Naha Suwung


 
 

Anu suwung lain embung
Anu copong lain pundung
Nu ilang lain kapahung
Nu poék lain kasarung
Teu tenget teu wé kurunyung

Éndahna soré ku layung
Layung anu ngadon mayung
Di mumunggang kulon hurung
Lain cicirén pangjurung
Keupat koréjat rék lawung

Kahayang ulah diberung
Pasolengkrahna dipulung
Pamohalan nék satangtung
Hémeng naha bisa jucung
Apalna ngan sakalangkung

Kahayang nu ngancik metung
Lin kedal ku hurun balung
Lain balaka ku kerung
Diwates kunu linuhung
Dihalangan ku pangurung

(Dicutat tina catetan pesbuk)

Salin Jinis, Robah Alam


Layung di luhur gunung geus jucung
Kalangkang pating jurungkunung
Jiga anu ngajurung-jurung gera nangtung
Hamo ulah lali, hirup manjing ka tungtung

Warnana koneng ku matak aheng
Kade pancen anu malen-malen ulah kacoceng
Komo mung neangan nu saukur tameng
Loba anu seah loba anu saheng

Panonpoe tilem cahyana beuki melempem
Poma ulah asa aing kaalem
Ngeunah-ngeunah loba anu pelem
Bisi hirup jadi beuki ka kakerem

Beurang salin jinis jadi peuting
Sumanding, pipinding anu ngadalingding
Beuki ngeunah asa aya anu ngayun ambing
Naha aya, naha saha anu bisa mepeling

Sora gaang jadi reang, ku matak salempang
Hariwang, sieun teu manggih deui beurang
Taya jalan geusan balik mangsa ka tukang
Naha ayeuna, bet ayeuna waktu urang mulang

(Dicutat tina: http://www.facebook.com/topic.php?topic=15050&post=89446&uid=88608078217#!/note.php?note_id=403982206893)

In The Dead End?


Hibar layung koneng belah kulon
Matak waas ku endahna
Matak sedih di tungtung poe
Sedih bakal paturay jeung poe ieu
Sedih bakal ngalaman poekna peuting
Sedih kumaha nasib poe isukan
Isukan anu kumaha?
Naha bakal tetep kieu? Atawa bakal aya harepan anyar?
Naha isukan anu tetep dikawasa ku poe ieu?
Atawa isukan anu dikawasa ku poe isukan?

Dicutat ti http://www.facebook.com/?ref=home#!/note.php?note_id=151830331893