Festival Cut Nyak Dien jeung Sumedang International Gamelan Festival di Sumedang


Pamaréntah Kabupatén Sumedang ngaliwatan Dinas Kebudayaan, Pariwisata, Pemuda dan Olah Raga (Disbudparpora) baris ngayakeun dua jinis pagelaran di tungtung bulan Oktober jeung munggaran bulan Nopémber ayeuna.

Sumedang
Sumedang

Pagelaran anu kahiji nyaéta Festival Cut Nyak Dhien. Festival ieu mangrupakeun program gawé bareng antara Pamaréntah Kabupatén Sumedang reujeung Pamaréntah Propinsi Nangroe Acéh Darussalam hususna Pamaréntah Kabupatén Acéh Besar. Festival anu dijejeran ku “Merenda Jejang Sang Pahlawan di Bumi Sumedang” ieu dilumangsungkeun pikeun ngéling-ngéling jeung ngahurmat kana yasana pahlawan nasional Cut Nyak Dhien anu salila hirupna bajoang ngalawan Walanda nepikeun ka disungsikeun ka Sumedang tug nepikeun ka tilar dunyana. Pagelaran ieu bakal dilumangsungkeun dina ping 30 nepikeun ka ping 31 Oktober 2014 kalawan tempatna di pakarangan Gedong Nagara Sumedang.

Acara Festival Cut Nyak Dhien baris dieusi ku rupa-rupa kagiatan diantarana pameran budaya jeung hélaran (pintonan) budaya Sumedang jeung Acéh. Ditambah ogé ku midangkeun pilem dokuménter Cut Nyak Dien. Teu poho ziarah ka makam Cut Nyak Dieun di Gunung Puyuh. Puncer acarana baris mintonkeun ibingan Jaipongan jeung ibing Saman.

Pagelaran anu kaduana, nyaéta Sumedang Internasional Gamelan Festival (SIGFEST). Pagelaran ieu dilumangsungkeun satutasna pagelaran kahiji réngsé, ping 1 nepikeun ka ping 2 Nopémber 2014 di tempat anu sarua. Pagelaran ieu mibanda tujuan pikeun ngawanohkeun budaya jeung kasenian anu aya di Sumedang ka masarakat dunya. Kasenian anu bakal dipintonkeun diantarana waé Gamelan Sari Onéng ti Museum Prabu Geusan Ulun, Seni Bangréng ti Kacamatan Cimalaka jeung Tanjungkerta, Tarawangsa (Kacamatan Rancakalong) Tari Umbul (Kacamatan Situraja, Ganéas jeung Paséh) ditambah Koromong (Kacamatan Rancakalong jeung Darmaraja).

Kusabab ambahanana internasional, ieu festival bakal diluuhan ku utusan ti sababaraha nagri, diantarana waé Jepang, Amérika Latin, Éropah jeung Timur Tengah.

Dua pagelaran ieu dilumangsungkeun ku pamaréntah Sumedang salaku bukti pangrojong ka seniman jeung budayawan dina ngawujudkeun program program SPBS (Sumedang Puseur Budaya Sunda). Salian ti éta, ogé pikeun mapag ‘Tahun Kunjungan Wisata Sumedang tahun 2015’. Dipiharep, Sumedang bisa jadi tujuan wisata budaya nasional jeung internasional.

(Sumber inpo : PR Online jeung Galamedia)

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s