Samoja


Kembang samoja

Kedalna asih na bulan pinuh mamanis
Hiji jangji pasini nu resmi ning wanci
Mangsa samoja jongjon kembangan, duh geulis
Langit lénglang angin rintih dina ati, aduh

Lalakon lawas na bulan pinuh katineung
Aya jangji pasini nu teu ngajadi
Mangsa samoja geus ngarangrangan, duh ieung
Langit angkeub samagaha dina ati, aduh

Ayeuna kantun waasna, Eulis
Lalakon katukang ditéang na panglamunan
Kamari nu pamit, kamari nu pamit
Datang deui kalangkang

Ayeuna kantun waasna jungjunan
Lalakon nu pegat disambungna ku ciptaan
Kamari geus leungit, kamari nu leungit
Rék lebeng mo deui datang

(Rumpaka Lagu Samoja kenging Mang Koko)