Sumedang Osok Macét, Sabab Jalanna Laleutik jeung Loba Sisimpangan


Dayeuh Sumedang mah kaasup dayeuh leutik. Teu anéh lamun jalanna téh kalolobanana mah laleutik ogé. Ngan hanjakal kusabab dayeuh Sumedang jadi dayeuh liliwatan, loba kandaraan anu ngadon ngaliwat ka dayeuh Sumedang. Ti mimiti kandaraan leutik nepikeun ka kandaraan anu gedé. Boh anu ti béh wétan ka kulonkeun (Cirebon ka Bandung) atawa sabalikna ti Bandung ka Cirebonkeun.

Parapatan Padasuka, salasahiji parapatan anu remen macet
Parapatan Padasuka, salasahiji parapatan anu osok macet

Salian ti leutik, jalan di sabudeureun dayeuh Sumedang ogé loba sisimpanganana naha pertelon atawa parapatan. Ku dua hal ieu teu anéh lamun jalan di Sumedang remen ngalaman padedet ku kandaraan anu nyababkeun macét. Kayaning di pertelon jalan Angkrék, parapatan Bojong, pertelon BNI, parapatan Padasuka jeung parapatan Barak.

Ku hal ieu ka hareupna mah pamaréntah Kabupaten Sumedang bakal ngalegaan jalan anu kaasup remen macét éta. Cenah mah nepikeun ka tujuh tempat (parapatan jeung pertelon) anu bakal dilegaan kaasup anu geus disebutkeun saméméhna di luhur.

(Inpo jeung potret meunang nginjeum ti PRLM)

Jalan Liliwatan Mudik di Sumedang nu Diperkirakeun Bakal Macét


Nurutkeun inpo anu dipedalkeun ku loka Media Nurani Sumedang, dina mangsana mudik Lebaran taun ayeuna aya sababaraha tempat atawa jalan liliwatan anu kira-kira bakal macét. Cenah, nurutkeun data anu dipiboga ku Polrés Sumedang, aya salapan patempatan anu jadi liliwatan mudik anu diperkirakeun bakal macét. Ieu patempatan sumebar di sababaraha wewengkon, ti béh kulon Sumedang nepikeun ka béh wétan. Sakumaha jalur mudik anu kalolobaanana miang ti kulon nuju ka béh wétan.

Patempatan di Sumedang nu diperkirakeun bakal macet
Patempatan di Sumedang nu diperkirakeun bakal macet

Patempatan anu diperkirakeun bakal macét téh nyaéta:

  1. Palebah Jatinangor hususna di hareupeun kampus UNPAD. Ieu mah kusabab jalur liliwatan kandaraan anu ngaleutikan. Kandaraan anu kaluar wewengkon dayeuh Bandung jeung kaluar ti jalan tol Padaleunyi anu muru atawa ngaliwatan wewengkon Sumedang bakal padedet di Jatinangor.
  2. Jalan Raya Cimanggung di hareupeun Pabrik Kahatex. Dina sawaktu-waktu nalika pagawé Pabrik bubar gawé, bisa ngakibatkeun macét.
  3. Cimanggung – Parakanmuncang. Jalan anu leuwih leutik tibatan jalan Raya Cimanggung, bisa ngakibatkeun padedetna kandaraan.
  4. Tanjungsari. Palebah pasar Tanjungsari mah geus kawentar, najan henteu keur lebaran ogé osok macét. Komo deui waktuna lebaran.
  5. Simpang. Pertelon tempat patepungna kandaraan ti Bandung jeung ti Parakanmuncang nuju ka Sumedang katut ti Bandung ka Parakanmuncang, bisa nyababkeun macét padedet ku kandaraan.
  6. Palebah Polres Sumedang. Parapatan tempat patepungna kandaraan anu ti Bandung, ti Cirebon (jalan Prabu Gajah Agung/baypass) katut ti dayeuh Sumedang atawa sabalikna.
  7. Dayeuh Sumedang. Aya sababaraha tempat anu osok macét ku kandaraan, diantarana waé parapatan Ojolali. Di baypass palebah jalan anu urug ogé bisa macét lamun acan réngsé dibebener.
  8. Cimalaka. Pertelon Cimalaka, tempat patepungna kandaraan anu di Sumedang, Cirebon reujeung ti belah kaléreun Cimalaka.
  9. Cijelag. Pertelon Cijelag, tempat patepungna kandaraan anu ti Sumedang jeung Cikamurang anu nuju ka wewengkon Majalengka.

(Sumber warta Media Nurani Sumedang)