Ngaronjatkeun Flyme di Meizu M2 Note


Meunang inpo ti internét, heuseusna loka Flyme, cenah sistem operasi Android pikeun parabot keupeul Meizu anu dingaranan Flyme geus aya anu anyar nyaéta entragan 5.1.

Dina pintonan hareup éta loka nembrak gambar angka jeung Flyme 5 katut katerangan pondokna. Katerangan anu ngajelaskeun yén Flyme 5 mangrupakan sistem operasi anu dijieun dumasar kana Android 5.1. Sistem operasi Flyme 5 leuwih alus jeung leuwih kuat tibatan entragan saméméhna.

Flyme 5 bisa dipaké pikeun parabot keupeul jinis M2 Note jeung MX4. Kari ngundeur waé tina lambaran Download, terus pilih parabot keupeul anu dipibanda. Pikeun ngundeurna alusna mah ngagunakeun parabot keupeulna langsung ngagunakeun panyungsi internét. Gedéna payil waktu ngundeur pikeun Meizu M2 Note 801 méga. Lambaran heuseus ngundeur payilna bisa langsung nyungsi ka alamat http://www.flymeos.com/firmwarelist?modelId=3&type=1. Pilih baris Flyme 5.1.5.0G terus teken kenob Download. Tungguan waé nepikeun ka réngséna.
Kumaha cara masangna?

Pikeun masangna, teken waé payil hasil ngundeurna. Bakal kaluar jandela anu negeskeun ngeunaan ngaronjatkeun Flyme. Lamun bener-bener arék ngaronjatkeun, kari teken waé Reboot. Pilihan céklis Wipe User Data dipaké pikeun mupus data dina parabot keupeul. Sanggeus pareum bakal hurung deui bari kaluar katerangan Checking Firmware. Tungguan waé nepikeun réngséna.

Saterusna bakal nincak kana undakan ngaronjatkeun Flyme (Upgrading). Tungguan sabab rada lila. Sanggeus réngsé bakal pareum sorangan terus hurung deui. Disambung ku undakan Optimizing app. Lilana gumatung kana lobana aplikasi anu geus aya dina parabot keupeul. Tungguan nepikeun ka réngséna.

Sawatara pintonan anyar sanggeus Meizu M2 Note dironjatkeun sistem operasina kana Flyme 5.1
Sawatara pintonan anyar sanggeus Meizu M2 Note dironjatkeun sistem operasina kana Flyme 5.1

Sanggeus réngsé, parabot keupeul Meizu M2 Note geus bisa dipaké kalawan sistem operasi anu anyar. Naon waé atuh kamonésan jeung kapinunjulan anu dipibanda ku Flyme 5? Tungguan waé dina tulisan saterusna….

Kabita Ku Meizu M2 Note


Sabenerna mah geus sawatara waktu anu geus kaliwat. Nilik kana kapinunjulanana, sanajan ieu hénpon téh jieunan pabrik di Cina, matak kabita. Ditambah deui ku hargana anu jauh lamun dibandingkeun reujeung hénpon sarimbagan anu dijieun ku pausahaan anu geus kawentar. Da cenah, ayeuna mah béda reujeung anu enggeus-enggeus. Sanajan jieunan Cina tapi kualitasna mah leuwih alus atawa bisa nyaruaan kana hénpon jieunan pausahaan anu kawentar.

Henpon Meizu M2 Note
Henpon Meizu M2 Note

Nilik kana data anu diancokeun ku sawatara loka mah, aya sababaraha kapinunjulan anu dipibanda ku éta hénpon. Diantara kapinunjulan anu diancokeun nyaéta:

