Gim Kaulinan Barudak: Onyét Oyag


Nyaba ka loka http://sarwasunda.blogspot.com/2009/03/onyet-oyag.html, manggihan judul Onyét Oyag: Kaulinan Barudak. Gambarna nuduhkeun monyét anu keur meungpeun. Dina éta loka dijelaskeun, yén Kaulinan ieu dipedalkeun kalayan tujuan pikeun ngawanohkeun kandaga kecap (kosakata), ejahan, jeung undak-usuk (tatakrama) basa Sunda pikeun barudak.

Gim Kaulinan Barudak Onyet Oyag

Jadi Onyét Oyag mangrupakeun hiji jinis gim kaulinan barudak anu dijalankeun dina kompiuter, naha bari nyambung ka internét atawa henteu. Lamun hayang maénkeun dina panyungsi internét bisa ngaliwatan alamat di luhur kalawan neken kenop Play Online. Sedengkeun lamun hayang maénna henteu kudu nyambung ka internét, éta gim kudu diundeur heula. Cara ngundeurna, masih kénéh ti éta loka, teken waé kenop Download.

Pikeun anu hayang nyobaan atawa ngundeur éta gim bisa langsung waé nyungsi ka alamat http://sarwasunda.blogspot.com/.

Ieu gim téh dijieun ku alpukahna Itanabin Production.

(Gambar meunang nginjeum ti http://sarwasunda.blogspot.com/)

Advertisements

Nyieun Kaulinan dina Hénpon mah Ngan Ukur Pikeun Hiburan


Game is About Fun.

Kitu cenah anu ngaranna kaulinan atawa game hususna dina hénpon mah. Taya deui maksud séjén pikeun jalma anu ngadon maénkeun kaulinan (game) dina hénpon salian ti pikeun hiburan. Ngilikan kana kamampuhan hénpon dina nyadiakeun kaulinan katut jinis kaulinan anu aya, kaulinan (game) dina hénpon biasana mah ngan ukur digunakeun pikeun ngeusi waktu anu kosong, naha eukeur di jalan atawa keur nungguan babaturan.

Henpon Nokia Lumia 710

Jadi maén kaulinan dina hénpon mah béda reujeung maén kaulinan dina kompiuter. Dina kompiuter mah bisa waé maén kaulinan téh pikeun ngadu pangabisa (ngalawan babaturan anu sarua maénkeun éta kaulinan) atawa ngalawan kompiuter. Atawa tujuan séjénna. Hal ieu dirojong ku kamampuhan kompiuter anu bisa maénkeun sagala rupa kaulinan ti mimiti anu biasa (basajan) nepikeun ka anu susah, jeungna deui sagala rupa kaulinan pikeun kompiuter mah loba (sagala aya).

Kusabab kitu, dina nyieun kaulinan pikeun dijalankeun dina hénpon mah diwawatesanan ku kamampuhan hénpon dina maénkeun kaulinan anu dijieun. Kamampuhan hénpon mah kurang pisan lamun dibandingkeun reujeung kompiuter. Dina nyieun kaulinanana mending nyieun anu gampang. Kaulinan anu jinisna dua diménsi ogé cukup. Terus kapasitasna ogé teu kudu gedé-gedé teuing. Cukup ku nyieun kaulinan anu ukuranana leutik.

Jadi, catetan dina nyieun kaulinan dina hénpon mah: kahijina, kaulinan dina hénpon ngan ukur pikeun ngeusi waktu wungkul; kaduana, kamampuhan utama hénpon mah pikeun nelepon atawa ngirim pésen lain pikeun maén game.

Mikawanoh Connection String


Connection string? Ceuk Basa Sundana mah kurang leuwih tali panyambung. Sakumaha ngaranna connection string dipake pikeun nyambungkeun kana hiji perkara. Dina dunya kompiuter jeung aplikasi kompiuter, connection string osok dipaké pikeun nyambungkeun program aplikasi kana databés atawa payil data. Dina jero connection string ngandung inpo anu dibutuhkeun ku anu nyadiakeun (provider) pikeun nyambung kana databés atawa payil data.

Tali panyambung connection string

Dina kanyataanana loba rupa provider anu nyadiakeun panyambung kana databés. Unggal provider miboga rupa-rupa cara anu béda pikeun nyambungkeun aplikasi kana databés atawa payil data. Kusabab kitu, hiji provider tacan tangtu sarua reujeung provider lainna dina nyieun connection string-na.

