Portugal, Sanajan Méngbalna Goréng tapi Jadi Jawara Éropah


Taya anu nyangka yén Portugal bakal jadi jawara Piala Éropa 2016. Memang saméméhna mah tim Portugal mangrupakeun salasahiji tim anu jadi pinunjul kahiji dina kajawaraan Piala Éropa 2016. Komo deui nempo lawan anu bakal disinghareupan dina undakan kahijina, Portugal bakal gampang asup kana undakan kadua. Di grup F, Portugal ngahiji reujeung tim Austria, Hungaria jeung Islandia.

Hanjakal dina prakna tatandang kajawaraan Piala Éropa, kapinunjulan tim Portugal téh siga euweuh tapakna. Sanajan diunggulkeun, tapi teu bisa meunang dina tatandang undakan kahiji. Tilu kali méngbal ngalawan sakabéh lawan di grup F, taya anu bisa dimeunangkeun ku Portugal. Antukna, Portugal kabagéan jadi jawara tilu di grup F disahandapeun Hungaria jeung Islandia. Portugal bisa asup kana undakan kadua sanggeus bisa nyangking jawara katilu pangalusna reujeung opat tim séjén.

Nincak undakan kadua, kitu kénéh. Cara méngbal Portugal masih kénéh teu nyirikeun salasahiji tim anu diunggulkeun. Ngalawan tim Kroasia, Portugal kudu ngaliwatan babak tambahan pikeun ngéléhkeun lawanna. Gul hiji-hijina dina ieu tatandang dicitak ku Ricardo Quaresma di panungtungan babak tambahan.

Tatandang undakan katilu, Portugal ditangtang ku Polandia. Dina ieu tatandang, Portugal tinggaleun tiheula sanggeus kagulan dina menit kadua ku pamaén béntang Polandia, Robert Lewandowski. Portugal kakara bisa males dina menit ka-33. Nepikeun ka babak tambahan dilumangsungkeun, gulna angger gedeg teu nambahan. Pikeun nangtukeun anu meunangna, diteruskeun kana babak adu pinalti. Tina adu pinalti ieu, Portugal bisa ngéléhkeun Polandia 5-3 sanggeus tajongan Blaszczykowski teu asup balna kusabab balna katepak ku kiper Portugal.

Dina undakan kaopat atawa undakan semifinal, Portugal kudu ngaladénan tim Wales. Tatandang ieu kakara bisa dimeunangkeun ku Portugal dina waktu normal reujeung gulna kawilang alus, dua gul. Portugal bisa ngéléhkeun Wales 2-0 pikeun ngasupkeun timna kana undakan puncer Piala Éropa 2016.

Tatandang panungtungan Piala Éropa 2016, Portugal kudu ngalawanan anu boga hajat, Perancis. Perancis anu alus méngbalna dina tatandang saméméhna, leuwih dipunjulkeun pikeun ngéléhkeun Portugal pikeun nyangking jawara Éropah. Sanajan kitu Portugal anu ngalaman diéléhkeun ku Yunani dina Piala Éropa 2004 dina undakan puncer teu nyerah kitu waé. Portugal sakuat tanaga nahan panarajang jeung ngalawan pikeun ngéléhkeun Perancis, sabab hayang pisan jadi jawara Éropah.

Jawara anyar Eropah, Portugal
Jawara anyar Eropah, Portugal

Ahirna, kahayang Portugal jadi jawara Éropah téh tinekanan oge sanggeus dina tatandang undakan puncer ieu bisa ngéléhkeun Perancis ngaliwatan babak tambahan.

(Potret meunang nginjeum ti Kompas)

Dua Puluh Taun Ka Tukang, Pérsib Jawara Anyar Liga Indonésia


Ping 30 Juli ayeuna, dua puluh taun ka tukang, Pérsib Bandung nyangking kalungguhan salaku jawara Liga Indonésia anu munggaran. Hal ieu dipibanda sanggeus dina undakan final Liga Indonésia 1995, Pérsib Bandung bisa ngéléhkeun kleub Pétrokimia Putra. Gul anu ngan hiji-hijina dicitak ku pamaén hareup andelan Pérsib Bandung harita, Sutiono Lamso dina menit ka-76.

Anggalna mah, Pérsib Bandung hanteu dijagokeun pikeun jadi jawara Liga Indonésia 1995. Dina tatandang munggaran ngalawan Pelita Jaya Jakarta ping 27 Nopémber 1994, Pérsib Bandung kaéléhkeun. Pelita Jaya Jakarta ngéléhkeun Pérsib 1-0 ngaliwatan gul anu dicitak ku Dejan Gluscevic dina menit ka-60.

