Perancis, Jawara Méngbal di Rusia


Réngsé ogé kajawaraan méngbal di Rusia. Sanggeus tatandang panungtungan anu dilumangsungkeun peuting tadi. Piala Dunia 2018 di Rusia dipungkas ku tatandang undakan puncer pikeun nangtukeun nagri mana anu jadi jawarana. Dua nagri anu asup kana undakan puncer silih éléhkeun: Perancis jeung Kroasia.

Hasilna?

Tatandang antara Perancis ngalawan Kroasia

Nagri Perancis bisa jadi jawara Piala Dunia pikeun kadua kalina sanggeus bisa ngéléhkeun nagri Kroasia kalawan gulna 4-2. Tatandang antara dua nagri asal Éropah ieu lumangsung kalawan campuh. Duanana papada hayang bisa ngéléhkeun lawanna. Papada hayang nyitak gul ka gawang lawanna. Pamaén anu dipaénkeun ku dua nagri mangrupakeun pamaén anu aralus wungkul sakumaha pamaén anu ngiluan dina tatandang undakan semifinal.

Babak kahiji, nincak menit ka-18 nagri Perancis bisa ngabuskeun bal ka gawang nagri Kroasia sanggeus tajongan Antoine Griezmann dihéden ku Mario Mandzukic. Hanjakal héden éta téh nyababkeun bal asup ka gawangna sorangan. Teu lila ti harita nagri Kroasia bisa nyarua jumlah gul sanggeus tajongan Ivan Perisic asup ka gawang Hugo Lloris. Teu lila ogé, nagri Perancis bisa nyitak gul deui ka gawang Kroasia sanggeus meunangkeun pinalti anu ditajong ku Antoine Griezmann. 2-1 teu robah nepikeun ka réngsé babak kahiji.

Nincak babak kadua, nagri Perancis bisa nambahan deui gul ngaliwatan Paul Pogba reujeung Kylian Mbappe. Gulna jadi 4-1. Saméméh tatandang réngsé, nagri Kroasia bisa nyitak gul ngaliwatan Mario Mandzukic sanggeus meunangkeun bal tajongan kiper Perancis. Nepikeun ka tatandang réngsé, gul teu roba tetep 4-2 pikeun Perancis.

Ku hasil ieu, nagri Perancis bisa meunangkeun Piala Dunia pikeun kadua kalina. Jawara Piala Dunia kahijina dimeunangkeun dina taun 1998 anu dilumangsungkeun di nagrina sorangan.

Advertisements

Milih Wawakil Padaratan Amérika Kalér ka Piala Dunia 2014


Wewengkon padaratan Amérika Kalér sabenerna mah henteu ngan ukur ngawengku nagara-nagara anu aya di Amérika Kalér wungkul, tapi ditambah ku nagara anu aya di wewengkon Amérika Tengah jeung sagara Karibia. Malahan mah katambahan deui ku nagara anu kasingsalkeun ti Amérika Kidul saperti Suriname jeung Guyana. Teu anéh lamun jumlah nagara anu aya di wewengkon ieu kawilang loba, 35 nagara. Tina jumlah nagara anu 35, kabéhanana ngiluan kana babak kualifikasi Piala Dunia 2014.

Pikeun marebutkeun hancengan anu tilu satengah nagara di Piala Dunia 2014, FIFA geus nyieun aturan pikeun ngalumangsungkeun babak kualifikasi. Babak kualifikasi di wewengkon Amérika Kalér ieu dibagi jadi opat undakan.

Dina tatandang di undakan kahiji, diiluan ku sapuluh nagara anu miboga réngking FIFA panghandapna. Sapuluh tim ngalumangsungkeun tatandang hiji lawan hiji dina dua kali tatandang. Anu meunang dina dua kali tatandang éta baris asup kana tatandang di undakan kadua.

Dina undakan kaduana, lima nagara anu meunang di undakan kahiji dihijikeun reujeung 19 nagara anu miboga réngking leuwih hadé tibatan sapuluh nagara anu di undakan kahiji. Atuh, dina undakan kadua ieu, jumlah pamilonna jadi 24 nagara. 24 nagara ieu baris dibagi jadi genep grup anu dieusi ku opat nagara séwang. Sanggeus ngalumangsungkeun tatandang dina format kompetisi penuh, unggal jawara grup anu jumlahna genep nagara, langsung asup kana undakan katilu.

