Ngaronjatkeun Flyme di Meizu M2 Note


Meunang inpo ti internét, heuseusna loka Flyme, cenah sistem operasi Android pikeun parabot keupeul Meizu anu dingaranan Flyme geus aya anu anyar nyaéta entragan 5.1.

Dina pintonan hareup éta loka nembrak gambar angka jeung Flyme 5 katut katerangan pondokna. Katerangan anu ngajelaskeun yén Flyme 5 mangrupakan sistem operasi anu dijieun dumasar kana Android 5.1. Sistem operasi Flyme 5 leuwih alus jeung leuwih kuat tibatan entragan saméméhna.

Flyme 5 bisa dipaké pikeun parabot keupeul jinis M2 Note jeung MX4. Kari ngundeur waé tina lambaran Download, terus pilih parabot keupeul anu dipibanda. Pikeun ngundeurna alusna mah ngagunakeun parabot keupeulna langsung ngagunakeun panyungsi internét. Gedéna payil waktu ngundeur pikeun Meizu M2 Note 801 méga. Lambaran heuseus ngundeur payilna bisa langsung nyungsi ka alamat http://www.flymeos.com/firmwarelist?modelId=3&type=1. Pilih baris Flyme 5.1.5.0G terus teken kenob Download. Tungguan waé nepikeun ka réngséna.
Kumaha cara masangna?

Pikeun masangna, teken waé payil hasil ngundeurna. Bakal kaluar jandela anu negeskeun ngeunaan ngaronjatkeun Flyme. Lamun bener-bener arék ngaronjatkeun, kari teken waé Reboot. Pilihan céklis Wipe User Data dipaké pikeun mupus data dina parabot keupeul. Sanggeus pareum bakal hurung deui bari kaluar katerangan Checking Firmware. Tungguan waé nepikeun réngséna.

Saterusna bakal nincak kana undakan ngaronjatkeun Flyme (Upgrading). Tungguan sabab rada lila. Sanggeus réngsé bakal pareum sorangan terus hurung deui. Disambung ku undakan Optimizing app. Lilana gumatung kana lobana aplikasi anu geus aya dina parabot keupeul. Tungguan nepikeun ka réngséna.

Sawatara pintonan anyar sanggeus Meizu M2 Note dironjatkeun sistem operasina kana Flyme 5.1
Sawatara pintonan anyar sanggeus Meizu M2 Note dironjatkeun sistem operasina kana Flyme 5.1

Sanggeus réngsé, parabot keupeul Meizu M2 Note geus bisa dipaké kalawan sistem operasi anu anyar. Naon waé atuh kamonésan jeung kapinunjulan anu dipibanda ku Flyme 5? Tungguan waé dina tulisan saterusna….

Kabita Ku Meizu M2 Note


Sabenerna mah geus sawatara waktu anu geus kaliwat. Nilik kana kapinunjulanana, sanajan ieu hénpon téh jieunan pabrik di Cina, matak kabita. Ditambah deui ku hargana anu jauh lamun dibandingkeun reujeung hénpon sarimbagan anu dijieun ku pausahaan anu geus kawentar. Da cenah, ayeuna mah béda reujeung anu enggeus-enggeus. Sanajan jieunan Cina tapi kualitasna mah leuwih alus atawa bisa nyaruaan kana hénpon jieunan pausahaan anu kawentar.

Henpon Meizu M2 Note
Henpon Meizu M2 Note

Nilik kana data anu diancokeun ku sawatara loka mah, aya sababaraha kapinunjulan anu dipibanda ku éta hénpon. Diantara kapinunjulan anu diancokeun nyaéta:

  1. Ukuran layarna anu gedé nyaéta 5,5 inci. Kawilang gedé pikeun ukuran hénpon biasa. Condong kénéh disebutna téh phablet (hénpon tablet). Ditambah deui ku teknologi anu dipaké dina layarna nyaéta geus ngagunakeun téknologi IGZO anu alus pikeun ngurangan pangabutuh listrik. Terus resolusinya ogé gedé nyaéta 403 PPI kalawan kontrasna nepikeun ka 1.000 banding 1.
  2. Ukuran hénponna anu kawilang ipis jeung hampang. Kandelna ngan ukur 8,7 miliméter kalawan beuratna 149 gram. Cangkan tukangna mibanda rupa-rupa warnana. Tinggal milih hayang anu rupa kumaha: aya anu héjo, hawuk, kayas jeung bodas.
  3. Pikeun ngajalankeun gawéna, hénpon Meizu M2 Note dibekelan ku prosesor 64-bit dalapan inti (octa-core) anu dilengkepan ku prosesor grafis tilu inti (triple-core). Prosesor anu dipakéna kaluaran ti Mediatek nyaéta seri MT6753. Prosesor ieu bisa ngajalankeun sagala rupa pagawéan ti mimiti pagawéan anu hampang nepikeun ka anu beurat kayaning kaulinan tilu dimensi (game 3D).
  4. Pikeun nyambungkeun ka jaringan seluler, ieu hénpon dibekelan ku dua tempat kartu SIM. Duanana mibanda kamampuan pikeun nyambung kana jaringan seluler 4G, jadi lain ngan hiji. Duanana bisa jalan babarengan, teu kudu ganti-ganti. Hanjakal waé ukuran SIM-na geus ukuran nano, jadi lamun mibanda kartu SIM biasa, kudu diteukteuk heula da moal asup.
  5. Terus kamerana. Hénpon Meizu M2 Note dibekelan dua kaméra, di tukang jeung di hareup. Anu tukang mibanda resolusi 13 megapiksel sedengkeun anu hareup 5 megapiksel. Kaméra anu tukang dilengkepan ku lampu léd dua siki (dual-tone flash) pikeun nyaangan anu arék dipotrét.
  6. Pikeun ngalistrika ieu hénpon, Meizu M2 Note dilengkepan ku batré anu ukuranana 3.100 mAh kaluaran ti SONY/ATL. Kawilang gedé.
  7. Terus sistem operasina geus ngagunakeun Android entragan 5.1 atawa Lollipop. Sistem operasina geus diropéa kalawan dingaran Flyme 4.5. Jadi dina pintonanana, henteu dina wangunan Android 5.1 Lollipop deui, tapi geus robah.

Tina sawatara kapinunjulan éta, ahirna mah nyeungceum waé ieu hénpon.

(Gambar meunang nginjeum ti Meizu)

BandrOS, Tina Kadaharan jadi Sistem Operasi Hénpon


Saha anu teu apal kadaharan anu ngaranna bandros? Pasti geus papada apal. Bandros téh salasahiji jinis kadaharan anu dijieunna tina tipung béas anu dicampur reujeung parud kalapa. Diasakanana saperti surabi maké citakan satengah buleudan tur rada ipis. Ngeunah pisan didaharna nalika haneut kénéh.

Sistem operasi BandrOS dina henpon
Sistem operasi BandrOS dina henpon

Ngaran bandros ieu, nalika dipaké ku LIPI mah lain ngaran kadaharan tapi ngaran perkara anu lian jinis. BandrOS (ngagunakeun hurup O jeung S anu gedé) dipaké ngaran pikeun hiji jinis sistem operasi pikeun hénpon pinter saperti Android atawa iOS. Nurutkeun inpo, ieu sistem operasi téh dijieun ku urang Indonésia (di LIPI) kalawan maké dadasar tina Linux. Sanajan maké dadasar tina Linux, BandrOS béda reujeung sistem operasi hénpon Android. Lamun dipanjangkeun mah BandrOS téh mangrupakeun singketan tina Bandung Raya Operating System. Sistem operasi BandrOS ieu mimiti diwangun dina taun 2010.