Najan kitu, nurutkeun inpo ti connectionstring.com, umumna connection string miboga warna atawa wangunan anu sarua nyaéta:

  1. Connection string diwangun ku barisan pasangan kecap-kecap anu geus jadi konci jeung niléyna anu dipisahkeun ku tanda titik koma (;)
  2. Tanda sarua jeung (=) nyambungkeun kecap konci reujeung niléyna
  3. Inpo dina connection string dikirim ka provider

Conto connection string anu nyambungkeun aplikasi kana databés PostgreSQL:

Server=localhost;Port=5432;User Id=postgres;Password=123456;Database=db_bw;

(Gambar meunang nginjeum ti http://www.connectionstrings.com/)

Masang CodeIgniter di Pangladén Wéb Kompiuter Sorangan


Sanggeus ngundeur CodeIgniter tina situsna, wangunan payilna téh masih dina gémbolan (zip). Atuh kudu dimekarkeun heula éta payil téh. Sanggeus dimekarkeun, hasilna mangrupakeun kumpulan payil jeung map. Dina kasus CodeIgniter anu diundeur téh geus nepikeun kana pérsi 2.1.0, hasilna aya tilu map ditambah 2 payil: map application, system reujeung user_guide; payilna index.php jeung license.txt. Eta kabéhanana diwengku ku map CodeIgniter_2.1.0.

Map hasil nyalin CodeIgniter 2.1.0 kana map htdocs

Sanggeus dimekarkeun mah, langsung waé payil-payilna disalin kana map htdocs anu aya dina pangladén wéb kompiuter sorangan (XAMPP). Cara nyalinna bisa langsung map CodeIgniter_2.1.0 kabéhanana kana map htdocs atawa eusi map CodeIgniter_2.1.0 kana map htdocs. Sarua waé sabenerna mah. Ngan anu ngabédakeunana téh engkéna dina waktu ngaksés wéb dina panyungsi wébna. Bisa ogé disalinna kana map meunang nyieun sorangan dina jero map htdocs. Dina kasus ieu mah, map CodeIgniter_2.1.0 disalin kana map htdocs. Atuh dina map htdocs téh apa map CodeIgniter_2.1.0.

Sanggeus rengsé mah, langsung waé diaksés maké panyungsi wéb (contona ngagunakeun Mozilla Firefox). Asupkeun alamatna: http://www.localhost/CodeIgniter_2.1.0/. Lamun bener, bakal kaluar lambaran wéb anu judulna Welcome to CodeIgniter, anu nandakeun yén CodeIgniter 2.1.0 geus bisa dipaké ngawangun aplikasi wéb.

Ancoan lambaran web hasil masang CodeIgniter 2.1.0 dina pangladen web kompiuter sorangan

ICT Anu Dumasar kana Téhnologi Kompiuter Ayeuna


Sabenerna mah téhnologi anu dipakéna mah (ampir) sarua reujeung kompiuter baheula. Anu ngabédakeunana téh kusabab téhnologi kompiuter jaman ayeuna mah ditambahan ku kamampuhan pikeun ngirim jeung narima data atawa inpormasi ti jeung ka tempat séjénna anu jauh ngaliwatan jaringan, arék jaringan kabel atawa teu maké kabel. Sakumaha ngaranna ‘komunikasi’ (singketan tina aksara C tina ICT, atawa aksara K tina TIK), dina ieu téhnologi mah nyata ayana. Data lain ngan ukur jadi inpormasi tapi ogé dikomunikasikeun ka saban madhab, ka saban tempat. Data atawa inpormasi anu penting jeung dipikabutuh ku lobaan bisa disebarkeun ngaliwatan jaringan éléktronik. Jaringan éléktronik ieu hususna nyambungkeun unggal kompiuter anu aya.

Jadi anu ngadukung kana téhnologi inpormasi reujeung komunikasi, salian ti ayana kompiuter ogé dibutuhkeun komponén séjénna anu mangrupakeun jaringan éléktronik anu nyambungkeun kompiuter reujeung kompiuter.

ICT

Ngeunaan jaringan aya sababaraha rupa, nyaéta jaringan anu sipatna lokal (LAN: Local Area Network) ngan ukur ngawengku hiji imah atawa gedong. Terus aya ogé jaringan anu sipatna di luareun lokal (WAN: Wide Area Network) anu sipatna leuwih lega tibatan lokal. Jaringan WAN bisa ngawengku hiji wewengkon, contona wewengkon hiji dayeuh. Anu leuwih legana deui aya anu disebut Internet (Inter-network), anu ngawengku jaringan sakuliah dunya. Ku jaringan internét ieu, hiji kompiuter bisa nyambung ka saban tempat di sakuliah dunya.

