Pangwangunan Monorél di Kabupatén Sumedang


Salasahiji program strategis pamaréntah Kabupatén Sumedang nyaéta pangwangunan jalan karéta api rél tunggal (monorél). Terus bakal diwangun di wewengkon mana ieu monorél téh? Nurutkeun inpo anu salila ieu sumebar, pangwangunan monorél anu ngaliwatan ka wewengkon Sumedang téh perenahna di wewengkon Tanjungsari. Monorél ieu bakal nepungkeun wewengkon Tanjungsari di Kabupatén Sumedang reujeung wewengkon Gedébagé di dayeuh Bandung.

Pangwangunan monorél ieu sabenerna mah mangrupakeun program anu dicawiskeun ku pamaréntah propinsi Jawa Barat. Salian ti monorél anu nepungkeun Gedébagé jeung Tanjungsari, aya opat deui jalur monorél anu baris diwangun ku pamaréntah propinsi Jawa Barat. Opatanana bakal nepungkeun Gedébagé ka Soréang (Kabupatén Bandung), Gedébagé ka Cimahi, Gedébagé ka Dago jeung Gedébagé ka Majalaya (Kabupatén Bandung).

Tina lima jalur ieu, anu pangheulana diwangun nyaéta jalur Gedébagé ka Tanjungsari. Jalur ieu bakal ngaliwatan Jatinangor kalawan jauhna 28 kilometér. Sapanjang jalurna bakal diwangun sawelas stasion.

Pangwangunan jalur monorél ieu mibanda tujuan pikeun ngungkulan padedetna patalimarga di jajalanan di wewengkon Bandung. Sakumaha anu katohiyan kiwari, jalan di wewengkon Bandung biasana osok padedet ku patalimarga kandaraan. Naha anu kaluar ti dayeuh Bandung pon kitu anu asup ka dayeuh Bandung. Arék ka kalér, ka kulon, ka kidul atawa ka wétaneun dayeuh Bandung. Atuh kuayana jalur monorél anu nepungkeun Tanjungsari ka Gedébagé, patalimarga anu ngaliwatan jajalaneun di Tanjungsari ka dayeuh Bandung teu padedet teuing.

Ngeunaan jalur anu dipakéna, cenah mah moal ngagunakeun jalur urut rél karéta api baheula jaman Walanda. Tapi bakal ngagunakeun jalur anu anyar.

Rarancang jalur monorel di dayeuh Bandung. Salasahijina nepungkeun Gedebage ka Tanjungsari
Rarancang jalur monorel di dayeuh Bandung. Salasahijina nepungkeun Gedebage ka Tanjungsari

Pangwangunan jalur monorél ieu, nurutkeun rarancang jeung kahayang bakal diwaragadan ku pamaréntah nagri China ngaliwatan China National Machinery Import and Export Corporation (CMC) salaku investor pangwangunan monorél di Bandung ieu. Pikeun pangwangunanana, heuseusna jalur Gedébagé – Tanjungsari dipiharep mimiti diwangun taun 2014 tug bakal réngsé dina taun 2016. Hanjakal nepi ka ayeuna, ieu pangwangunan téh tacan aya kelemeng-kelemengna deui.

(Inpo meunang nyutat ti sawatara sumber kayaning Seputar Jabar, gambar meunang nginjeum ti CityLight Residence)

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s