Nurutkeun rarancangna mah, BandrOS mangrupakeun gabungan hardware jeung software husus jieunan LIPI. Hardwarena mangrupa parabot keupeul (handset) anu dilengkepan ku kartu SIM dua siki, kamérana 2 MP kalawan dirojong prosésor 1 GHz. Ngan pikeun sawatara waktu ayeuna mah masih kénéh dina rupa software anu bisa diasupkeun kana hénpon Android.

Sakumaha sistem operasi hénpon séjénna, BandrOS ogé nyadiakeun kamampuhan pikeun ngirim talatah reujeung maén gim (kaulinan). Ngan salian ti kamampuhan anu biasa éta, BandrOS ogé dilengkepan ku kamampuhan séjénna anu tacan tangtu aya dina sistem operasi séjén saperti Android. Kamampuhan anu jadi kapinunjulan BandrOS diantarana waé nyaéta bisa dipaké pikeun kaperluan husus saperti ‘peringatan dini bencana’ katut henteu bisa ‘disadap’. Pikeun ngarojong pangabutuh husus séjénna, LIPI bisa nyieun aplikasina diluyukeun reujeung pangabutuh.

(Potret meunang nginjeum ti Merdeka.com)

Akibat Gilinding Kahirupan anu Muter, Nokia Dijual ka Microsoft


Ngadéngé ngaran Nokia, ampir kabéhanana moal bireuk deui. Ngaran Nokia geus jadi kacapangan lamun pakait reujeung hénpon. Bener ogé, ngaran Nokia teu bisa leupas tina hénpon, da Nokia mah pausahaan anu kaceluk tukang nyieunan hénpon. Sagala rupa hénpon Nokia, ti mimiti anu murah nepikeun ka anu mahal, aya jeung bisa ditéangan atawa dibeuli. Jeung geus papada apal lamun sagala rupa mérk hénpon kaluaran Nokia mah sarua jeung gampang cara makéna: lamun kudu ganti hénpon téh, teu kudu diajar deui. Terus, pikeun ngaranna ogé, hénpon Nokia mah henteu jauh tina angka anu jumlahna opat siki, ti mimiti angka 1 nepikeun ka angka 9.

Teu anéh lamun kacida pisan lobana jinis hénpon anu dikaluarkeun ku pausahaan Nokia pikeun dijualan di sakuliah dunya. Jeung teu anéh kulobana jinis hénpon anu bisa dipilih luyu reujeung pangabutuh katut pangaresep anu meulina, pausahaan Nokia jadi rajana pausahaan hénpon. Pausahaan séjén kayaning Samsung, Siemen, Ericsson, jeung LG henteu bisa ngéléhkeun pausahaan anu asalna ti nagri Finlandia ieu. Di nagri Indonésia ogé, rupa-rupa hénpon kaluaran Nokia gampang pisan manggihanana. Pikeun sawatara waktu, Nokia jadi jawarana di widang nyieunan katut ngajualan hénpon.

Nyérélékna waktu, mawa robah kana kaayaan. Jaman kadigjayaan Nokia geus kaliwat. Jaman ayeuna, Nokia henteu jadi jawara deui dina widang nyieun/ngajual hénpon. Ayeuna Nokia bisa kaéléhkeun ku pausahaan séjén kayaning Samsung jeung Apple. Éléhna Nokia ku pausahaan séjén lain taya sabab. Loba anu bisa dijadikeun alesan kunaon Nokia bet bisa kaéléhkeun ku pausahaan séjénna.

Salasahiji anu jadi alesanana nyaéta Nokia leuir teuing dina ngigelan jaman. Nalika widang hénpon robah jadi smartphone (hénpon pinter), Nokia henteu buru-buru ngiluan anclub. Nalika Apple ngawanohkeun iPhone dina taun 2007, anu jadi tanda mimiti nanjeurna smartphone anu layarna bisa ditoélan, Nokia mah angger waé ulukutek reujeung hénpon jieunana anu masih kénéh maké kipéd. Nalika iPhone nanjeur, Nokia tacan miboga rarancang pikeun ngigelanana: Nokia masih ngandelkeun smartphone entragan E kalayan sistem operasi Symbian séri 60.

