FreeNew.Net, Loka Anu Nyadiakeun Rupa-rupa Program Haratis


FreeNew.net mangrupakeun salasahiji pangladén wéb anu nyadiakeun rupa-rupa program aplikasi kompiuter atawa pakakas anu kaasup haratis. Dina ieu loka disadiakeun rupa-rupa program aplikasi anu bisa diundeur kalawan teu kudu mayar alias haratis. Program aplikasi anu aya dina ieu loka dibagi kana tilu rupa katagori nyaéta katagori iPhone, Android, jeung Windows. Sakumaha ngaranna unggal katagori miboga hancengan sewang-sewangan. Program aplikasi anu asup kana katagori iPhone dieusi ku program-program husus pikeun kulawarga hénpon iPhone, sedengkeun Android pikeun pakakas kayaning hénpon anu diasupan ku Android. Ari katagori Windows ngawengku program aplikasi anu jalan dina komputer anu make Windows.

Ieu loka anu mimiti ngadeg dina taun 2010 téh dihususkeun pikeun ngumpulkeun sagala program atawa pakakas komputer anu pabalatak di dunya internét. Dina ieu loka disadiakeun program aplikasi komputer jeung program anu jalan dina rupa-rupa hénpon anu ngahaja dipilihan.

Loka atawa situs freenew.net

Pikeun anu merlukeun program aplikasi komputer atawa hénpon hususna iPhone atawa Android euweuh salahna pikeun ngalongok ieu loka. Ieu loka téh miboga alamat di http://www.freenew.net/.

Mangsa dilongok dina tanggal 9 Agustus 2011, jumlah program aplikasi haratis anu aya dina ieu loka téh kurang leuwih 21.871 program aplikasi Windows, 91 program aplikasi Android jeung 68 program aplikasi iPhone.

Freemake Video Downloader, Bisa Ngundeur Rupa-rupa Pidio


Naon atuh ari Freemake Video Downloader téh?

Nilik kana ngaranna mah teu jauh tina paranti ngundeur pidio ti internét. Freemake Video Downloader téh mangrupakeun pakakas pikeun ngundeur pidio ti internét anu lain ngan ukur ti situs YouTube wungkul sakumaha DVDVideoSoft Free Studio Manager.  Freemake Video Downloader bisa dipaké pikeun ngundeur pidio tina rupa-rupa situs anu nyadiakeun pidio di internét. Soalna situs anu nyadiakeun pidio téh lain ngan ukur YouTube wungkul, masih kénéh loba situs séjénna anu sahandapeun YouTube, saperti Vimeo, Metacafe nepikeun ka situs fésbuk (facebook).

Ngagunakeun ieu pakakas téh kacida gampangna, tinggal nyalin alamat pidio tina situs anu nyadiakeun pidio kana kotak alamat anu disadikeun tina jandéla Freemake Video Downloader terus pencét kenop Add. Freemake bisa apal kana jinis pidio kalawan otomatis, jeung méré nyaho pilihan anu bisa dipilih pikeun ngundeur jeung ngarobah éta pidio.

Freemake Video Downloader

Hiji kaunggulan Freemake Video Downloader teh nyaeta jandela anu disadiakeunana teh kacida sederhanana jeung gampang ngagunakeunana. Kenop anu disadiakeunna lumayan gedé kalawan gampang ngagunakeunana, ditambah ku pidio anu diundeur téh ditempokeun gambarna ditambah ayana data ngeunaan éta pidio: judulna, lilana éta pidio jeung gedéna éta pidio.

Kamonésan ieu pakakas téh diantarana waé:

  1. Pakakas anu haratis (gratis), jadi pikeun ngagunakeunana jeung ngapimilikna teu kudu mayar jeung teu kudu daptar.
  2. Bisa digunakeun leuwih ti 30 situs pidio diantarana waé YouTube, Facebook, MTV, MTV Music, Google Video, Dailymotion, Megavideo, Metacafe, Vimeo, Veoh, Break, Stupidvideos, Photobucket, Nicovideo.jp, MyVideo.de.
  3. Ngundeur jeung ngaroba pidio YouTube ngan ukur dua kali mencét kenop.
  4. Ngundeur pidio tina fésbuk.
  5. Ngajadikeun MP3 (sora) tina pidio YouTube, fésbuk jeung MTV.
  6. Ngarobah pidio jadi AVI.
  7. Ngundeur pidio HD jeung 4K, nyaéta bisa dipaké pikeun ngundeur pidio anu gambarna alus pisan.
  8. Nempo Video rusiah babaturan. Lamun hayang ngundeur pidio tina YouTube jeung fésbuk anu disumputkeun atawa dirusiahkeun ku babaturan dina éta situs, tinggal ngasupkeun data akun dina éta situs.

Lamun merlukeun ieu pakakas atawa program, bisa ngundeur ti situs freemake atawa klik di dieu.

Ngundeur Pidio tina Situs YouTube


Remen ngajajah dunya Youtube? Pasti resep néangan pidio anu aya di dunya Youtube.

Lamun hiji waktu resep kana hiji pidio, mangka tangtuna ogé hayang lamun éta pidio téh bisa diteundeun kana kompiuter (komputer maksudna mah). Soalna lamun hayang nongton deui éta pidio, lamun henteu diteundeun kana kompiuter mah tangtuna ogé kudu asup ka situs Youtube deui. Anu tangtuna ogé bakal lila deui lamun hayang nongton téh.

