Perancis, Jawara Méngbal di Rusia


Réngsé ogé kajawaraan méngbal di Rusia. Sanggeus tatandang panungtungan anu dilumangsungkeun peuting tadi. Piala Dunia 2018 di Rusia dipungkas ku tatandang undakan puncer pikeun nangtukeun nagri mana anu jadi jawarana. Dua nagri anu asup kana undakan puncer silih éléhkeun: Perancis jeung Kroasia.

Hasilna?

Tatandang antara Perancis ngalawan Kroasia

Nagri Perancis bisa jadi jawara Piala Dunia pikeun kadua kalina sanggeus bisa ngéléhkeun nagri Kroasia kalawan gulna 4-2. Tatandang antara dua nagri asal Éropah ieu lumangsung kalawan campuh. Duanana papada hayang bisa ngéléhkeun lawanna. Papada hayang nyitak gul ka gawang lawanna. Pamaén anu dipaénkeun ku dua nagri mangrupakeun pamaén anu aralus wungkul sakumaha pamaén anu ngiluan dina tatandang undakan semifinal.

Babak kahiji, nincak menit ka-18 nagri Perancis bisa ngabuskeun bal ka gawang nagri Kroasia sanggeus tajongan Antoine Griezmann dihéden ku Mario Mandzukic. Hanjakal héden éta téh nyababkeun bal asup ka gawangna sorangan. Teu lila ti harita nagri Kroasia bisa nyarua jumlah gul sanggeus tajongan Ivan Perisic asup ka gawang Hugo Lloris. Teu lila ogé, nagri Perancis bisa nyitak gul deui ka gawang Kroasia sanggeus meunangkeun pinalti anu ditajong ku Antoine Griezmann. 2-1 teu robah nepikeun ka réngsé babak kahiji.

Nincak babak kadua, nagri Perancis bisa nambahan deui gul ngaliwatan Paul Pogba reujeung Kylian Mbappe. Gulna jadi 4-1. Saméméh tatandang réngsé, nagri Kroasia bisa nyitak gul ngaliwatan Mario Mandzukic sanggeus meunangkeun bal tajongan kiper Perancis. Nepikeun ka tatandang réngsé, gul teu roba tetep 4-2 pikeun Perancis.

Ku hasil ieu, nagri Perancis bisa meunangkeun Piala Dunia pikeun kadua kalina. Jawara Piala Dunia kahijina dimeunangkeun dina taun 1998 anu dilumangsungkeun di nagrina sorangan.

Advertisements

Kayungyuna Gloria Natapraja Hamel, Leuwih Milih Basa Sunda Tibatan Basa Perancis


Mangkukna, nalika milangkala kamerdikaan Indonésia anu ka-71, ramé naker ngeunaan anggahota Paskibraka anu teu lulus. Sawatara utusan ti unggal propinsi sa-Indonesia teu kabéh lulus bisa ngiluan jadi pasukan pikeun nanggerkeun bandéra Indonésia. Salasahiji anu teu lulus atawa asup jadi pasukan téh nyaéta Gloria Natapradja Hamel. Alesanana basajan pisan, nyaéta inyana mibanda masalah ngeunaan warganagara. Naha bener mangrupakeun warga nagara Indonésia atawa lain. Sakumaha anu katohiyan, bapana lain urang Indonésia tapi urang nagri Perancis. Reujeung inyana mibanda paspor nagri Perancis.

Gloria Natapraja Hamel
Gloria Natapraja Hamel

Kusabab kitu, inyana teu asup jadi pasukan anu nanggerkeun bandéra Indonesia (Paskibraka) nalika upacara milangkala kamerdikaan Indonésia di Istana Negara. Untung waé dina waktu nurunkeun bandérana mah kabawa jadi pasukan Paskibraka.

Sanajan mibanda paspor nagri Perancis, teu ngaruntagkeun kanyaah jeung kadeudeuh ka nagri Indonésia. Ti leuleutik, Gloria Natapraja Hamel geus cicing Indonésia katut sakola di Indonésia, perenahna di wewengkon Dépok. Sanajan mibanda pangabisa nyarita nepikeun ka tilu basa luar nagri kayaning basa Perancis, Jepang jeung basa Inggris, tapi waktu diwawancara ku wartawan mah embungeun lamun kudu nyarita ku basa Perancis téh.

Anu matak kayungyunna, inyana leuwih milih ngagunakeun Basa Sunda tibatan basa luar nagri. Pokna téh, “Abdi téh orang Sunda atuh, abdi téh bahagianya ngarumpul jeung sararéa”. Jadi sanajan mibanda paspor nagri Perancis teu ngurangan kanyaah kana budaya karuhun indungna heuseusna basa Sunda.

Ari urang, salaku urang Sunda, kumaha…?

(Potret meunang nginjeum ti okezone.com)

Poé Munggaran Piala Éropa 2016 di Google Doodle


Nincak loka Google poé ayeuna, manggihan gambar hareup panyungsi loka Google dina wangunan sawatara bandéra katut gambar munara Eiffel ditambah aya gambar bal. Kaluar katerangan anu ngajelaskeun gambar, yén ayeuna téh Hari pertama Euro 2016.

Bener ogé yén ayeuna téh geus nincak kana ping 10 Juni 2016. Anu hartina geus nincak kana poé mitemeyanana Piala Éropa 2016 atawa Euro 2016. Piala Éropa 2016, sakumaha gambar dina Google Doodle éta dilumangsungkeun di nagara anu di jerona aya munara Eiffel nyaéta nagri Perancis. Piala Éropa entragan 2016 ieu diiluan ku sawatara nagri di wewengkon Éropa anu asup kana undakan final anu jumlahnya 26 tim. Jumlahna naék dalapan tim lamun dibandingkeun reujeung Piala Éropa entragan saméméhna.

Poé Munggaran Piala Éropa 2016 di Google Doodle
Poé Munggaran Piala Éropa 2016 di Google Doodle

Nurutkeun dina Gambar Google Doodle mah, nagri anu ngiluan undakan final Piala Éropa 2016 nyaéta Albania, Austria, Bélgia, Kroasia, Céko, Inggris, Perancis, Jérman, Polandia, Portugal, Irlandia, Rumania, Rusia, Slovakia, Spanyol, Swédia, Hongaria, Islandia, Italia, Irlandia Kalér, Swiss, Turki, Ukraina, jeung Wales. Nurutkeun jadwal, dina poé munggaran Piala Éropa ieu bakal dibuka kalawan ngalumangsungkeun tatandang anu nepungkeun anu boga imah (Perancis) ngalawan Rumania.

Panasan kana pintonan Google Doodlena? Longok waé loka Google poé ayeuna.