Jalan Sumedang ka Wado Bakal Téréh Pegat?


Keur meumeujeuhna ramé, heuseusna di mandala maya ngeunaan cai bendungan Jatigedé anu geus nepi ka wewengkon Betok Desa Sukaménak Kacamatan Darmaraja. Cenah nurutkeun inpo anu panganyarna cai geus ngeueum pasawahan beh wetaneun jeung kideuleun Dusun Betok katut lembur Betokna sorangan. Malah cai ampir nepi ka jalan gedé anu nepukeun Sumedang ka wewengkon Wado jeung Jatinunggal. Cai bendungan téh geus nepi ka sisi jalan, anu leuwih handap. Cenah mah, jerona kira-kira 50 sénti antara beungeut cai reujeung jalan aspal téh.

Cai ti bendungan Jatigede geus nepi ka sisi jalan di Dusun Batok Darmaraja
Cai ti bendungan Jatigede geus nepi ka sisi jalan aspal di Dusun Batok Darmaraja

Nempo kana ieu kaayaan, lamun teu ditarékahan cenah moal lila deui ogé cai téh bakal nepi ka jalan aspal. Lamun cai nepi ka jalan aspal anu kaasup jalan propinsi ieu turta ngeueum ieu jalan, bakal nyababkeun pegatna patalimarga antara Sumedang reujeung béh kiduleun wewengkon Betok kayaning Wado jeung Jatinunggal. Lamun kakeueum komo jero kakeueumna, jalan di Betok ieu moal bisa diliwatan ku anu biasa lalar liwat ka wewengkon ieu, utamana kandaraan anu ngakutan pangabutuh jeung ngakut jalma.

Sabenerna pamaréntah ti béh ditu mula geus nyayagakeun jalan pikeun ngungkulan ieu kaayaan. Pamaréntah geus ngawangun jalan muter (jalan lingkar) di wewengkon Cikaréo anu bakal nepungkeun wewengkon Wado ka Darmaraja. Hanjakalna, ieu jalan téh tacan réngsé diwangunna (kakara sapotong anu diaspalna) katambah deui aya jalan anu ngagejlok ka handap. Jadi jalan muter ieu tacan bisa diliwatan ku kandaraan. Katambah deui sasak anu ngaliwatan walungan Cimanukna ogé tacan réngsé. Atuh jalan muter téh tacan bisa diandelkeun pikeun ngungkulan pegatna jalan propinsi di wewengkon Betok.

Antukna, Satuan Kerja Jatigedé méré inpo pikeun ngagunakeun jalan alternatip anu ngaliwatan jalan désa. Ti Alun-alun Darmaraja ngagunakeun jalan anu muru ka Cibugel, terus ka Rangon jeung Cikihiyang. Ti dieu asup ka Cisurat nepikeun ka pertelon Wado. Ngan hanjakal jalan désa mah leutik, teu lega. Jadi moal bisa diliwatan ku kandaraan gedé. Ku kandaraan leutik ogé lamun pasalingsingan téh kudu nyisi pisan salasahijina.

Hiji deui jalan anu bisa diliwatan, nyaéta jalur Darmaraja – Cibugel – Cibugel – Cipasang – Cisurat – Jalan Wado Malangbong. Tapi jalan ieu mah jauh pisan, bisa méakeun waktu nepikeun ka dua jam.

Tarékah séjénna bisa waé ku jalan miceun cai anu aya di bendungan Jatigedé ka hilir supaya ulah ngaluhuran terus. Kokocoran cai kahiji (dina élévasi 221 méter) bisa dibuka pikeun miceun cai ka hilireun bendungan. Ngan hanjakal ogé cenah cai anu asup ka ieu bendungan leuwih loba tibatan anu dipiceun ka hilirna.

Sanajan kitu, susuganan waé aya tarékah anu matih pikeun ngungkulan ieu kaayaan. Da pamaréntah ogé heuseusna pamaréntah Sumedang moal cicingeun, teu maliré kana kasusah rahayatna.

(Inpo: meunang ngumpulkeun ti sawatara sumber, potret: pesbuk Tita Rostiawati)

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s