Jadi untungna lamun éta pidio anu geus jadi kalangenan téh disimpen kana kompiuter, tangtuna ogé gampang lamun hayang nyetélna deui.

Kumaha atuh carana supaya éta pidio téh bisa diteundeun kana kompiuter?

Sabenerna mah loba cara pikeun bisa neundeun pidio tina Youtube kana kompiuter téh. Bisa maké situs keepvid, bisa maké panambah dina browser firefox atawa maké program atawa pakakas husus. Anu arék dibéjérbéaskeun di dieu mah nyaéta ngundeur pidio tina Youtube maké pakakas bogana DVDVideoSoft Free Studio Manager.

Jandela Free YouTube Download pikeun ngundeur pidio tina situs YouTube

Cara ngundeur pidio tina Youtube maké DVDVideoSoft Free Studio Manager nyaéta:

  1. Sanggeus ngajalankeun program Free Studio Manager, pilih Katagori Internet dina jandéla poko.
  2. Saterusna mah bakal mucunghul pilihan anu aya dina katagori Internet. Pikeun ngundeur pidio tina Youtube pilih Free YouTube Download
  3. Tina jandéla Free YouTube Download anu mucunghul, eusikeun alamat pidio tina situs YouTube kana kotak gedé anu di luhur. Carana, salin heula alamat pidio tina browser terus pindahkeun kana éta kotak ku jalan mencét tombol Paste atawa klik katuhu tina mouse terus pilih Paste. Lamun hayang ngundeur pidio sakaligus leuwih ti hiji bisa, diasupkeun sababaraha alamat pidio tina Youtube. Sanggeus nyalin hiji alamat pidio, bisa nyalin deui alamat pidio anu séjénna dina kotak anu tadi.
  4. Sanggeus nyalin alamat pidio, tangtukeun ogé tempat neundeun pidio anu diundeur. Pikeun nangtukeunana aya dina kotak Output folder:, pikeun ngarobahna klik waé tombol Browse…. Sedengkeun pikeun ngarobah ngaran pidio anu diteundeun dina kompiuter bisa ngaliwatan tombol Output Name….
  5. Ulah poho ogé tangtukeun format pidio anu diteundeun dina komputer dina kotak Formats.
  6. Sanggeus cocok, bisa langsung ngundeur éta pidio ngaliwatan tombol Download. Tungguan waé ngundeurna nepikeun ka réngsé.
Eukeur ngundeur pidio

DVDVideoSoft Free Studio Manager, Pakakas Gratis pikeun Ngolah Audio Pidio


Perlu pakakas pikeun ngolah audio jeung pidio (video maksudna mah) dina komputer anu haratis (gratis maksudna mah)…?

Lamun jawabanana heueuh, aya hiji program pakakas anu kaicda lengkepna jeung gratis deuih. Ngaran eta pakakas teh DVDVideoSoft Free Studio Manager. Free Studio Manager mangrupakeun hiji pakakas (utilitas) atawa program dina komputer anu kacida lengkepna dina ngolah audio jeung pidio, kaasup ngundeur pidio tina situs Youtube kaluaran ti DVDVideoSoft.

Jandela Poko DVDVideoSoft Free Studio Manager

DVDVideoSoft Free Studio Manager ngagabungkeun leuwih ti 30 rupa pakakas paranti ngolah jeung ngarobah audio jeung pidio. Kabehanana dihijikeun dina hiji program. Dina program ieu dijerona aya pakakas pikeun ngundeur (download) jeung ngarubah pidio  YouTube kana pidio pikeun divais portabel (PSP, iPod, iPhone jeung anu sejenna), ngarobah alur sora tina pidio kana format lagu MP3, pidio kana format Flash, ngarobah pidio 3gp jeung rea-rea deui. Program ieu oge mawa pakakas pikeun nulis data kana CD atawa DVD jeung aplikasi pikeun nyedot musik tina CD Audio.

Dina jandela awal Free Studio Manager, aya opat rupa kategori anu bisa dipilih gumantung kana kabutuhan. Opatanana teh nyaeta: Internet, DVD & Video, MP3 & Audio, CD/DVD/BD. Opatanana dieusian ku pakakas anu aya hubunganana jeung judulna.

  • Katagori Internet digunakeun pikeun ngundeur pidio tina YouTube atawa video Flash ti internet terus diteundeun kana komputer jadi format anu dipikahayang.
  • Katagori DVD & Video aya hubunganana jeung pakakas pikeun ngarobah pidio tina hiji format kana format anu sejen, kaasup pikeun ngolah pidio anu gampang (sederhana). Dina katagori ieu oge aya pakakas pikeun ngarekam layar monitor komputer.
  • Katagori MP3 & Audio, nyaeta kumpulan pakakas pikeun ngolah sora, audio atawa lagu. Di jerona aya pakakas pikeun ngarobah format audio.
  • Katagori CD/DVD/BD, mangrupakeun kumpulan pakakas pikeun ngasupkeun audio atawa pidio kana CD atawa DVD.

Anu merlukeun ieu program bisa langsung ngundeur programna tina situs DVDVideoSoft atawa bisa diklik di dieu.

Pikeun catetan, program/pakakas ieu bisa digunakeun dina Windows 2000/XP/Vista/7. Sanajan gratis, program ieu rada maksa anu ngagunakeun pikeun nerapkeun toolbar dina browser anu digunakeun.