Pérsib Bandung Éléh, Mungkas Lekasan di Piala AFC 2015


Tatandang kamari, Pérsib Bandung diéléhkeun ku lawanna anu asalna ti nagri Hong Kong, Kitchee SC. Dina ieu tatandang Pérsib Bandung kagulan dua siki bari henteu bisa dibales. Dua gul kleub Kitchee SC dicitak ngaliwatan hédenan Juan Carlos Rodriguez dina menit ka-32 sanggeus narim operan bal ti Cheung Kin Fung reujeung dina menit ka-43 anu dicitak ku Lam Ka Wai anu najong bal hasil téngtogan bal anu ditajong ku Xu Deshuai.

Pérsib Bandung diéléhkeun ku Kitchee SC, 0-2
Pérsib Bandung diéléhkeun ku Kitchee SC, 0-2

Dina ieu tatandang sabenerna mah Pérsib Bandung ti anggalna kénéh ogé geus langsung ngadéséh Kitchee SC ngaliwatan dua sisi lapang. Ngan hanjakal unggal panarajangna teu ngahasilkeun. Taya anu bisa dijadikeun gul. Anu bisa ngagulkeun téh kleub lawanna anu bisa nyitak dua gul dina babak kahiji.

Nincak babak kadua, panarajang pamaén Pérsib Bandung leuwih remen deui pikeun ngudag gul anu tinggaleun dua. Panarajangna sarua ngaliwatan sisi lapang. Malahan pamaén Pérsib Bandung bisa disebutkeun ngawasaan satengah lapang méngbal. Hanjakal, ieu panarajang téh angger teu ngahasilkeun gul. Sanajan Pérsib Bandung ngaganti tilu urang pamaénna, angger waé teu ngadatangkeun gul anu ditutunggu. Nepikeun waktuna béak, gul angger 2-0 pikeun kapinunjulan Kitchee SC.

Pérsib Bandung kudu eureun léngkahna dina Piala AFC 2015 ieu, ngan ukur bisa nincak kana undakan 16 kleub. Mugia waé dina danget ka hareupna mah bisa jadi jawarana.

(Potret meunang nginjeum ti Liputan6)

Pérsib Bandung Ngalawan Kitchee SC dina Undakan 16 Kleub


Sanggeus bisa jadi jawara kahiji grup H Piala AFC, Pérsib Bandung bisa asup kana undakan saterusna, undakan 16 kleub. Dina ieu undakan Pérsib Bandung baris ngalawan kleub anu asalna ti nagri Hong Kong, Kitchee SC. Ieu kleub mangrupakeun jawara kadua di grup F. Salaku jawara grup, Pérsib Bandung kabagéan jadi anu boga hajat dina tatandangna. Tatandang antara Pérsib Bandung ngalawan Kitchee SC bakal dilumangsungkeun di Bandung, tegesna di Stadion Si Jalak Harupat. Waktuna, poé ayeuna pasosoré jam tiluan.

Pérsib Bandung ngalawan Kitchee SC pasosore ayeuna
Pérsib Bandung ngalawan Kitchee SC pasosore ayeuna

Tatandang undakan 16 kleub ngagunakeun sistem gugur kalawan sakali maén. Anu meunang dina ieu tatandang bakal asup kana undakan saterusna, undakan 8 kleub. Atuh pikeun Pérsib sorangan dina ngalakonan ieu tatandang taya deui anu dipikahayang salian ti kudu meunang. Modalna mah salian ti salaku anu boga imah dina tatandang, ogé dina tatandang saméméhna, Pérsib Bandung tacan pernah ngalaman kaéléhkeun. Sedengkeun kleub lawanna perenah sakali ngalaman éléh.

Sanajan kitu, lamun nilik kana kapinunjulanana mah, duanana ogé mibanda kakuatan anu sarimbagan. Pérsib Bandung mangrupakeun jawara liga di Indonesia, sedengkeun kleub Kitchee SC oge sarua mangrupakeun jawara di liga Hong Kong.

Mudah-mudahan waé atuh salaku anu boga imah, Pérsib Bandung bisa ngéléhkeun lawanna tur bisa tuluy maén dina undakan saterusna.

(Gambar meunang nginjeum ti Bolague)

Ping 1 Suklapaksa Asada 1951 Candra Kala Sunda


Ping 1 Suklapaksa Asada 1951 Candra Kala Sunda
Ping 1 Suklapaksa Asada 1951 Candra Kala Sunda

Sanajan Imbang, Pérsib Jawara Kahiji Grup H Piala AFC 2015


Tatandang panungtungan undakan penyisihan Grup H Piala AFC antara Pérsib Bandung ngalawan Ayeyawady United, taya anu bisa meunang. Hasil imbang jadi pamustunganana. Kalawan gulna tilu-tilu.

Pérsib Bandung anu hayang meunangkeun ieu tatandang, dina mimiti maénna lumayan kadéséh. Tapi teu lila, Pérsib bisa ngadalikeun ieu tatandang. Malahan Pérsib bisa ngagulkeun tiheula dina menit ka-29 ngaliwatan Supardi anu najong bal ka gawang Ayeyawady hasil operan ti M. Ridwan. Saméméh babak kahiji réngsé, Ayeyawady bisa nyaruakeun gul. Dina menit ka-43, pamaén hareupna, Naumov Riste bisa nyitak gul.

Babak kadua Pérsib bisa nyitak deui gul ngaliwatan M. Ridwan dina menit ka-52. Hanjakal teu lila, bisa dibales deui ngaliwatan pinalti. Manjing enggeusan, Pérsib bisa nyitak gul anu katiluna ngaliwatan pinalti anu ditajong ku Makan Konate. Tapi, bisa dibales deui ku Ayeyawady dina menit panungtungan. Ahirna mah hasil téh imbang, 3-3.

Tatandang Persib Bandung ngalawan Ayeyawady United
Tatandang Persib Bandung ngalawan Ayeyawady United

Sanajan imbang, Pérsib Bandung angger jadi jawara kahiji grup H. Anu tangtuna ogé kacida nguntungkeunana. Dina undakan saterusna, undakan 16 kleub bakal ngalakonan tatandangna di Bandung.

(Potret meunang nginjeum ti Bewara)