  1. Ukuran layarna anu gedé nyaéta 5,5 inci. Kawilang gedé pikeun ukuran hénpon biasa. Condong kénéh disebutna téh phablet (hénpon tablet). Ditambah deui ku teknologi anu dipaké dina layarna nyaéta geus ngagunakeun téknologi IGZO anu alus pikeun ngurangan pangabutuh listrik. Terus resolusinya ogé gedé nyaéta 403 PPI kalawan kontrasna nepikeun ka 1.000 banding 1.
  2. Ukuran hénponna anu kawilang ipis jeung hampang. Kandelna ngan ukur 8,7 miliméter kalawan beuratna 149 gram. Cangkan tukangna mibanda rupa-rupa warnana. Tinggal milih hayang anu rupa kumaha: aya anu héjo, hawuk, kayas jeung bodas.
  3. Pikeun ngajalankeun gawéna, hénpon Meizu M2 Note dibekelan ku prosesor 64-bit dalapan inti (octa-core) anu dilengkepan ku prosesor grafis tilu inti (triple-core). Prosesor anu dipakéna kaluaran ti Mediatek nyaéta seri MT6753. Prosesor ieu bisa ngajalankeun sagala rupa pagawéan ti mimiti pagawéan anu hampang nepikeun ka anu beurat kayaning kaulinan tilu dimensi (game 3D).
  4. Pikeun nyambungkeun ka jaringan seluler, ieu hénpon dibekelan ku dua tempat kartu SIM. Duanana mibanda kamampuan pikeun nyambung kana jaringan seluler 4G, jadi lain ngan hiji. Duanana bisa jalan babarengan, teu kudu ganti-ganti. Hanjakal waé ukuran SIM-na geus ukuran nano, jadi lamun mibanda kartu SIM biasa, kudu diteukteuk heula da moal asup.
  5. Terus kamerana. Hénpon Meizu M2 Note dibekelan dua kaméra, di tukang jeung di hareup. Anu tukang mibanda resolusi 13 megapiksel sedengkeun anu hareup 5 megapiksel. Kaméra anu tukang dilengkepan ku lampu léd dua siki (dual-tone flash) pikeun nyaangan anu arék dipotrét.
  6. Pikeun ngalistrika ieu hénpon, Meizu M2 Note dilengkepan ku batré anu ukuranana 3.100 mAh kaluaran ti SONY/ATL. Kawilang gedé.
  7. Terus sistem operasina geus ngagunakeun Android entragan 5.1 atawa Lollipop. Sistem operasina geus diropéa kalawan dingaran Flyme 4.5. Jadi dina pintonanana, henteu dina wangunan Android 5.1 Lollipop deui, tapi geus robah.

Tina sawatara kapinunjulan éta, ahirna mah nyeungceum waé ieu hénpon.

(Gambar meunang nginjeum ti Meizu)

Smartfren AndroMax V 5.0


Neruskeun ranggeuyan hénpon Android kulawarga Andromax, Smartfren salaku operator CDMA di Indonésia ngaluarkeun hénpon Andromax entragan anyar. Hénpon anu dingaranan Andromax V ieu miboga kamonésan anu leuwih punjul deui tibatan hénpon Andromax entragan saméméhna. Kapinunjulan anu katara diantarana waé nyaéta legana layar anu dipaké, leuwih lega tibatan entragan saacanna. Pon kitu deui reujeung kaméra paranti motrétna, leuwih gedé résolusina. Ditambah ogé ku kamampuhan prosésor anu diceungceum di jerona, miboga galura gawé 1,2 GHz kalawan loba inti prosésorna nepikeun ka opat siki (quad core). Teu poho ditambahan ogé ku sistem operasi Android anu dipasangkeunana geus entragan anyar ogé, Android Jelly Bean 4.2.

Sedengkeun kamonésan séjénna mah ampir sarua reujeung entragan saméméhna. Kartu anu bisa dipakéna sarua dua kartu. Anu hiji mah kartu Smartfren kalawan bisa maké jaringan EVDO Rev A. Ari kartu anu hiji deui bisa maké jaringan GSM kalawan ditambahan kamampuhan bisa maké jaringan EDGE. Lumayan bisa dipaké internétan sanajan gancangna henteu nepikeun ka sagancang HSDPA.

Henpon Smartfren Andromx V 5.0
Henpon Smartfren Andromx V 5.0

Layar anu dipaké ku ieu hénpon kawilang panggedéna lamun dibandingkeun reujeung hénpon entragan Andromax séjénna. Pon kitu deui reujeung résolusi layarna. Résolusi layarna geus miboga kamampuhan 720p HD (1270×720). Nilik kana spésipikasi layar ieu, cenah ieu hénpon bisa midangkeun gambar anu alus katut hérang di mana waé nempona. Lamun dipaké lalajo pidio atawa maén gim téh kawilang ngeunaheun pisan. Kamampuhan maén gimna dirojong ogé ayana prosésor grapis anu diasupkeun kana ieu hénpon, nyaéta prosésor PowerVR SG5x.

