Tatandang Kaopat Undakan Kadua: Kosta Rika Ngalawan Yunani


Kamampuhan tim méngbal Kosta Rika diladénan ku tim méngbal Yunani. Ti mimiti babak kahiji dibuka, dua tim silih serang, teu anéh lamun loba kasempetan pikeun ngagulkeun bal ka gawang lawanna séwang-séwangan. Ngan hanjakal lobana kasempetan ieu henteu jadi gul. Babak kahiji ditutup kalawan euweuh gul anu dijieun.

Tatandang tim Kosta Rika ngalawan tim Yunani
Tatandang tim Kosta Rika ngalawan tim Yunani

Nincak ka babak kaduana, dua tim angger bisa silih serang kalawan imbang. Dina lebah dieu, tim méngbal Kosta Rika leuwih ti heula bisa ngagulkeun bal ka gawang Yunani. Dina menit ka-52 pamaén Kosta Rika, Bolanos mapay sisi katuhu lapang tukang Yunani anu saterusna ngoperkeun bal ka Bryan Ruiz anu geus ngajanteng di lebah kotak pinalti. Teu antaparah deui, Ruiz najong bal operan ka jero sisi gawang Yunani anu henteu bisa dicegah ku kiperna. 1-0 pikeun Kosta Rika.

Ieu kasempetan disusul ku kasempetan séjénna. Ngan hanjakal henteu bisa dijadikeun gul.
Dina menit ka-66, kaayaan robah pisan sanggeus pamaén Kosta Rika, Oscar Duarte dibéré kartu konéng pikeun kadua kalina sanggeus nyilakakeun Holebas. Atuh pamaén Kosta Rika ngurangan jadi sapuluh urang. Kusabab kitu, Yunani bisa leuwih anteb deui dina nyerang ka gawang Kosta Rika. Sababaraha kasempetan dibeunangkeun ku pamaén Yunani pikeun ngagulkeun bal ka gawang Kosta Rika. Ngan hanjakal henteu jadi waé. Kakara dina menit-menit panungtungan, Yunani bisa males gul Kosta Rika. Bal hasil najong Fanis Gekas bisa ditepak ku kiper Kosta Rika, ngan hanjakal bal téh nyampeurkeun ka Sokratis Papastathopoulos anu langsung diasupkeun ka gawang jadi gul. Jadi waé gulna 1-1. Nepikeun ka béak waktuna henteu robah.

Tatandang diteruskeun kana babak tambahan. Hanjakal henteu aya deui gul anu bisa dijieun. Gul angger 1-1.

Tungtungna mah pikeun nangtukeun saha anu meunangna kudu diteruskeun kana babak adu pinalti. Tilu urang pamaén anu najong bal ti dua tim bisa ngalaksanakeun tugasna kalawan alus. Celso Borges, Bryan Ruiz, Giancarlo Gonzales ti tim Kosta Rika bisa dibales ku Kostas Mitroglou, Lazaros Christodoulopoulos, jeung Jose Holebas. Ngan hanjakal tajongan kaopatna ti Joel Campbell henteu bisa dibales ku Fanis Gekas anu tajonganana bisa  ditepak ku kiper Kosta Rika, Keylor Navas. Panajong Kosta Rika kalima Michael Umana bisa ngasupkeun bal kalawan mulus. Tatandang dipungkas ku gul 5-3 pikeun Kosta Rika.

 
 

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s