Nokia beuki tinggaleun nalika Google ngaluarkeun sistem operasi Android, kalayan disusul ku lobana pausahaan anu nyieun hénpon pinter anu maraké Android kayaning HTC, Samsung jeung LG. Sanajan ahirna Nokia anclub kana widang hénpon pinter ngaliwatan séri Lumia anu dibekelan sistem operasi Windows Phone, Nokia geus leuir teuing. Nokia ahirna mah tinggaleun ku Samsung jeung Apple. Hénpon pinter entragan Lumia henteu bisa nulungan Nokia pikeun ngudag pausahaan séjénna anu bisa ngéléhkeun inyana. Salian ti éléh di widang hénpon pinter, di widang hénpon biasa anu hargana murah ogé ahirna mah Nokia kaéléhkeun ogé ku pausahaan ti nagri Cina kayaning ZTE jeung Huawei.

Nokia dibeuli ku Microsoft
Nokia dibeuli ku Microsoft

Antukna mah, pausahaan tukang nyieun hénpon Nokia téh dijual ka Microsoft anu ngaluarkeun sistem operasi Windows Phone. Ngan henteu sakabéh pausahaanana anu dijual téh. Ngan ukur bagéan nyieun hénpon katut serpis wungkul. Nokia bakal manco dina widang jaringan selulér, sérpis peta katut pangwangunan téhnologi.

(Gambar meunang nginjeum ti Nokia)

New Andromax-i, Smartphone Andromax-i nu Leuwih Punjul


Telepon pinter atawa smartphone entragan Andromax-i mangrupakeun salasahiji smartphone anu kawilang suksés di pasaran anu dikaluarkeun Smartfren. Nilik kana spésipikasina anu alus dibandingkeun reujeung hargana anu kawilang murah, kacida murahna ieu smartphone téh. Sanggeus kalindih ku smartphone entragan anyar anu masih kénéh ranggeuyan Andromax séjénna saperti Andromax-U jeung Andromax V, Smartfren ngaluarkeun entragan Andromax-i anu anyar.

Smartphone New Andromax-i kaluaran Smartfren
Smartphone New Andromax-i kaluaran Smartfren

Telepon pinter anya ieu dingaranan sarua reujeung lanceukna, Andromax-i ngan dibéré rarangkén New. Jadi waé ngarana téh New Andromax-i. Lamun nilik kana jinisna mah euweuh bédana reujeung smartphone Andromax-i anu tiheula. Wangunan cangkangna, arék belah hareup atawa belah tukang, sarua waé. Pon kitu deui reujeung kenop anu aya di handapeun layarna, henteu robah. Anu nyieun ieu smartphone ogé henteu robah angger kaluaran ti pausahaan Hisense.

Sanajan nilik kana wangunan luarna taya anu robah, sabenerna mah aya saeutik anu ditaékeun spesipikasina. Di belah tukangna, palebah kaméra dilengkepan ku lampu flash LED pikeun nyaangkan obyék anu dipotrét. Ari résolusina mah angger 5 MP. Ieu kaméra bisa ngarékam pidio kalawan kualitas HD. Terus layarna ukuranana sarua kénéh 4 inci. Ngan anu ngabédakeunana téh anu ayeuna mah dilengkepan ku lapisan OCA (Optically Clear Adhesive) anu nyababkeun layarna leuwih beresih jeung leuwih alus gambar dina layarna.

Salian ti éta, anu robah téh nyaéta spesipikasi prosesor anu dipakéna. Entragan anyar mah galura gawéna leuwih ningkat jadi 1,2 GHz. Entragan Androidna oge milu naék jadi persi 4.1 Jelly Bean. Spesipikasi bagéan anu séjénna mah henteu aya anu robah.

Ngeunaan hargana, henteu pati robah. Hargana sabanding reujeung harga lanceukna, Rp 1.299.000. Kalawan harga dina waktu promosi dipotong saratus rébu.