Adu Pinalti Salapan Ingkigan, Jérman Ngeureunkeun Itali


Hiji tatandang dina undakan parapatfinal Piala Éropa 2016 anu kacida campuhna dilumangsungkeun peuting tadi. Tatandang katilu ieu nepungkeun dua jawara Éropa nyaéta Jérman jeung Itali. Duanana mangrupakeun tim anu geus ngalaman jadi jawara Piala Éropa saméméhna. Ieu tatandang dilumangsungkeun di Stade De Bordeaux.

Nurut prakiraan mah, tim Jérman bakal ngawasa jalanna tatandang. Hal ieu nilik kana tatandang dina undakan saméméhna, tim Jérman teu pernah kaéléhkeun. Sedengkeun tim Itali mah apanan pernah éléh dina tatandang panungtungna undakan kahiji. Ditambah deui ku pamaén anu ngeusi tim Jérman leuwih aralus tibatan tim Itali.

Prakna tatandang, pamaén Itali bisa ngaladénan tim Jérman. Sanajan pamaén Jérman leuwih ngawasa jalanna tatandang, tapi ngan saeutik kasempetan anu dipibanda pikeun ngagulkeun. Sedengkeun Itali ngan mibanda kasempetan ngaliwatan Stefano Sturaro. Sakabéh panarajang loba anu reunghas di tengah jalan. Taya gul anu bisa dicitak salila babak kahiji ieu.

Nincak babak kadua, pamaén Jérman leuwih tanghinas deui narajang ka gawang Itali. Ayeuna mah leuwih loba kasempetan anu dipibanda pikeun ngagulkeun. Sedengkeun pamaén Itali leuwih loba nahan panarajang pamaén Jérman. Ahirna dina menit ka-65, Jérman bisa ngagulkeun ngaliwatan pamaén tengahna, Mesut Ozil anu najong bal di kotak pinalti tim Itali. 1-0 pikeun Jérman.

Tatandang campuh antara Jerman ngalawan Itali
Tatandang campuh antara Jerman ngalawan Itali

Kapunjulan Jérman teu bisa lila. Dina menit ka-75 tim Itali bisa males gul Jérman ngaliwatan tajongan pinalti Leonardo Bonucci. Pinalti dipibanda ku Itali sanggeus pamaén Jérman, leungeun Boateng kakeunaan bal dina kotak pinalti. Nepikeun ka waktuna béak, taya deui gul anu bisa dicitak.

Kapaksa diteruskeun kana babak tambahan, 2 x 15 menit. Hanjakal salila babak tambahan ieu, taya gul anu bisa dicitak ku dua patandang. Gulna angger 1-1. Antukna diteruskeun kana babak adu pinalti.

Dina babak adu pinalti ieu, dua tim gedeg waé nepikeun ka dalapan kali tajongan pinalti. Kakara dina tajongan kasalapan, Jérman bisa ngéléhkeun Itali 6-5.

(Potret meunang nginjeum ti Sidomi)

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s