Ngeunaan prosésor anu dipakéna, kawilang alus pisan. Prosésorna kaasup quad core atawa dijero prosésorna miboga opat inti prosésor, kalawan galura gawé (prekuensina) 1,2 GHz. Nilik kana spesipikasi prosésorna, cenah bakal nambahan gancang dina ngolah data kalawan loba prosés (multitasking), pipindahan anu lemes (ngageuleuyeung) moal aya rarandegan, bari moal hambur batré.

Kaméra anu dipakéna miboga kamampuhan résolusi 8 MP kalawan dilengkepan ku lampu led flash pikeun nyaanganana. Sedengkeun kaméra hareupna miboga résolusi 1 MP. Kamampuhan kaméra ieu hénpon dirojong ogé ku ayana aplikasi anu miboga kamampuhan pikeun nangkep gambar 99 kali jeprét terus-terusan (Photo Burst).

Android anu dipasangna kaasup Android entragan anyar, Android Jelly Bean 4.2. Atuh leuwih loba kamonésan anu bisa dipaké dina ngagunakeun ieu hénpon. Pidanganana leuwih hadé deui tibatan Android entragan saméméhna. Ditambah ogé aya aplikasi Google Now pikeun dijadikeun asistén pribadi anu makéna.

Ngeunaan kamonésan séjénna mah ampir sarua reujeung hénpon Andromax saméméhna. Hiji hal anu jadi cekelan ngeunaan hénpon entragan anyar ieu, béda reujeung Andromax saméméhna anu dijieun ku pabrik Hisense. Hénpon Andromax V mah ngagunakeun hénpon kaluaran ti ZTE, nyaéta ZTE N986.

Ari hargana kumaha…?

Ngeunaan hargana lumayan lamun dibandingkeun reujeung Adromax saméméhna mah. Tapi lamun ngilikan kana spesipikasi katut kamonésanana, moal mahal teuing. Harga ieu hénpon téh 2,3 juta, kalawan meunang bonus jatah internétan 1,5 GB.

Spesipikasi lengkepna, bisa diilikan di handap ieu:

  • CDMA 2000 1x EVDO Rev A + GSM EDGE
  • Android 4.2 Jelly Bean
  • Layar IPS 5 Inci
  • Resolusi layar HD 1280×720
  • Kaméra dua: kaméra tukang 8 MP dilengkepan Led Flash, kaméra hareup 1 MP
  • Prosésor Quad Core 1,2 GHz MT6589E + VIA CBP 8.2D
  • Prosésor grapik PowerVR SG5X
  • RAM 1 GB
  • Mémori luar SD Card nepikeun ka 32 GB
  • Layarna jinis kapasitif Multi-Touch
  • Batréna Li-Ion 2.300 mAH
  • WIFI kalawan kamampuhan Hotspot
  • Dilengkepan ku GPS
  • Ngarékam pidio HD 1080p
  • Bluetooth 3.0
  • Micro-USB
  • Kartu SIM CDMA RUIM + GSM

Ngajalankeun Aplikasi Android dina Komputer


Pikeun nyobaan aplikasi anu dijalankeun dina hénpon Android teu kudu waé miboga hénpon Androidna. Najan henteu boga hénpon Android ogé ayeuna mah bisa nyobaan ngajalankeun aplikasi Android. Ngajalankeun aplikasina ngaliwatan komputer. Ngan ngajalankeun aplikasi Androidna henteu bisa langsung sakumaha ngajalankeun aplikasi dina komputer séjénna atawa sakumaha ngajalankeun aplikasi Android dina hénpon Android.

Emulator Android BlueStacks
Emulator Android BlueStacks

Supaya aplikasi Android bisa dijalankeun dina komputer, kudu masang heula émulator Android dina komputerna. Aplikasi anu arék dijalankeun téh dijalankeunana ngaliwatan émulator Android. Salian ti pikeun nyobaan aplikasi Android anu geus aya di Play Store, émulator Android ogé bisa dipaké pikeun nyobaan aplikasi anu keur dijieun, saméméh diasupkeun ka Play Store. Naha aplikasi anu dijieun téh geus loyog atawa acan. Aya sababaraha émulator Android anu kapanggih di mandala maya. Lamun hayang, kari ngundeur waé ti internét.

