Euweuh Gul Nalika Pérsib Bandung Ditahan Lao Toyota FC


Poé kamari, Pérsib Bandung nyorog ka tempatna kleub Lao Toyota FC di nagri Laos. Pérsib anu ngalakonan tatandang kaopat dina raraga ngiluan Piala AFC, kudu ngalawan anu boga imah, Lao Toyota FC di National University of Laos Stadium.

Hanjakal dina ieu tatandang, Pérsib Bandung henteu bisa maénkeun pamaén hareup anyar, Ilija Spasojevic. Sababna mah tacan didaptarkeun. Antukna Pérsib ngan ukur bisa ngandelkeun Tantan jadi pamaén hareupna. Di tengah mah taya anu ngurangan. Atep, M. Ridwan katut Makan Konate bisa dipaénkeun. Kiper utama, I Made Wirawan ogé henteu bisa diajakan kusabab masih kénéh cidera. Atuh, kiper anu dipaénkeun téh Deden M. Natsir.

Hasilna, taya gul anu bisa dicitak salila ieu tatandang. Sanajan kasempetan pikeun ngagulkeun mah henteu kurang, taya hiji-hiji acan anu bisa dijadikeun gul. Atep ogé, anu dina tatandang saméméhna osok ngagulkeun, teu bisa ngagulkeun. Nepikeun ka pamustunganana, taya gul anu dicitak.

Persib Bandung ngalawan Lao Toyota FC
Persib Bandung ngalawan Lao Toyota FC

Tina hasil ieu, Pérsib Bandung pikeun sawatara waktu jadi jawara kahiji di Grup H Piala AFC kalawan ngumpulkeun niléy dalapan.

(Potret meunang nginjeum ti Sidomi)