Undakan katilu diiluan ku genep nagara anu lulus ti undakan kadua ditambah genep nagara anu langsung asup undakan katilu kusabab réngking FIFA-na leuwih hadé tibatan nagara anu aya di undakan kadua. 12 nagara anu aya dina undakan katilu ieu dibagi kana tilu grup anu dieusi ku opat nagara séwang. Sanggeus ngaréngsékeun tatandang kalawan format kompetisi penuh, jawara kahiji jeung jawara kadua unggal grup lulus ka undakan kaopat.

Nagara anu kaasup ka wewengkon Amerika Kaler
Nagara anu kaasup ka wewengkon Amerika Kaler

Dina undakan kaopat, nagara anu miluan téh ngan ukur genep nagara hasil tina undakan katilu wungkul. Genep nagara ieu baris dihijikeun dina hiji grup kalawan ngalumangsungkeun tatandang kompetisi penuh. Di ahir tatandangna bakal katempo nagara mana anu jadi jawarana. Nagara anu jadi jawara kahiji nepikeun ka tilu dina ieu undakan, baris langsung asup ka babak puncer Piala Dunian 2014 di Brasil. Sedengkeun nagara anu jadi jawara kaopatna kudu ngalumangsungkeun tatandang ngalawan nagara wawakil ti sagara Oséania pikeun marebutkeun hiji hancengan sésa.

Nagara anu tatandang di Undakan Kahiji:

  • Montserrat – Belize
  • Anguilla – Republik Dominika
  • Pulo Virgin Amerika – Pulo Virgin Inggris
  • Aruba – St. Lucia
  • Bahama – Pulo Turks and Caicos

Nagara anu Tatandang Langsung di Undakan Kadua:

  • El Salvador
  • Suriname
  • Pulo Cayman
  • Guyana
  • Trinidad & Tobado
  • Bermuda
  • Barbados
  • Panama
  • Nikaragua
  • Kanada
  • Puerto Riko
  • St. Kitts & Nevis
  • Guatemala
  • St. Vincent/Grenadaines
  • Grenada
  • Antigua & Barbuda
  • Haiti
  • Curacao

Nagara anu Tatandang Langsung di Undakan Katilu:

  • Amerika Serikat
  • Jamaika
  • Meksiko
  • Kostarika
  • Honduras
  • Kuba

Milih Wawakil Padaratan Asia ka Piala Dunia 2014


Ti wewengkon padaratan Asia, aya 46 nagara anu asup jadi anggahota konfederasi Asia (AFC). Pikeun milih wawakilna dina Piala Dunia 2014 anu jumlahna opat satengah nagara, nagara-nagara anu aya di wewengkon padaratan Asia kudu ngiluan kana sababaraha undak tatandang. Jumlah undakanana gumantung kana alus goréngna éta nagara dina hal méngbalna (réngking FIFA). Anu alus méngbalna, tangtuna leuwih saeutik undakan anu kudu diliwatanana. Anu leuwih goréng, tangtuna kudu mapay ti handap kénéh. Tina 46 nagara anggahota, anu daptar jadi pamilon dina babak kualifikasi téh ngan ukur 43 nagara. Tilu nagara mah henteu daptar, nyaéta nagara Bhutan, Brunéi jeung Guam.

Nagara anu aya di wewengkon padaratan Asia
Nagara anu aya di wewengkon padaratan Asia

Pikeun milih wawakilna, padaratan Asia ngayakeun tatandang nepikeun ka lima undak. Undakan munggaran dieusi ku 16 nagara anu miboga réngking FIFA (réngking dina taun 2010) panghandapna. Ka-16 nagara éta bakal tatandang hiji lawan hiji dina dua kali tatandang. Dalapan nagara anu meunang bakal asup kana tatandang undakan kadua.

Dina tatandang undakan kaduana, dalapan nagara anu meunang dina undakan kahiji baris dihijikeun reujeung 22 nagara anu miboga réngking FIFA leuwih hadé tibatan 16 nagara anu tatandang dina undakan kahiji. 30 nagara ieu baris tatandang hiji lawan hiji deui dina dua kali maén. 15 nagara anu meunangna baris asup kana tatandang undakan katilu.

