Perancis, Jawara Méngbal di Rusia


Réngsé ogé kajawaraan méngbal di Rusia. Sanggeus tatandang panungtungan anu dilumangsungkeun peuting tadi. Piala Dunia 2018 di Rusia dipungkas ku tatandang undakan puncer pikeun nangtukeun nagri mana anu jadi jawarana. Dua nagri anu asup kana undakan puncer silih éléhkeun: Perancis jeung Kroasia.

Hasilna?

Tatandang antara Perancis ngalawan Kroasia

Nagri Perancis bisa jadi jawara Piala Dunia pikeun kadua kalina sanggeus bisa ngéléhkeun nagri Kroasia kalawan gulna 4-2. Tatandang antara dua nagri asal Éropah ieu lumangsung kalawan campuh. Duanana papada hayang bisa ngéléhkeun lawanna. Papada hayang nyitak gul ka gawang lawanna. Pamaén anu dipaénkeun ku dua nagri mangrupakeun pamaén anu aralus wungkul sakumaha pamaén anu ngiluan dina tatandang undakan semifinal.

Babak kahiji, nincak menit ka-18 nagri Perancis bisa ngabuskeun bal ka gawang nagri Kroasia sanggeus tajongan Antoine Griezmann dihéden ku Mario Mandzukic. Hanjakal héden éta téh nyababkeun bal asup ka gawangna sorangan. Teu lila ti harita nagri Kroasia bisa nyarua jumlah gul sanggeus tajongan Ivan Perisic asup ka gawang Hugo Lloris. Teu lila ogé, nagri Perancis bisa nyitak gul deui ka gawang Kroasia sanggeus meunangkeun pinalti anu ditajong ku Antoine Griezmann. 2-1 teu robah nepikeun ka réngsé babak kahiji.

Nincak babak kadua, nagri Perancis bisa nambahan deui gul ngaliwatan Paul Pogba reujeung Kylian Mbappe. Gulna jadi 4-1. Saméméh tatandang réngsé, nagri Kroasia bisa nyitak gul ngaliwatan Mario Mandzukic sanggeus meunangkeun bal tajongan kiper Perancis. Nepikeun ka tatandang réngsé, gul teu roba tetep 4-2 pikeun Perancis.

Ku hasil ieu, nagri Perancis bisa meunangkeun Piala Dunia pikeun kadua kalina. Jawara Piala Dunia kahijina dimeunangkeun dina taun 1998 anu dilumangsungkeun di nagrina sorangan.

Advertisements

Béntang Kameumeut Real Madrid Mawa Nagrina Asup Undakan Parapatfinal


Dua urang béntang lapangan kleub Real Madrid mawa nagrina séwang-séwangan pikeun asup kana undakan Parapatfinal Piala Éropa 2016. Dua tatandang anu dilumangsungkeun dina peuting tadi, dieusi ku sawatara béntang lapangan anu asalna ti kleub Real Madrid. Dua béntang anu pangnyongcolangna, ngeusi patandang anu meunang dina éta tatandang.

Tatandang antara Wales ngalawan Irlandia Kaler anu dimeunangkeun ku Wales
Tatandang antara Wales ngalawan Irlandia Kaler anu dimeunangkeun ku Wales

Tatandang munggaran dina undakan kadua nepungkeun tim Wales reujeung Irlandia Kalér. Dua patandang ieu mangrupakeun patandang anyar dina kajawaraan Piala Éropa, dina harti tacan pernah ngiluan atawa asup kana kajawaraan Piala Éropa saméméhna. Tim Wales anu diiluan ku béntang Real Madrid, Gareth Bale ahirna mah bisa ngéléhkeun Irlandia Kalér kalawan gul anu dicitakna ngan hiji. Gul pikeun ngaloloskeun Wales kana undakan saterusna dicitak ku pamaen Irlandia Kalér, Gareth McAuley anu méngkolkeun bal tina tajongan pamaén Wales ka gawangna sorangan.

