Ngitung Jumlah Poé dina Sabulan Ngagunakeun PHP


Dina nyieun aplikasi atawa program dina wéb, kadang merlukeun jumlah sabaraha poé unggal bulan dina sataun. Hususna bulan-bulan dina pananggalan Maséhi, pananggalan anu kalénderna dipaké dina aplikasi komputer. Jumlah poé anu béda-béda téh teu kudu susah-susah ngitung deui (kitu kahayangna mah). Nempo kanyataanana, jumlah poé unggal bulan dina bulan-bulan Masehi téh béda-béda. Aya anu jumlahna 28 poé, aya anu 29 poé, aya anu 30 poé, nepikeun ka anu 31 poé. Jumlah poé anu béda-béda téh gumantung kana ngaran bulan katut taunna.

Jumlah poe dina sababaraha bulan Masehi

Nurutkeun tulisan anu dipedalankeun di dunya internét, aya sababaraha cara pikeun manggihan jumlah poé ieu. Salasahijina maké fungsi:

date(‘t’);

Ieu fungsi utamana pikeun mikanyaho jumlah poé dina bulan jeung taun anu keur dilakonan. Sanajan kitu, bisa ogé digunakeun pikeun mikanyaho jumlah poé dina bulan katut taun anu séjénna. Carana, tinggal nyelapkeun paraméter bulan jeung taun disatukangeun éta paraméter t. Contona waé:

date(‘t’, strtotime(‘2012-12-1’);

Salian ti ngagunkeun fungsi date(‘t’), aya fungsi séjén anu bisa dipaké nyaéta fungsi cal_days_in_month(CAL_GREGORIAN, ngaran_bulan, ngaran_taun). Contona:

cal_days_in_month(CAL_GREGORIAN, 12, 2012);

Terus aya ogé fungsi anu kapanggih ti lambaran Get the number of days in a month with PHP

function days_in_month($year, $month) {
return round((mktime(0, 0, 0, $month+1, 1, $year) – mktime(0, 0, 0, $month, 1, $year)) / 86400);
}

Aya deui fungsi anu kapanggih di alamat PHP Function – Calculating Days In A Month

function get_days_in_month($month, $year) {
return $month == 2 ? ($year % 4 ? 28 : ($year % 100 ? 29 : ($year %400 ? 28 : 29))) : (($month – 1) % 7 % 2 ? 30 : 31);
}

Mangpaat Paraméter PConnect dina CodeIgniter


Salasahiji pilihan pikeun nyambungkeun aplikasi PHP maké CodeIgniter kana databés téh nyaéta PConnect. Dina konpigurasi databés (payil database.php), aya paraméter PConnect anu bisa diatur jadi TRUE atawa FALSE. Ieu pilihan atawa paraméter téh bisa jadi aya mangpaatna pikeun aplikasi PHP anu keur dijieun. Ngan salian ti aya mangpaatna, bisa jadi ogé henteu aya mangpaatna. Naha arék ditetepkeun sina jadi TRUE atawa FALSE, duanana miboga mangpaat jeung madorotna. Ngan kudu apal naon waé mangpaat jeung madorotna.

Parameter sambungan databes dina payil database.php

Nurutkeun manual CodeIgniter, PConnect téh mangrupakeun singketan tina Persistent Connection. Sedengkeun persistent connection, nurutkeun manual PHP mangrupakeun hiji sambungan SQL anu henteu dipegatkeun sanajan paréntah SQL geus dilaksanakeun kalawan sampurna. Nalika Persistent Connection dipénta, PHP bakal mariksa heula naha geus aya sambungan anu sarua saméméhna atawa acan. Lamun geus aya, mangka PHP bakal ngagunakeun éta sambungan anu geus aya pikeun nyambungkeun kana databés. Lamun euweuh, mangka PHP bakal nyieun sambungan anyar. Anu dipimaksud ku sambungan anu ‘sarua’ téh nyaéta sambungan anu dijieun ka host anu sarua kalawan sandi asma jeung sandi kecap anu sarua ogé.

Ngeunaan ngatur PConnect dina CodeIgniter, naha kudu dijadikeun TRUE atawa FALSE, aya hiji wangkongan atawa ngadu bako di StackOverFlow, ngatur PConnect dina CodeIgniter jadi TRUE/FALSE aya untung-rugina. Dina éta lambaran ngadu bako dijelaskeun cenah aya alusna lamun ngatur paraméter PConnect jadi TRUE lamun:

  • Miboga hardware pangladén wéb jeung databés anu alus dina ngajalankeunana,
  • Databés katut pangladén wéb anu geus di-tune kalawan bener,
  • Miboga hardware paranti nyoba anu sarua reujeung hardware anu bakal dipaké nalika jalan,
  • Jeung miboga anggapan yén performance jadi masalah anu disababkeun ku lilana waktu sambungan databés.

