Islandia.

Tatandang undakan katilu ieu bakal dilumangsungkeun dina poé Kemis pagéto anu nepungkeun tim Polandia ngalawan Portugal. Tatandang kaduana dilumangsungkeun dina poé Jumaah anu nepungkeun tim Wales jeung Bélgia. Tatandang katiluna dina poé Saptu anu nepungkeun Jérman ngalawan Itali. Anu panungtungan dilaksanakeun dina poé Ahad anu manggihkeun Perancis jeung Islandia.

Gambar tatandang dina undakan katilu (parapatfinal) Piala Eropa 2016
Gambar tatandang dina undakan katilu (parapatfinal) Piala Eropa 2016

Anu meunang dina tatandang undakan katilu ieu bakal asup kana undakan kaopatna atawa undakan semifinal Piala Éropa 2016.

(Gambar meunang nginjeum ti Kompas)