Tatandang kadua nepungkeun tim Portugal ngalawan tim Kroasia. Tim Portugal diiluan ku béntang lapangan Real Madrid, Cristiano Ronaldo. Hasilna, Portugal bisa ngéléhkeun Kroasia kalawan gulna saruan, 1-0. Gulna dicitak ku Ricardo Quaresma anu ngasupkeun bal hasil téngtogan kiper Kroasia di hareupeun gawangna.

Tatandang antara Portugal jeung Kroasia
Tatandang antara Portugal jeung Kroasia

Tim Portugal teu bisa sagawayahna ngéléhkeun tim Kroasia. Dina waktu normal, taya gul anu bisa dicitak. Anu antukna diteruskeun kana babak tambahan. Babak tambahan ampir béak kakara gul bisa dicitak.

(Potret meunang nginjeum ti internet)

Tatandang Grup D, Kroasia jeung Spanyol Sarua Meunang


Tatandang munggaran Piala Éropa 2016 di Grup D nepungkeun tim Kroasia jeung Turki. Tatandang kaduana, nepungkeun Spanyol jeung Républik Céko. Hasilna, Kroasia jeung Spanyol bisa ngéléhkeun lawanna séwang-séwangan. Gulna, sarua ngan ukur meunang sagul (1-0).

Tatandang antara Kroasia ngalawan Turki
Tatandang antara Kroasia ngalawan Turki

Tatandang antara Kroasia ngalawan Turki dilumangsungkeun di Parc des Princes dayeuh Paris dina poé Ahad. Kroasia meunang sanggeus nyitak gul ngaliwatan pamaén tengahna, Luka Modric. Pamaén asal Real Madrid ieu bisa nyitak gul kalawan alus sanggeus najong bal ti tempat anu kawilang jauh ti gawang Turki. Gulna dicitak dina menit ka-41.

Tatandang antara Kroasia ngalawan Turki sabenerna mah bisa waé gedeg sabab kaduanya mibanda kasempetan anu ampir sarua. Ngan Kroasia mibanda kasempetan leuwih loba tibatan Turki.

Tatandang kadua antara Spanyol ngalawan Turki dilumangsungkeun di Municipal Stade de Toulouse dina poé Senén mangkukna. Hasilna sarua reujeung tatandang kahiji, 1-0. Gul Spanyol dicitak ku Gerard Pique dina menit ka-87. Dina ieu tatandang, sabenerna Spanyol ngawasa jalanna méngbal, boh babak kahiji atawa babak kadua. Hanjakal, kapinunjulan pamaén tukang Républik Céko bisa ngungkulan sagala panarajang pamaén Spanyol.

(Gambar meunang nginjeum ti Kompas)

Tatandang Munggaran, Brasil Ngéléhkeun Kroasia


Piala Dunia 2014 dibuka kalawan ngalumangsungkeun tatandang munggaran antara tim méngbal anu boga hajat, nagri Brasil ngalawan Kroasia di grup A. Tatandang anu dilumangsungkeun di stadion Arena Corinthians dayeuh Sao Paulo ieu ahirna mah bisa dimeunangkeun ku tim Brasil. Sanajan bisa meunang, mimitina mah Brasil masih kénéh bisa dilayanan ku tim Kroasia. Malahan, tim Kroasia bisa ngagulkeun ti heula. Ngaliwatan panarajang ti sisi katuhu Brasil dina menit kasawelas, Olic ngirimkeun bal ka hareupeun gul Brasil. Bal ahirna asup kana gawang ngaliwatan suku Marcelo. Jadi waé gulna téh bunuh diri.

Tim Brasil ngalawan tim Kroasia
Tim Brasil ngalawan tim Kroasia

Manjing menit ka-30, tim Brasil kakara bisa nyaruakeun gul ngaliwatan béntangna nyaéta Neymar. Tajonganana ti saluareun kotak pinalti bisa asup kana gawang Kroasia.

Dina babak kadua, Kroasia bisa leuwih ngalayanan tim Brasil. Atuh, pamaén Brasil susah pisan pikeun ngagulkeun deui. Alhasil, dua tim bisa imbang silih serang.

Ngan ahirna mah, tim Brasil anu bisa nambahan gul ngaliwatan Neymar. Neymar bisa nambahan gul ngaliwatan pinalti sanggeus Fred dikenyang sina labuh ku Lovren.

-