Sanajan dimimitian ku éléh heula, Pérsib Bandung bisa nérékél naék dina klasemén undakan penyisihan Wilayah Barat. Tungtungna Pérsib Bandung bisa jadi jawara kadua dina ieu undakan sahandapeun kleub Pelita Jaya Jakarta. Tina 32 kali tatandang, Pérsib Bandung meunangkeun 69 angka, hasil tina 20 kali meunang, 9 kali imbang jeung 3 kali éléh. Kleub anu bisa ngéléhkeun Pérsib salian ti Pelita Jaya Jakarta nyaéta Semen Padang jeung Persiraja Banda Aceh nalik Pérsib maénna nyorog.

Tina ieu undakan (penyisihan), dicokot opat kleub ti unggal wewengkon (wewengkon kulon jeung wewengkon wétan). Pérsib salaku jawara kadua wewengkon kulon, asup kana undakan saterusna, undakan 8 kleub dibarengan ku kleub Pelita Jaya Jakarta (jawara kahiji, 77 angka) jeung Bandung Raya (jawara katilu, 67 angka) katut Médan Jaya (jawara kaopat, 56 angka). Ti wewengkon wétan anu asupna nyaéta kleub Pétrokimia Putra Grésik, Pupuk Kaltim Bontang, Assyabaab Salim Grup Surabaya (ASGS) katut Barito Putra Banjarmasin.

Tina dalapan kleub ieu, Pérsib Bandung mangrupakeun hiji-hijina kleub anu asalna ti perserikatan. Sésana mah asalna ti Galatama. Ogé, Pérsib Bandung mangrupakeun salasahiji tina dua kleub anu teu maké pamaén luar nagri reujeung kleub Barito Putra.

Dina undakan 8 kleub, Pérsib ngahiji reujeung Médan Jaya, Pétrokimia Putra jeung ASGS di Grup B. Dina tatandang munggaran Grup B, Pérsib ngaladénan Pétrokimia Putra anu dua pamaénna mangrupakeun urang luar nagri: Jacksen F. Tiago (asal ti Brasil) jeung Darryl Sinerine (asal ti nagri Trinidad & Tobago). Hasilna, taya anu meunang bari taya gul anu kacitak, 0-0. Sedengkeun kleub ASGS ngéléhkeun Médan Jaya, 2-1.

Dina tatandang kadua, Pérsib Bandung bisa ngéléhkeun Médan Jaya 2-1. Sedengkeun Pétrokimia Putra imbang 2-2 ngalawan ASGS. Pérsib Bandung jadi jawara Grup B sanggeus dina tatandang panungtungan bisa ngéléhkeun ASGS 3-0. Jawara kaduanya dimeunangkeun ku Pétrokimia Putra sanggeus ngéléhkeun Médan Jaya 3-0.

Kusabab Pérsib Bandung jadi jawara Grup B, dina undakan semifinal kudu ngaladénan jawara kadua Grup A anu dicangking ku Barito Putra. Dina tatandang anu dilumangsungkeun ping 28 Juli 1995, Pérsib Bandung bisa ngéléhkeun Barito Putra. Sanajan kacida susahnya, Pérsib Bandung bisa nyitak gul anu ngan hiji-hijina ngaliwatan Kekey Zakaria dina menit ka-80.

Dina undakan puncer, Pérsib Bandung kudu ngalawan kleub Pétrokimia Putra deui sanggeus éta kleub ngéléhkeun Pupuk Kaltim dina undakan semifinal hiji deui. Pétrokimia Putra ngéléhkeun Pupuk Kaltim 1-0 ngaliwatan gul anu dicitak ku Widodo Cahyono Putro.

Persib Bandung nalika jadi jawara Liga Indonesia 1995
Persib Bandung nalika jadi jawara Liga Indonesia 1995

Tatandang undakan puncer, Pérsib Bandung ngaliwatan pelatihna, Indra Thohir ngilukeun sakabéh pamaén pangalusna. Sawelas pamaén anu langsung dipaénkeun nyaéta: Anwar Sanusi (kiper), Mulyana, Robby Darwis, Yadi Mulyadi, Dede Iskandar, Nandang Kurnaedi, Yudi Guntara, Asep Kustiana, Yusuf Bachtiar, Kekey Zakaria, jeung Sutiono Lamso. Kalawan dirojong ku puluhan ribu bobotoh anu ngadon daratang ka Stadion Stadion Utama Senayan, Pérsib Bandung bisa ngéléhkeun Pétrokimia Putra pikeun nyangking kalungguhan jawara Liga Indonésia anu munggaran.

(Inpo meunang nyutat ti GalamediaNews)

Pérsib Meunangkeun Piala Walikota Padang


Nyorang taun anyar, Pérsib Bandung bisa meunangkeun piala deui. Dina kajawaraan Méngbal Piala Walikota Padang anu dilumangsungkeun di dayeuh Padang, Pérsib Bandung bisa meunangkeun éta piala. Sanggeus ngéléhkeun Pérsiba Balikpapan di undakan final (puncer), Pérsib Bandung jadi jawarana.

