Pérsib Teu Kaéléhkeun di Grup A Piala Présidén 2015


Pérsib Bandung jadi kleub anu teu kaéléhkeun jeung teu kagulan dina tatandang Grup A Piala Présidén 2015. Dina tatandang panungtungan poé kamari ngalawan kleub Martapura FC, Pérsib Bandung meunang deui kalawan gul anu lumayan loba, 4-0.

Sanajan hasil tatandang kamari moal ngarobah kaayaan pikeun Pérsib Bandung anu geus asup kana undakan Parapatfinal, Pérsib Bandung tetep ngudag pikeun meunang. Pamaén anu dipaénkeun ku Pérsib aya parobahan. Kalolobaanana mah pamaén cadangan. Harepanana mah bisa ngistirahatkeun pamaén inti supaya ulah capé teuing jeung méré lolongkrang ka pamaén cadangan pikeun méngbal.

Dina ieu tatandang Pérsib Bandung geus bisa maénkeun deui Atép anu saméméhna kapapaténan dikantunkeun ku sepuhna. Di tengahna ogé bakal dieusi ku Makan Konaté. Di hareupna ogé Pérsib Bandung maénkeun deui anu saméméhna geus nyitak dua gul, Zulham Zamrun.

Breungna tatandang, Pamaén Pérsib Bandung langsung narajang ka wewengkon tukang Martapura FC. Operan bal antara pamaén Pérsib kacida alusna dina nyiptakeun kasempetan pikeun nyitak gul. Pamaén Pérsib Bandung teu loba teuing mamawa bal. Sakeudeung mawa balna mah, terus dioperkeun deui. Teu anéh lamun loba kasempetan anu dipibanda ku pamaén Pérsib Bandung pikeun nyitak gul.

Zulham Zamrun anu nyitak tilu gul pikeun Persib Bandung dina ngelehkeun Martapura FC
Zulham Zamrun anu nyitak tilu gul pikeun Persib Bandung dina ngelehkeun Martapura FC

Gul ahirna mah datang dina menit ka-13 ngaliwatan hédenan Zulham Zamrun. Bal operan ti Atép ditarima ku hédenan Yandi Sofyan, ngan hanjakal néngtog kana tihang gawang. Bal téngtogan téh dihéden deui Zulham Zamrun nepikeun ka asupna. 1-0 pikeun Pérsib Bandung. Saméméh babak kahiji réngsé, dina menit ka-42 Zulham Zamrun bisa nyitak gul deui sanggeus bisa najong bal ka gawang Martapura FC.

Nincak babak kadua, giliran Makan Konaté anu ngagulkeun. Dina menit ka-71, Makan Konate anu narima operan langsung najong bal ti luareun kotak pinalti nepikeun ka asupna. Gul panungtung Pérsib Bandung dicitak ku Zulham Zamrun dina menit ka-81. Gul dicitak ngaliwatan hédenan sanggeus narima operan ti Tantan. 4-0 pikeun Pérsib Bandung.

Martapura FC lain teu ngaladénan pamaén Pérsib Bandung. Da kasempetan datang ka pamaén Martapura pikeun nyitak gul. Ngan hanjakal teu bisa dijadikeun gul.

Kusabab tilu kali meunang, Pérsib Bandung jadi pinunjul kahiji di Grup A Piala Présidén 2015. Disusul ku Pérsebaya anu jadi pinunjul kadua di Grup A sanggeus meunang ngalawan Pérsiba Balikpapan kalawan gulna 4-1. Dua kleub ieu jadi dua patandang dina undakan Parapatfinal reujeung genep kleub séjénna.

(Potret meunang nginjeum ti Simamaung)

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s