Ngalawan Pérsebaya, Pérsib Meunang Deui


Tatandang kadua Pérsib Bandung dina turnamén méngbal Piala Présiden 2015 dilumangsungkeun poé kamari, Ahad ping 6 Séptémber 2015 di Stadion Si Jalak Harupat Soréang Kabupatén Bandung. Kleub anu jadi lawanna nyaéta Pérsebaya Surabaya. Dina ieu tatandang, Pérsib Bandung ngagunakeun wangunan 4-3-3. Pamaén hareup anu dipaékeunana tilu urang nyaéta Ilija Spasojevic anu ditambah Zulham Zamrun jeung Tantan.

Babak kahiji, dua kleub bisa disebutkeun imbang dina maénna. Duanana bisa silih tarajang ka wewengkon tukang tempat méngbal lawanna séwang-séwangan. Pérsib Bandung anu pangheulana bisa meunangkeun kasempetan pikeun nyitak gul ngaliwatan Tantan dina menit ka-8. Hanjakal tajonganana ka gigireun gawang Pérsebaya.

Ahirna dina menit kasawelas, Pérsib Bandung bisa nyitak gul ti heula. Gul dicitak ku Zulham Zamrun anu najong bal ku suku kéncana ti jero kotak pinalti sanggeus narima operan ti Tantan.

Tatandang antara Persib Bandung ngalawan Persebaya Surabaya
Tatandang antara Persib Bandung ngalawan Persebaya Surabaya

Pérsebaya lain teu mibanda kasempetan pikeun ngabales ieu gul. Tapi kasempetan anu dipibandana teu bisa dijadikeun gul. Sababaraha kasempetan dipibanda ku pamaén Pérsebaya ngaliwatan Evan Dimas jeung Ilham Udin.

Babak kahiji réngsé, gulna angger 1-0 pikeun Pérsib Bandung. Nincak babak kadua, Pérsib Bandung bisa nyitak gul deui pikeun nambahan skor jadi 2-0. Dina menit ka-52, Tantan anu mawa bal sorangan bisa ngasupkeun bal ka gawang Pérsebaya anu dijaga Jandry Pitoy.

Saterusna, pamaén ti dua kleub anu maén beuki campuh. Papada hayang ngagulkeun, nambahan gul jeung males gul. Teu anéh lamun nincak ahir babak kadua ieu wasit ngaluarkeun sababaraha kartu konéng pikeun nandaan pamaén anu maénna kaleuleuwihi. Hanjakal nepikeun ka waktuna béak, taya deui gul anu bisa dicitak.

Pérsib Bandung anu meunang pikeun kadua kalina, geus meunang cawisan pikeun asup ka undakan saterusna. Kari néangan kleub mana anu baris marengan ti Grup A ka undakan perempatfinal.

(Potret meunang nginjeum ti Simamaung)

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s