  1. BlueStacks, mangrupakeun salasahiji émulator anu alus pikeun nyobaan ngajalankeun aplikasi Android dina komputer. Ieu émulator bisa ngajalankeun aplikasi Android anu anyar atawa anu geus heubeul. Aplikasi pikeun hénpon Android (miboga ekstensi .apk) bisa dijalankeun dina ieu émulator. Pikeun ngajalankeun aplikasi Android dina ieu émulator kacida gampangna. Kari teken kenop katuhu dina mouse payil aplikasi Androidna, terus pilih Open With BlueStacks APK Installer. Pikeun sawatara waktu mah, ieu émulator téh masih kénéh haratis. Teuing ka hareupna mah.
  2. Jar of Beans mangrupakeun émulator anyar, anu diwangun ku “UnrealManu”. Ieu émulator ngarojong aplikasi jeung kaulinan (gim) Android Jelly Bean. Emulator Jar of Beans bisa disebutkeun émulator kadua pangalusna saentasna BlueStacks dina ngajalankeun aplikasi jeung kaulinan Android.
  3. AMD AppZone, mangrupakeun émulator pikeun kaulinan (gim) Android anu dirojong ku BlueStacks. Ieu émulator dijieun husus kalawan haratis pikeun anu mikaresep kana kaulinan Android 3D. Jadi tujuan utama ieu émulator mah pikeun ngajalankeun kaulinan Andoid 3D dina komputer. Ngan hanjakal, komputer anu bisa dipaké pikeun ngajalankeun ieu émulator mah kudu ngagunakeun prosésor ti AMD. Sabenerna mah lain ngan ukur kaulinan wungkul anu bisa dijalankeun dina ieu émulator téh, da aplikasi séjénna ogé bisa dijalankeun dina ieu émulator. Pikeun daptar aplikasi anu bisa dijalankeun dina ieu émulator bisa dilongok dina kaca aplikasi AppZone di mandala maya.
  4. YouWave, mangrupakeun émulator aplikasi pikeun hénpon Android entragan 2.3 kalawan bisa mangrupa hénpon atawa tablét. Ieu émulator geus nyadiakeun application store anu bisa dipaké pikeun néangan aplikasi anu dipikahayang atawa anu baris dijalankeun. Kakurangan ieu émulator mah nyaéta aya sababaraha aplikasi anu henteu bisa dipasang jeung dijalankeun. Ieu émulator henteu bisa dipaké pikeun ngajalankeun kaulinan saperti Angry Birds. Ieu émulator bisa dicoba salila 10 poé, saterusna mah kudu dibeuli lamun hayang émulator ieu jalan kalawan sampurna.

(Inpo ti Tech Trix)

Rupa-rupa Pakakas pikeun Nyieun Rupa-rupa Aplikasi Mobile


Mekarna rupa-rupa parabot keupeul (hénpon) dibarengan reujeung mekarna rupa-rupa sistem operasi anu dipelak dina unggal parabot keupeul. Béda parabot keupeul bisa waé miboga sistem operasi anu béda. Antara hiji jinis hénpon reujeung jinis hénpon anu séjén, miboga sistem operasi anu béda. Bédana sistem operasi ieu nyababkeun unggal parabot keupeul (hénpon) miboga kamonésan, kamampuhan jeung pasipatan anu béda-béda. Atuh pikeun anu arék nyieun aplikasi mobile téh mikabutuh pakakas pikeun nyieun aplikasi mobile anu ngawengku sakabéh sistem operasi. Supaya dina sakali nyieun aplikasi mobile téh bisa diterapkeun (dipasang) dina unggal hénpon anu béda-béda sistem operasina. Henteu kudu susah-susah nyieun aplikasi anu béda-béda pikeun unggal sistem operasi.

Pakakas pikeun ngawangun aplikasi mobile dina rupa-rupa henpon
Pakakas pikeun ngawangun aplikasi mobile dina rupa-rupa henpon

Untungna ayeuna geus aya anu nyadiakeun pakakas anu bisa dipaké nyieun aplikasi mobile pikeun rupa-rupa hénpon/sistem operasi. Aya sababaraha pakakas anu geus kawentar kalawan sadia di mandala maya, kari ngundeur waé.

