Opat Cabang Olahraga PON XIX 2016 Dipatandangkeun di Sumedang


Nurutkeun warta anu leuwih anyar, cenah jumlah cabang olahraga PON XIX Jawa Barat 2016 anu arék dilumangsungkeun di wewengkon Kabupatén Sumedang téh nambahan jadi opat siki. Anu mimitina tilu téh, nambahan hiji jadi opat. Opat cabang olahraga éta téh nyaéta paralayang, sépak takraw, pencak silat jeung golf. Sedengkeun hiji cabang olah raga saméméhna anu baris dilumangsungkeun di Sumedang nyaéta sapéda BMX, henteu jadi dilaksanakeun di Sumedang.

Batu Dua Desa Cimarga, tempat tatandang paralayang PON XIX Jawa Barat 2016
Batu Dua Desa Cimarga, tempat tatandang paralayang PON XIX Jawa Barat 2016

Nurutkeun inpo anu diancokeun ku Pikiran-Rakyat Online, patalina reujeung ieu kaayaan, pamaréntah propinsi Jawa Barat geus nyawiskeun waragad anu gedéna 15 milyar pikeun Sumedang. Waragad ieu dicawiskeun pikeun ngabéayaan sarana tatandang opat cabang olah raga anu kasebut.

Ngeunaan tempat anu baris dipaké patandang opat cabang olahraga éta nyaéta di Batu Dua Desa Cimarga pikeun cabang olahraga paralayang. Sakumaha geus papada apal, ieu tempat pernah dipaké tatandang kajawaraan paralayang Pra Piala Dunia Batu Dua Open 2013 kamari. Sésana, cabang olahraga sépak takraw baris dilaksanakeun di kampus ITB Jatinangor, pencak silat di Universitas Winaya Mukti Tanjungsari, sedengkeun golf di Bandung Giri Gahana (BGG) Jatinangor.

Pikeun ngaroris siap atawa acanna tempat, hususna tempat tatandang paralayang di Batu Dua, bakal aya pamariksaan patali reujeung tempat badaratna atlét paralayang, tempat ngajrekna atlét salila tatandang reujeung pasilitas séjénna.

Salaku urang Sumedang, kudu bagja katut ngarojong kana ieu kaayaan. Henteu reueus kumaha, ieu hartina Sumedang dipercaya pikeun ngalumangsungkeun tatandang PON anu undakanana nasional. Da henteu sakabéh wewengkon di Jawa Barat anu bisa kabagéan hancengan jadi tempat dilaksanakeunana tatandang cabang olahraga PON ieu.

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s