Ngan kudu apal heula, ngatur PConnect kana TRUE, bakal nyababkeun:

  • Bug kusabab lobana sambungan anu teu kapariksa jeung teu kanyahoan (jadi waé loba teuing sambungan).
  • Sambungan databés bakal ngaleuwihan batesan anu ditangtukeun.
  • Cara gawé databés bakal nyirorot kusabab lobana sambungan anu nganggur teu kapaké.
  • Jadi bug kusabab sambungan loba anu teu kapaké jeung aplikasi henteu apaleun.

Tapi alusna PConnect diatur jadi TRUE téh nyaéta bisa ngurangan waktu pikeun nyieun sambungan mimiti kana databaés, dina harti bisa gancang nyambung kana databés.

Kitu cenah….

Bekel Lamun Anclub Nyieun Program Aplikasi dina Wéb


Saméméh asup atawa anclub kana widang aplikasi atawa program aplikasi wéb, kudu apal heula naon waé bekel anu kudu dipiboga. Sahanteuna apal heula kudu bisa kana naon waé supaya dina prak-prakanana nyieun aplikasi wéb téh henteu bingung teuing.
Aya sababaraha hal anu kudu jadi bekel supaya bisa anclub kana nyieun aplikasi wéb, diantarana waé html, css, javascript, CGI, PHP jeung ASP. Diantara anu aya teu kudu kabéhanana dileukeunan supaya bisa. Bisa waé ngan ukur sawaréhna, gumantung kana pangaresep jeung pangabutuh.

Supaya gampangna mah, sakumaha wangunanana, aplikasi wéb kabagi dua nyaéta aplikasi anu jalan di penyungsi wéb (client) reujeung aplikasi anu jalan dina pangladén wéb. Jadi dina nyieun aplikasi wéb kudu apal jeung ngawasaan bekel eukeur nyieun aplikasi anu jalan di panyungsi wéb reujeung anu jalan di pangladén wéb. Bagéan aplikasi anu jalan di panyungi wéb nyaéta html, css jeung javascript. Sedengkeun aplikasi anu jalan di pangladén wéb nyaéta CGI, PHP jeung ASP.

Anu panghandapna atawa dadasar pikeun nyieun aplikasi wéb mah nyaéta html. Unggal payil anu  arék diancokeun ka anu keur nyungsi wéb diwangun ku mangrupa dokumén html. Jadi kudu apal wangunan dokumen html heula dina nyieun aplikasi wéb. Dokumén html diwangun ku pananda atawa tag-tag html. Unggal pananda miboga mangpaat masing-masing, pikeun ngawangun ancoan atawa pidangan anu bakal diancokeun dina panyungsi wéb.

Ancoan aplikasi web

Sanggeus apal jeung ngawasaan html, kakara nincak kana bagéan css. CSS mah biasana dipaké pikeun ngaalusan aancoan dokumén html. Supaya dokumén html anu diancokeun téh matak pikaresepeun, dialusan maké css. Terus javascript mangrupakeun panambah anu bisa dipaké pikeun nambahan kamonésan kana dokumén html supaya bisa nangkep kaayaan atawa kajadian, saperti kumaha lamun anu keur nyungsi wéb téh neken hiji kenop atawa ngagerakeun panuduh mouse.

Ngeunaan basa CGI, PHP jeung ASP, biasana mah pilihan. Arék dikawasaan kabéhanana atawa milih salasahijina. Hal gumantung kana jinis pangladén wébna, naha maké basa PHP, CGI atawa ASP. Lamun nyieun aplikasi wéb anu pangladén wébna maké basa PHP, kudu apal kana basa PHP jeung kudu maké PHP dina nyieun aplikasina. Pon kitu deui reujeung CGI atawa ASP. Kaayeunakeun mah, CGI jarang dipaké. Anu osok dipaké téh nyaéta PHP jeung ASP.

