Ngayakeun Wisata Dirgantara di Batu Dua


Nyawang éndahna alam Sumedang ti mumunggang Batu Dua Gunung Lingga, kacida mecakna matak waas. Gugumplukanana pasir pacampur reujeung pilemburan katut pasawahan, nambah éndah. Lamun kongang mah sigana hayang ngajugjug ka éta patempatan, ngimeutan jeung nengetan unggal tempat anu manco. Tacan deui lamun bendungan Jatigedé geus ngajanggélék, ngemplangna cai bendungan bakal nambahan éndahna alam anu nampeu di hareupeun.

Nengetan endahna alam Sumedang ngaliwatan paralayang
Nengetan endahna alam Sumedang ngaliwatan paralayang

Teu anéh, cenah ceuk béja anu dipidangkeun ku inilahkoran.com, loba atlét paralayang luar nagri anu kamari ngiluan kana kajawaraan Paralayang Pra Piala Dunia Batu Dua Open loba anu kagémbang ku éndahna alam sabudeureun Batu Dua. Salian ti éta, ditambah ku kaayaan hawana anu ngarojong kana dilumangsungkeunana kajawaraan paralayang. Lamun ngapungkeun paralayang di Batu Dua, bisa ngajomantara ka tempat anu anggangna nepikeun ka 130 km. Teu anéh lamun taun hareup, cenah baris dilumangsungkeun kajawaraan paralayang deui di Batu Dua.

Lamun urang luar nagri waé ngaku kana éndahna alam Sumedang, piraku urang Sumedangna henteu ngaku. Salaku urang Sumedang sorangan kudu apal kana kaéndahan alam Sumedang supaya miboga rasa reueus kana lemah caina. Reueus salaku urang Sumedang. Mudah-mudahan waé ku raména ngeunaan Batu Dua reujeung paralayang kamari, urang Sumedang loba anu apal jeung ngajugjugan Batu Dua katut éndahna alam Sumedang. Antukna anu bisa ngarasakeun kaéndahan alam Sumedang téh lain ngan ukur batur wungkul, tapi urang Sumedangna ogé bisa ngilu ngarasakeun. Lamun urang luar nagri bisa mapayan unggal lelewek di sabudeureun Batu Dua ngaliwatan paralayang, piraku waé urang Sumedang henteu bisa.

Aya alusna lamun Batu Dua téh lain ngan ukur dipaké nalika aya kajawaraan paralayang wungkul. Tapi dijadikeun ogé tempat wisata dirgantara. Batu Dua bisa dipaké ku saha waé anu hayang ngimeutan alam Sumedang ngaliwatan awang-awang. Batu Dua dijadikeun tempat wisata anyar anu aya di Sumedang, anu ngandelkeun média paralayang. Anu ngadongdon Batu Dua bisa nyobaan ngapung maké paralayang. Carana mah bisa ku jalan muka tempat nyéwa paralayang atawa kumaha waé.

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s