  1. RhoMobile, mangrupakeun salasahiji rangkay gawé anu dumasar kana Ruby. Ieu pakakas bisa digunakeun ku anu nyieun aplikasi mobile anu diancokeun husus (native) anu ngawengku rupa-rupa sistem operasi dina hénpon saperti Android, Windows Mobile, Symbian, iPhone katut RIM. Rangkay gawé anu dipedalkeun ku RhoMobile ieu bisa dipaké pikeun nyieun aplikasi mobile anu bisa dijalankeun dina rupa-rupa hénpon. Sakali nyieun aplikasi mobile, éta aplikasi anu dijieunna bisa dipaké dina sababaraha jinis hénpon anu béda-béda sistem operasina.
  2. PhoneGap, bisa dipaké pikeun nyieun aplikasi dina parabot keupeul Android, Palm, Symbian, BlackBerry, iPhone, iTouch jeung iPad. Pakakas ieu ngagunakeun basa anu osok dipaké dina nyieun aplikasi loka/web standar saperti HTML jeung JavaScript. PhoneGap bisa dipaké pikeun nyieun aplikasi mobile anu ngaksés kamonésan hardware saperti accelerometer, GPS/lokasi, kaméra, sora jeung sajabana.
  3. Appcelerator, bisa disebut ogé Titanium Development Platform anu dikaluarkeun ku Appcelerator. Ieu pakakas bisa dipaké pikeun ngawangun aplikasi mobile, tablet ogé aplikasi desktop ngaliwatan basa pemrograman web saperti HTML, PHP, JavaScript, Ruby jeung Python. Cenah mah, aplikasi anu dijieun maké ieu pakakas bisa nepikeun ka 1000 aplikasi dina sabulanna. Kapinunjulan ieu pakakas mah nyaéta anu makéna bisa ngaksés 300 informasi API jeung lokasi. Salian ti éta ogé aya panambahna, nyaéta: event/kajadian dina aplikasi bisa diobah-obah, aplikasi anu dijieunna bisa dumasar kana hardware sacara langsung, katut data anu diperlukeun ku aplikasina bisa diteundeun di parabot keupeulna langsung atawa di cloud.
  4. MoSync, mangrupakeun pakakas pikeun ngawangun aplikasi mobile anu dumasar kana pemrograman web standar. Ieu pakakas bisa dipaké ku anu ngawangun aplikasi kalawan ngawengku kana compiler, librari, runtime, device profile jeung parabot séjénna anu loba gunana. Salian ti ngarojong basa pemrograman JavaScript, PHP, Ruby, Python jeung nu séjénna, MoSync ogé ngarojong basa C/C++. MoSync bisa dipaké pikeun nyieun aplikasi mobile dina sistem operasi Windows Mobile, Windows Phone, iOS, BlackBerry, Android, Symbian, Moblin jeung sababaraha sistem operasi Linux pikeun parabot keupeul.

(Dicutat ti about.com, gambar meunang nginjeum ti mosync.com)

Mikawanoh MoSync SDK


Naon atuh MoSync téh?

Ceuk gampangna mah, MoSync téh mangrupakeun hiji pakakas atawa parabot anu bisa dipaké pikeun nyieun aplikasi pikeun hénpon (aplikasi mobile). Ieu pakakas téh sipatna haratis jeung kodeuna dibuka (open source). Ieu pakakas geus dibuntel reujeung Eclipse development environment pikeun nyieun jeung ngarobah kodeu aplikasi mobile anu dijieun. MoSync bisa dipaké pikeun nyieun aplikasi mobile anu bener-bener diancokeun pikeun inyana (native) pikeun sababaraha jinis hénpon kalawan rupa-rupa sistem operasi kalawan maké script html5 jeung turunan atawa campuranana. Anu ditojo ku ieu parabot mah nyaéta pikeun anu mekarkeun aplikasi wéb anu hayang ilubiung kana widang aplikasi mobile reujeung anu mekarkeun aplikasi desktop PC anu nyangking pangaweruh bahasa C/C++. MoSync dipedalkeun ku pausahaan asal nagri Swedia, MoSync AB (ngaran baheulana mah Mobile Sorcery AB).