Dina tatandang undakan katilu ieu, 15 nagara anu meunang dina undakan kadua dihijikeun reujeung lima nagara anu langsung asup ka undakan katilu. 20 nagara pangeusi undakan katilu ieu, baris dibagi jadi lima grup anu unggal grupna dieusi ku opat nagara. Unggal nagara anu aya dina grup ieu baris tatanding dina format kompetisi penuh. Dina panungtunganana, sanggeus sakabéh nagara ngalumangsungkeun tatandang, baris katohiyan nagara mana anu jadi jawara grup jeung jawara kaduana. Nagara anu jadi jawara kahiji jeung jawara kadua unggal grup baris asup kana undakan kaopat. Jadi aya sapuluh nagara anu asup kana tatandang di undakan kaopat.

Dina tatandang undakan kaopat, sapuluh nagara baris dibagi jadi dua grup. Unggal grupna dieusi ku lima nagara anu ngalakukeun tatandang kalawan formatna kompetisi penuh. Di panungtunganana, anu jadi jawara kahiji jeung jawara kadua unggal grup (aya opat nagara) baris asup kana babak puncer Piala Dunia 2014 di Brasil. Sedengkeun dua nagara anu jadi jawara katiluna kudu tatandang deui dina undakan kegenep pikeun nangtukeun nagara kalima anu baris marebutkeun jatah satengah nagara. Anu meunang dina tatandang undakan kagenep ieu, baris tatandang deui ngalawan jawara kalima ti padaratan Amérika Kidul pikeun nangtukeun saha anu baris asup kana babak puncer Piala Dunai 2014 sésana.

Tatatandang dina Undakan Kahiji:

  1. Malaysia – Taiwan
  2. Pakistan – Bangladés
  3. Laos – Kamboja
  4. Pilipin – Sri Lanka
  5. Paléstina -Apghanistan
  6. Makau – Viétnam
  7. Timor Lésté – Népal
  8. Myanmar – Mongolia

Tatandang dina Undakan Kadua:

  1. Apghanistan/Paléstina – Thailand
  2. Bangladés/Pakistan – Libanon
  3. Kamboja/Laos – Cina
  4. Indonésia – Turkmenistan
  5. Sri Lanka/Pilipin – Kuwait
  6. Mongolia/Myanmar – Oman
  7. Hong Kong – Saudi Arabia
  8. Maladéwa – Iran
  9. Tajikistan – Siria
  10. Viétnam/Makau – Katar
  11. Yaman – Irak
  12. Malaysia/Taiwan – Singapur
  13. Kirgizstan – Uzbekistan
  14. India – Uni Émirat Arab
  15. Népal/Timor Leste – Yordan

Nagara anu Langsung Asup Undakan Katilu:

  1. Bahrain
  2. Koréa Kidul
  3. Jepang
  4. Ostrali
  5. Koréa Kalér

Piala Dunia 2014, Mulang deui ka Amérika Kidul


Satutasna ngalalana ka sababaraha wewengkon, ahirna mah Piala Dunia téh dilumangsungkeun deui di wewengkon Amérika Kidul. Geus lumayan lila Piala Dunia henteu dilumangsungkeun di wewengkon ieu. Padahal mimitina mah apanan osok piligenti antara wewengkon Éropah reujeung wewengkon Amérika Kidul. Tapi, kétang, pernah kaselang heula ku Amérika Kalér dina taun 1970 anu perenahna di nagri Meksiko.

Simbul Piala Dunia 2014 Brasil
Simbul Piala Dunia 2014 Brasil

Piala Dunia panungtungan anu dilumangsungkeun di wewengkon Amérika Kidul téh nyaéta taun 1978 di nagri Argéntina. Satutasna éta mah Piala Dunia téh ngambah ka saban wewengkon: kungsi dilumangsungkeun di wewengkon Amérika Kalér (Méksiko 1986 jeung Amérika Serikat 1994), Éropah (Spanyol 1982, Italia 1990, Perancis 1998, Jérman 2006), Asia (Koréa Kidul/Jepang 2002) jeung Aprika Kidul (2010). Kakara dina entragan Piala Dunia ka-20 dina taun 2014 dilumangsungkeun deui di wewengkon Amérika Kidul anu perenahna di nagri Brasil.

