Nu Boga Hajat katut Jérman jeung Bélgia Asup Undakan Saterusna


Tatandang poé kadua undakan kadua Piala Éropa nepungkeun genep patandang dina tilu tatandang. Tatandang kahijina nepungkeun anu boga hajat, nyaéta nagri Perancis ngalawan tim Irlandia. Tatandang kaduana nepungkeun Jérman reujeung Slowakia, katut anu panungtungan nepungkeun Hungaria ngaladénan Bélgia.

Tatandang kahiji bisa dimeunangkeun ku anu boga hajat kalawan gulna 2-1. Dina ieu tatandang anu boga hajat tinggaleun tiheula dina harti bisa kagulan tiheula. Kakara ogé nincak menit kadua, Perancis geus kagulan. Gul lawanna dicitak ku Robbie Brady ngaliwatan tajongan pinalti. Pinalti tumiba ka tim Perancis sanggeus Paul Pogba dianggap anu nyababkeun labuhna Shane Long dina kotak pinalti Perancis. Kapinunjulan Irlandia teu robah salila babak kahiji.

Nincak babak kaduana, Perancis kakara bisa nyaruakeun kaayaan malahan bisa ngaleuwihan gul Irlandia. Pamaén hareup Perancis, Antoine Griezmann ahirna bisa nyitak gul pikeun nyaruakeun kaayaan dina menit ka-58. Terus tilu menit satutasna, manéhna bisa nyitak deui gul pikeun ngaléngkahan gul Irlandia jadi 2-1. Kaayaan gulna teu robah nepikeun ka waktu tatandangna béak. Perancis teu bisa nambahan deui gul sanajan tim Irlandia ngurangan pamaénna saurang satutasna Duffy dibéré kartu beureum sanggeus ngagubragkeun Antoine Griezmann di deukeuteun kotak pinalti.

Tatandang kadua nepungkeun jawara Éropa anu geus nyangking tilu Piala Éropa, nyaéta tim Jérman. Lawanna nagri pamekaran nagri Cekoslowakia, nyaéta Slowakia. Hasil tina ieu tatandang, Jérman leuwih punjul tibatan lawanna. Tilu gul dicitak ku pamaén Jérman bari teu bisa dibales hiji-hiji acan. Tilu gul tim Jérman dicitak ku tilu pamaén anu posisina béda: pamaén tukang (bék), pamaén tengah jeung pamaén hareup.

Gul Perancis ka gawang Irlandia ku Antoine Griezman
Gul Perancis ka gawang Irlandia ku Antoine Griezman

Gul kahiji tim Jérman dicitak dina menit ka dalapan ngaliwatan tajongan békna, Jerome Boateng. Manéhna najong bal ti luareun kotak pinalti anu teu bisa ditahan ku kiper Slowakia. Gul kadua Jérman dicitak ku Mario Gomez dina menit ka-43 sanggeus narima operan ti Julian Draxler. Pamaén anu panungtung ieu ahirna mah bisa nambahan gul Jérman dina menit ka-63 sanggeus ngamangpaatkeun pahibutna kaayaan di hareupeun gawang Slowakia.

Jerman ngelehkeun Slowakia
Jerman ngelehkeun Slowakia

Sabenerna mah Jérman bisa waé nyitak gul leuwih ti tilu lamun tajongan pinalti anu dimeunangkeun ku tim Jérman bisa dimangpaatkeun kalawan alus ku Mesut Ozil dina menit ka-13. Hanjakal waé tajongan pamaén tengah Jérman ieu bisa katebak ku kiper Slowakia.

Tatandang pamungkas poé kadua nepungkeun Hungaria reujeung Bélgia. Dina ieu patandang Hungaria bisa ngawasa bal leuwih lila tibatan tim Bélgia. Hanjakal waé kapinunjulan ieu teu bisa dirobah jadi gul. Malahan sabalikna, tim Hungaria kudu ngaku kana kapinunjulan gul tim Bélgia sanggeus kagulan kawilang loba dina ieu tatandang. Hasil panungtunganana, opat gul bisa dicitak ku tim Bélgia ka gawang Hungaria.

Bungahna pamaen Belgia sanggeus ngelehkeun Hungaria
Bungahna pamaen Belgia sanggeus ngelehkeun Hungaria

Kapinunjulan Bélgia dimimitian dina menit ka-10 ngaliwatan Toby Alderweireld anu bisa neruskeun bal ka gawang Hungaria hasil tajongan bébas Kevin De Bruyne. Gul kaduana dicitak dina babak kadua ngaliwatan pamaén anu kakara asup, Michy Batshuayi. Gul katiluna ku kaptén Bélgia, Eden Hazard dina menit ka-81. Gul panungtungan dicitak ku Carrasco dina menit ka-90.

(Potret meunang nginjeum ti @UEFAEURO)

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s