Pérsib jadi Jawara di Piala Walikota Padang
Pérsib jadi Jawara di Piala Walikota Padang

Dina kajawaraan anu diiluan ku genep kleub ieu, Pérsib Bandung ngalumangsungkeun tilu kali tatandang. Dua kali tatandang dina undakan munggaran (Grup A) ditambah sakali dina undakan puncer. Dina tilu kali tatandang ieu, Pérsib Bandung henteu kungsi kaéléhkeun dina harti meunang noron. Malahan mah henteu kungsi kagulan hiji-hiji acan.

Tatandang munggaran ngalawan PSP Padang, Pérsib meunang kalawan gulna 3-0, diteruskeun kana tatandang kaduana ngalawan Pusamania Borneo FC kalawan jumlah gul anu sarua. Dina undakan puncer, Pérsib ngé;éhkeun Pérsiba Balikpapan kalawan gulna 2-0 anu digulkeun ku Maycon Calijuri ngaliwatan pinalti ditambah Makan Konate.

Salaku jawara, Pérsib Bandung dilélér piala ditambah duit 100 juta. Pamaén Pérsib Bandung, Tantan jadi pamaén anu panglobana ngagulkeun dilélér duit 5 juta.

(Gambar meunang nginjeum ti Goal.com)

Ahirna, Pérsib Jadi Jawara Liga Indonesia


Sanggeus nungguan waktu anu kacida lilana, ahirna mah Pérsib Bandung bisa nyangking deui kalungguhan salaku jawara Liga Indonésia. Henteu lila kumaha, Pérsib Bandung pernah nyangking jawara Liga Indonésia pikeun anu munggaran dina taun 1995. Kakara dina taun 2014 ayeuna bisa nyangking deui éta kalungguhan. Salila ieu, Pérsib kacida susahna pikeun jadi jawara Liga téh. Remen kaéléhkeun waé ku kleub séjénna.

Pérsib Jadi Jawara Liga Indonesia 2014
Pérsib Jadi Jawara Liga Indonesia 2014

Dina entragan Liga Indonésia ayeuna, Pérsib Bandung jadi jawara sanggeus ngéléhkeun kleub Persipura Jayapura dina undakan puncer. Persipura anu jadi jawara Liga Indonésia saméméhna diéléhkeun ku Pérsib Bandung ngaliwatan adu pinalti kalawan gulna 5-3. Adu pinalti ieu dilumangsungkeun sanggeus dua maén nepikeun ka babak tambahan, anggeur gulna 2-2.

Wilujeng kanggo Pérsib Bandung.

(Sumber gambar: Liputan6)

Iraha Rék Juara!


Harepan pangrojong (bobotoh) Pérsib Bandung supaya Pérsib bisa nanjeur deui di liga Indonésia, kacida gedéna. Bisa kaharti, da geus lila pisan Pérsib Bandung téh henteu jadi jawara di liga méngbal di Indonésia (ISL). Kungsi jadi jawara kahiji téh mangsa liga munggaran dimimitian dina taun 1994. Ti harita mah Persib Bandung téh susah jadi jawarana. Rupa-rupa tarékah geus dilakonan diantarana waé meuli pamaén anu aralus boh urang Indonésia atawa urang luar nagrég. Ngan hanjakal, usaha ieu tacan aya hasilna.

Spanduk bobotoh Persib Bandung anu nanyakeun yen Persib teh iraha arek jadi jawara deui
Spanduk bobotoh Persib Bandung anu nanyakeun yen Persib teh iraha arek jadi jawara deui

Dina liga méngbal taun ayeuna, aya harepan pikeun jadi jawara lamun ngilikan kana pamaén anu dipiboga ku tim Pésib Bandung. Ngan sanggeus lumangsung salila ieu, harepan jadi jawara téh leungit. Pérsib Bandung henteu bisa jadi pinunjul kahiji. Paling alus bisa jawara kadua. Pinunjul kahiji mah geus jadi ceunceuman tim Peripura anu geus pasti jadi jawara liga ISL taun ayeuna. Persib Bandung mah ngan ukur bisa kabagéan jawara kadua. Éta ogé lamun bisa meunang terus dina tatanding sésana nyorong ngalawan Persipura Jayapura katut Persiwa Waména.

Mugia waé atuh sanajan henteu bisa jadi jawara kahiji, sahanteuna bisa jadi jawara kadua. Bisa ngubaran kahandeueul bobotoh anu hayang nempo Pérsib Bandung jadi jawara deui di liga Indonésia. Sahanteuna lamun jadi jawara kadua, Pérsib bisa ngiluan Piala AFC.

(Sumber potret Pikiran Rakyat Online)