Ngawanohkeun Wisata Sumedang Ngaliwatan Kajawaraan Paralayang


Lamun disaliksik mah wewengkon Sumedang téh nyidem mangrupa-rupa kamonésan anu bisa dimangpaatkeun pikeun jadi tempat pangjugjugan urang luar. Loba patempatan anu miboga niléy pikeun dijadikeun tempat wisata, hususna wisata alam. Alamna anu dieusi ku mangrupa pagunungan jeung pasir dibarung ku ngaplakna pasawahan nyadiakeun tempat anu kacida éndahna. Ngan hanjakal tacan bisa dikali jeung dikokolakeun kabéhanana. Perlu patékadan jeung ketak anu jelas pikeun ngokolakeunana. Lain ngan ukur kahayang anu euweuh prakna. Kahayang supaya Sumedang jadi tempat pangjugjugan urang luar téh lain ngan ukur semet kahayang wungkul, tapi aya buktina.

Salasahiji tempat anu keur meujeuhna husu dikokolakeun kalawan bener téh nyaéta Batu Dua di wewengkon Kacamatan Cisitu. Numutkeun panalungtikan mah éta tempat téh kacida alusna pikeun dijadikeun tempat ngapungkeun paralayang. Tempat anu kaasup ka lelewek Gunung Lingga ieu kacida alusna lamun dipaké tempat olah raga paralayang. Tempat anu lumayan luhur di mumunggang (kurang leuwih 950 méter saluhureun cai laut), ka handapna disambung ku palataran anu lega. Ditambah ogé di sababaraha tempat di sabudeureun Gunung Lingga kaluar panas ti jero taneuh anu bisa mangaruhan kana ngapungna paralayang, bisa leuwih lila ngapungna. Hal ieu kacida cocogna pikeun dipaké tatanding paralayang nomer lintas alam (cross country). Jadi salian ti di Kampung Toga, Sumedang miboga tempat séjén pikeun tatanding paralayang.

Kajawaraan Paralayang Batu Dua Open
Kajawaraan Paralayang Batu Dua Open

Nilik kana kaayaan ieu, teu anéh lamun ahirna Sumedang dipilih pikeun dijadikeun tempat kajawaraan paralayang sakuliah dunya. Kajawaraan anu dijejeran ‘Indonesian Pre World Cup 2013 Batu Dua Open’ ieu baris dilaksanakeun di Batu Dua kalawan diiluan ku atlét paralayang ti sababaraha nagara. Sabenerna mah saméméhna ogé, Batu Dua téh pernah dipaké pikeun tatanding paralayang Pra PON dina taun 2011.

Nurutkeun rarancang, kajawaraan paralayang ieu dilumangsungkeun dina ping 29 Séptémber nepikeun ka ping 4 Oktober 2013. Salian ti diiluan ku pamilon ti Indonésia, ogé diiluan ku sababaraha atlét ti sababaraha nagara séjén, saperti Cina, Koréa, Jepang, Taiwan, jeung sababaraha nagara ti wewengkon Éropa.

Pikeun Sumedang mah, ieu kajawaraan téh mangpaatna lain ngan ukur saharitaeun wungkul. Susuganan waé ka hareupna Sumedang leuwih dipikawanoh deui ku urang luar. Sanggeus nempo kumaha éndahna alam Sumedang, susuganan waé jadi deudeuyeun hayang ngajugjug Sumedang deui sanajan lain ngan ukur pikeun tatanding atawa lalajo tatanding paralayang. Salian ti kaéndahan alamna, loba hal séjén anu bisa dijual ngaliwatan ieu kajawaraan, kaasup oléh-oléh Sumedang.

(Gambar kagungan Jatarupa)

2 thoughts on “Ngawanohkeun Wisata Sumedang Ngaliwatan Kajawaraan Paralayang

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s