Nagri Brasil baris jadi sohibul hajat Piala Dunia pikeun kadua kalina. Saméméhna nagri Brasil pernah ngalaksanakeun Piala Dunia dina taun 1950. Ka hareupna mah sakumaha rarancang anu geus ditangtukeun ku FIFA sakalu pupuhu organisasi méngbal anu ngawengku sakuliah dunya, anu jadi sohibul hajat Piala Dunia téh baris mapay ka unggal wewengkon padaratan: Éropah, Asia, Aprika, Amérika Kalér katut Amérika Kidul.

Sakumaha Piala Dunia saméméhna, pikeun jadi pamilon dina Piala Dunia 2014 ieu unggal nagri anu jadi anggahota FIFA kudu ngaliwatan babak kualifikasi. Salian ti nagri Brasil, sakabéh nagri kudu ngiluan babak kualifikasi heula pikeun nangtukeun nagri mana waé anu bisa asup ka babak puncer (final) Piala Dunia 2014. Nagri Brasil salaku sohibul hajat mah henteu kudu ngiluan babak kualifikasi, kusabab langsung lulus ka babak puncer. Jumlah pamilon anu ngiluan babak puncer ieu jumlahna 32 nagri kaasup Brasil. 31 nagri séjénna sumebar ti unggal padaratan.

(Gambar meunang nginjeum ti WIkipedia)

Marebutkeun Tikét Lalajo Mengbal Piala Dunia di Brasil ti Listerine


Lila kénéh lumangsungna mah, da dilumangsungkeunana ogé kira-kira tengah taun 2014. Jeung jauh kacida tempatna téh, di wewengkon béh kiduleun nagri Amerika, nyaéta di nagri Brasil. Heueuh kituna mah lila kénéh, tapi ngeunaan sasayagaanana mah apanan geus ti béh ditu mula. Nagri Brasil salaku anu boga hajatna, geus tatan-tatan di béh ditu kénéh nyayagakeun sagala rupa anu dibutuhkeun. Malahan pikeun mapag dilumangsungkeunana éta kajawaraan téh apanan kamari-kamari mah geus dilumangsungkeun kajawaraan Piala Konfederasi.

Listerine Indonesia
Listerine Indonesia

Atuh pikeun anu mikaresep kana méngbal mah, sigana moal tinggaleun. Unggal opat taun sakali apanan kacida raména, naha dina warta radio atawa tipi atawa koran ngeunaan kajawaraan Piala Dunia téh. Unggal jalma anu resep kana méngbal miboga cekelan nagri séwang-séwangan anu dijagokeun jadi jawara. Anu bisa ngadongdon ka tempat dilumangsungkeunana, henteu nolih kana tempat anu jauh jeung waragad anu kacida gedéna. Kangaranan geus resep mah, jauh dijugjug anggang ditéang. Ari pikeun anu henteu cukup waragad mah, ku jalan lalajo dina tipi ogé kacida gumbirana. Dina émprona lumangsung tatandang, ampir unggal peuting ngadon manco di hareupeun tipi, mélaan kurang saré.

Balik deui kana Piala Dunia anu baris dilumangsungkeun di nagri Brasil. Anu hayang lalajo langsung sanajan henteu boga atawa waragadna kurang, aya kasempetan anu alus pikeun meunangkeun tikét lalajo sacara langsung di stadion anu aya di Brasil. Cara bisa ngiluan saémbara ‘Tantangan 21 Hari Yang Mengubah Hidupmu’. Dina ieu saémbara, bakal dipilih 11 urang anu baris meunangkeun tikét lalajo di Brasil. Sayémbara anu dilumangsungkeun ku Listerine ieu merlukeun waktu salila 21 pikeun unggal jalma anu ngiluanana. Unggal poéna baris aya latihan anu kudu diiluan ku anu ngiluan tangtangan ieu.

Pikeun ngiluanana, gampang. Kari asup waé ka loka Listerine Indonesia. Di éta loka dijéntrékeun kumaha carana pikeun ngiluan saémbara. Gancangan ngiluan, saha anu apal bisa meunangkeun tikét lalajo méngbal Piala Dunia di Brasil.