Dina téhnologi ICT anu ieu mah, gunana kompiuter téh lain ngan ukur pikeun ngetik, nyatet data duit atawa ngagambar wungkul. Tapi geus leuwih lega ambahanana. Aya perkara-perkara di luar éta anu leuwih penting deui anu aya hubunganana jeung kumaha cara ngagunakeun ICT/TIK dina hiji organisasi.

  1. Inpormasi (kapanjangan tina I dina ICT atawa TIK) ngawengku topik sakumaha mangpaat jeung niley inpormasi, kumaha cara inpormasi dikadalikeun, watesan ICT/TIK jeung kumaha supaya bisa nurut kana aturan.
  2. Ngatur jeung ngokolakeun inpormasi, hal ieu ngawengku kumaha carana nangkep, mariksa, neundeun, ngarobah, ngolah jeung nyebarkeun inpormasi; ngajaga inpormasi supaya aman; ngararancang jaringan pikeun babagi inpormasi.
  3. Strategi sistem inpormasi, hal ieu aya pakaitna reujeung kumaha carana ICT bisa dipaké pikeun kapentingan bisnis atawa organisasi dina ngahontal tujuan reujeung cita-citana.

ICT anu Dumasar kana Téhnologi Kompiuter Baheula


Téhnologi Inpormasi jeung Komunikasi (ICT) anu dumasar kana téhnologi kompiuter jaman baheula, biasana mah téhnologi anu masih kénéh séwang-séwangan. Inpormasi (jeung komunikasi) anu aya sipatna masih kénéh diwawatesanan ku tempat reujeung waktu. Inpormasi anu nyebar masih kénéh tacan bébas bisa ka mana-mana. Komunikasi data anu dilakukeun diwawatesanan ku tempat, komunikasi ngan ukur aya di wewengkon anu ambahanana saeutik.

Hal ieu téh disababkeun kompiuter dina jaman baheula mah sipatna pribadi atawa pikeun sorangan. Data inpormasi anu dikokolakeunana ogé masih kénéh saeutik. Ditambah ku data reujeung inpormasi anu dikokolakeunana ngan ukur pikeun kaperluan sorangan atawa sababaraha urang wungkul.

Kompiuter

Kompiuter baheula mah biasana ngan ukur dipaké pikeun nulis (ngetik) tulisan anu sipatna pribadi (eukeur pribadi atawa eukeur sababaraha urang), pikeung nyatet data tentang duit (akuntansi), reujeung anu séjénna.

Conto-conto gunana kompiuter baheula dina ngokolakeun data:

  1. Aplikasi kantor biasa saperti ngetik tulisan maké program paranti ngokolakeun tulisan (Word Processing), program paranti ngokolakeun data duit (akuntansi), program paranti ngokolakeun data (databés), jeung réa-réa deui.
  2. Paranti ngararancang maké bantuan kompiuter (CAD), saperti ngararancang rupa wangunan.
  3. Ngolah gambar atawa poto maké program paranti ngolah poto.
  4. Jeung program séjénna anu biasa dipaké dina kompiuter sorangan (PC).

Masang XAMPP dina Kompiuter Sorangan


Sanggeus ngundeur XAMPP, saterusna mah XAMPP-na dipasang dina kompiuter anu bakal dipaké pikeun nyieun program dina web. Cara masangna gampang, sakumaha masang program anu séjénna (catetan: ieu mah masangna dina Windows). Tinggal klik waé dua kali payil program xampp-win32. Bakal kaluar jandéla cara masang XAMPP. Tina jandéla anu kaluar, tangtukeun map anu arék dijadikeun tempat neundeun payil-payil anu diperlukeun pikeun ngajalankeun Apache katut pangrojongna. Sanggeus ditangtukeun, klik waé kenop Install. Tungguan nepikeun ka réngséna ngaguar payil-payil kana tempat anu geus dipilih tadi.

Jandela pikeun masang XAMPP

Terus bakal kaluar jandéla Command Prompt (jandéla paranti ngasupkeun paréntah kana kompiuter ku jalan ngetikeun paréntahna). Dina jandéla éta ketik waé pilihan anu disadiakeun, ketik hurup y atawa n sakumaha anu ditanyakeun.

Sanggeus réngsé, bisa dicoba naha Apache-na geus jalan atawa acan. Carana ngagunakeun panyungsi internét samisal Mozilla Firefox atawa Internet Explorer. Ketik alamat http://localhost/. Lamun kaluar kalimah anu ngawartakeun yen urang geus beres masang XAMPP dina kompiuter.

Jandela Mozilla Firefox lamun ngakses http://localhost anu nandakeun masang XAMPP-na bener