Saméméh Nyieun Program dina Web


Dina nyieun program anu rupana web, diperlukeun pakakas dina rupa pangladén web (web server). Pangladén web ieu téh mangrupakeun kompiuter anu diteundeunan program pangladén web (web server), anu gunana pikeun ngokolakeun data katut pidangan (lambaran web) ancoeun anu dipénta ku anu keur nyungsi lambaran web dina panyungsi internét. Biasana mah pangladén web téh diwangun ku kompiuter anu alus (canggih) jeung husus anu disebutna kompiuter server.

Ngan lamun pikeun ngawangun atawa nyieun program web mah bisa maké kompiuter biasa (desktop atawa léptop) anu diteundeunan program pangladén web. Jadi dina nyieun program web-na mah teu kudu maké kompiuter server sacara langsung. Kompiuter anu biasa dipaké pikeun nyungsi internét ogé bisa diteundeunan program pangladén web, terus diakses ku kompiuter éta. Hal ieu téh supaya gampang dina ngarobah program anu keur diwangunna. Salian ti éta, ogé gancang diaksésna dina panyungsi internét (kusabab program web jeung panyungsi internétna ngahiji dina hiji kompiuter). Lamun nyieun program webna geus réngsé, kakara program web anu dijieun dipindahkeun ka pangladén web anu nyata atawa anu bener.

Logo XAMPP

Supaya kompiuter anu biasa dipaké bisa digunakeun jadi pangladén web, éta kompiuter téh kudu diteundeunan atawa dipasang program pangladén web. Program pangladén web anu remen dipaké nyaéta Apache atawa IIS. Ngan anu bakal dicaritakeun jeung dipaké di dieu mah Apache wungkul. Apache dipilih kusabab Apache mah bisa diteundeun atawa dipasang dina Windows jeung dina Linux. Supaya gampang masangna, aya gémbolan program anu ngasupkeun Apache kana éta gémbolan ditambah ku program anu narjamahkeun script PHP katut databésna (MySQL) nyaéta XAMPP (pikeun dina Windows) atawa LAMPP (pikeun dipasang dina Linux).
Pikeun masang XAMPP atawa LAMPP, undeur heula programna tina loka ApacheFriends. Sanggeus diundeur, terus dipasang dina kompiuter anu arék dijadikeun pangladén web.

Mikawanoh CodeIgniter, Rangkay Gawé (Framework) Paranti Nyieun Program dina PHP


CodeIgniter téh bisa disebut rangkay gawé pikeun nyieun aplikasi anu didadasaran basa PHP. Jadi CodeIgniter bisa dipaké pikeun nyieun aplikasi dina loka atawa wéb (leuwih jelasna mah nyieun situs wéb). CodeIgniter miboga tujuan supaya dina nyieun aplikasi wéb téh gampang, henteu susah. CodeIgniter ditujukeun pikeun sing saha waé anu pagawéanana jadi tukang nyieun program dina PHP anu merlukeun cara-cara anu basajan tapi hasilna alus.

Loka CodeIgniter

Alusna CodeIgniter téh salasahijina kusabab lengkep dokumentasina (buku rusdina). Jadi lamun hayang diajar CodeIgniter kacida gampangna, da lengkepna catetan anu ngeunaan CodeIgniter anu disadiakeun ku anu ngaluarkeun CodeIgniterna.

CodeIgniter ditujukeun pikeun:

  1. Saha waé anu mikahayang rangkay gawé anu basajan.
  2. Saha waé anu mikabutuh hasil gawé anu alus.
  3. Saha waé anu mikabutuh neundeun loka dimana waé anu cocog reujeung sagala rupa pérsi PHP jeung rupa-rupa konpigurasi.
  4. Saha waé anu mikahayang rangkay gawé anu konpigurasina kacida basajanna (gampang).
  5. Saha waé anu mikahayang rangkay gawé anu teu kudu maké baris-baris parentah (command line).
  6. Saha waé anu mikahayang rangkay gawé anu bébas tina aturan ngeunaan tata cara nyieun program.
  7. Saha waé anu teu mikaresep pustaka monolitik anu gedé saperti PEAR.
  8. Saha waé anu embung lamun kudu diajar basa templating (sanajan kitu, ari paranti ngolah templating mah disadiakeun).
  9. Saha waé anu nyingkahan sagala anu pikasusaheun jeung ngarojong cara anu basajan.
  10. Saha waé anu merlukeun rangkay gawé anu jelas kusabab dokumentasina lengkep.

Pikeun anu mikabutuh inpo anu leuwih lengkep ngeunaan ieu rangkay gawé (framework) CodeIgniter katut dokuméntasina bisa ngundeur dina loka CodeIgniter.