MoSync SDK
MoSync SDK

Aplikasi anu dijieun maké MoSync ditulis maké basa C jeung C++ atawa digabung reujeung HTML5 jeung Javascript. Kusabab kitu, MoSync bisa dipaké pikeun nyieun aplikasi mobile pikeun rupa-rupa hénpon atawa parabot keupeul kalawan rupa-rupa sistem operasina. Sistem operasi hénpon anu dirojong ku MoSync, nyaéta Android, iOS, Windows Mobile, Windows Phone, Symbian S60, Java Mobile katut Moblin.

MoSync entragan anu panganyarna, persi 3.2 dibekelan ku pangabisa pikeun ngaroris aplikasi anu dijieun dina henpon/parabot keupeul sacara langsung (on-device debugging) kalawan ngarojong librari jeung API tambahan dina Android 4.x, jeung tambahan pangabisa séjénna. Pakakas MoSync miboga kamonésan pikeun mariksa/ngaroris kodeu Javascript anu dijieun (nangtukeun titik ngarandegna, masang jeung ngajalankeun aplikasi dina parabot keupeul bari mariksa kodeu anu dijalankeunana ngaliwatan pakakas anu disadiakeun). Pangrojongna kana sistem operasi Android ogé geus diakurkeun reujeung sistem operasi Android panganyarna, anu nyababkeun moal aya masalah lamun aplikasi anu dijieunna arék dijalankeun dina parabot keupeul Android panganyarna.

Pikeun anu hayang nyobaan jeung maké ieu pakakas, bisa langsung waé nyondong ka loka MoSync.

Smartfren Andromax-i, Henpon Android dua Kartu ti Smartfren


Sanggeus ngaluarkeun sababaraha jinis hénpon Android, Smartfren ngaluarkeun deui hénpon Android anu anyar. Sakumaha ngaran hénpon Android saméméhna, ieu hénpon ogé maké ngaran anu sarua kalawan dirarangkenan i, jadi Smartfren Andromax-i. Ieu hénpon téh bisa jadi pikeun gaganti hénpon Andromax saméméhna.

Nilik kana kamonésanana mah, alus ogé ieu hénpon téh. Jeroanana ogé ampir sarua reujeung hénpon Android kaluaran ti pausahaan anu geus kawentar. Hal ieu bisa diilikan dina jinis prosésor anu dipakéna. Prosésor anu diterapkeu dina ieu hénpon téh geus dual-core kaluaran ti Qualcomm, Snapdragon 1 GHz kalawan ditambahan kuayana GPU Adreno 203 pikeun ngokolakeun grapisna. Terus ogé layar anu dipakéna lumayan gedé, 4 inci ukuranana kalawan geus miboga kamampuhan pikeun nangkep inputan lima ramo (multitouch). Entragan Android anu dipakéna geus pérsi anu anyar, Android 4.0 ICS (Ice Cream Sandwich). Kaméra anu dipakéna miboga resolusi 5 MP pikeun kaméra tukang, sedengkeun kaméra hareupna miboga resolusi 1,3 MP. Aya ogé paranti nyetél radio FM.

Kusabab ieu hénpon téh dibekelan slot kartuna dua, ieu hénpon salian ti bisa dipaké dina jaringan Smartfren, bisa ogé dipaké dina jaringan GSM ku jalan nerapkeun kartu GSM naon waé. Ngan, cenah kartu GSM-na moal bisa dipaké lamun kartu Smartfren-na henteu diterapkeun. Hanjakalna, jaringan GSM ieu hénpon tacan ngarojong jaringan 3G ka luhur. Kartu GSM-na ngan ukur bisa dipaké dina jaringan 2G (nelepon jeung SMS), teu bisa dipaké pikeun internétan. Tapi teu nanaon, da internétan bisa maké jaringan Smartfren.

Pikeun kamonésan séjénna mah, hénpon ieu ogé dilengkepan ku kamonésan sakumaha hénpon Android séjénna.

Henpon Smarfren Andromax-i

Sanajan ieu hénpon téh miboga kamonésan jeung spésipikasi anu alus, hargana mah lumayan murah. Harga standarna mah sajuta satengah. Ngan salila promosi mah, ieu hénpon téh dijual kalawan harga sajuta dua ratus rébu kurang sarébu (1.199.000). Anu meuli ieu hénpon bakal meunang bonus pakét internét salila 12 bulaneun anu gedéna 1GB dina sabulanna.