Peuting Lain Anu Kuring


Aya carita ka peutingnakeun
Nalika sonten ninggalkeun
Mangsa rumenghap ngécagkeun
Ngimpleng ka jaman meureun

Dina hiliwirna angin peuting
Dina comrékna anu jempling
Dina poék nu jadi pipinding
Bulan lain waktuna nyanding

Lain carita jadi paguneman
Lain ungkara nu jadi udagan
Lain pasieup anu maruragan
Lain kahayang nu ditedunan

Kainggis, karisi, karémpan
Ngampar dina titincakan
Marurag tur ngahalangan
Naha kumaha bisa ngaliwatan

Naha tangtungan bisa kebat
Naha jiwa kapuragan ilapat
Naha diri meunang tikudrat
Najan ukur ngan sajorélat

-

(Dicutat tina catetan pesbuk)

Pasanggiri Yamaha Writing Competition 2012


Pikeun anu resep nulis hususna nulis dina loka atawa blog, aya kasempetan alus pikeun meunangkeun hadiah mangrupa duit. Carana ku jalan ngiluan pasanggiri anu dilumangsungkeun ku Yamaha dina acara ‘Yamaha Writing Competition 2012’. Ieu pasanggiri tulisan ieu dumasar kana SEO (Search Engine Optimization). Tilu tulisan anu alus kalawan ngasupkeun kecap konci ‘Motor matic injeksi irit harga murah’ dina tulisanana bakal dilélér hadiah anu jumlah-jamléhna 18 juta. Ieu pasanggiri dimimitian tina ping 1 Méi 2012, tug ditutup dina ping 30 Juli 2012.

Yamaha Writing Competition 2012

Ari cara jeung sarat-saratna, diantarana waé:

  1. Anu ngiluan kudu nyieun tulisan anu mangrupakeun ringkesan dina Basa Indonesia tina tulisan (carita/warta/inpo) anu disadiakeun dina situs microsite. Eusi tulisan bisa ditambahan ku data lain anu ngadukung.
  2. Anu ngiluan kudu ngeusi pormulir paranti daptar kalawan maké data anu jelas jeung bener.
  3. Anu ngilua téh cicingna di Indonesia.
  4. Bisa ngadaptarkeun blog atawa loka leuwih ti hiji.
  5. Maké kecap konci “Motor matic injeksi irit harga murah”
  6. Sedengkeun ari kalimah judulna ngeunaan “Motor matic injeksi irit harga murah – Yamaha Mio J“.
  7. Kudu ngasupkeun panumbu ka loka http://www.yamaha-motor.co.id dina tulisan anu dipedalkeun.
  8. Kudu nerapkeun logo lomba YAMAHA WRITING COMPETITION.

Pikeun sarat-sarat séjénna katut inpo anu leuwih paripurna atawa jéntré, bisa langsung ngalongok ka loka http://www.yamaha-motor.co.id/yamaha-writing-competition/.

Kumpulan Dongéng Basa Sunda


Ieu blog dieusi ku sababaraha rupa dongéng anu osok didongéngkeun di masarakat atawa urang Sunda. Sanajan sawaréh dongéngna bisa disebutkeun ngan ukur aya di sawatara wewengkon (henteu sumebar ka saban wewengkon di tatar pasundan), tapi aya alusna ogé dijadikeun bahan bacaan ngeunaan dongéng baheula.

Waktu dilongok dina ping 7 Jumadil Ahir, tulisan pangahirna téh dongéng ngeunaan Cipeucang (dipedalkeun dina ping 3 Maret 2010). Ieu dongéng nyaritakeun ngeunaan hiji tempat anu aya di Désa Sukamukti Kacamatan Bojongmanggu Bekasi. Dongéng ieu nyaritakeun raratan asal-usul ngaran lembur Cipeucang. Kunaon sababna eéta lembur disebutna Cipeucang.

Ancoan blog Kumpula Dongeng Basa Sunda

Terus aya deui dongéng ngeunaan sasatoan anu judulna Kuya Ngagandong Imahna. Ieu dongéng mah nyaritakeun jujutan naon sababna kuya bet ngagandong imahna. Naon sababna sakadang kuya bet mamawa waé imahna. Salian ti éta, aya sababaraha deui dongéng anu dipedalkeun dina ieu blog. Pikeun anu panasaran, sumangga waé longok ka alamat blog http://dongengbasasunda.blogspot.com/.

Ngeunaan anu nyieun ieu blog, teu disebutkeun sasahana. Data anu diancokeun ngan ukur nyebutkeun daptar blog anu dijieunna katut jinis anu boga ieu blog, anu nyieunna téh cenah saurang wanoja. Teu disebutkeun sasahana reujeung panganjrekanana.

Ulah Nginum Cai Loba Teuing


Nginum cai geus jadi pangabutuh pikeun saha waé ogé. Arék budak atawa arék kolot, perlu nginum, utamana nginum cai hérang. Nginum cai (hérang) matak alus kana ka kaséhatan. Ngan lebah dina lobana nginum, cenah ulah loba teuing. Teu meunang nginum loba-loba teuing.

Salian ti ulah loba-loba teuing nginum, dina cara nginumna aya anu teu dimeunangkeun. Cenah teu meunang nginum bari kekedengan atawa ngadapang. Alesanana, sarua waé ngan hiji. Cenah, ceuk kolot mah bisi jantungna kakeueum. Loba teuing nginum, bisi awak pinuh teuing ku cai anu akibatna bisa ngeueum jajantung. Pon kitu deui lamun nginum bari ngadapang, bisi cai anu diinumna ngeueum jajantung. Anu ngaranna kakeueum jajantung, apanan teu bisa ngarénghap atawa susah napas (jadi eungap).

Budak keur nginum cai

Kusabab kitu, harita mah rada sieun lamun kudu nginum bari ngadapang téh. Da sieun jajantung kakeueum. Ma’lum waé da sieun teu bisa ngarénghap kusabab jajantung kakeueum. Teu bisa ngarénghap mah, apanan bisa paéh. Harita mah nganggapna bener waé lamun jajantung kakeueum téh bakal susah ngarénghap.

Ka béhdieunakeun, geningan lain kusabab bisi kakeueum jajantung. Tapi loba teuing nginum téh matak nyababkeun cai bisa nyerep kana tempat ngocorna getih dina awak. Kusabab getih kacampuran cai, jadina getih téh ngalobaan. Loba teuing getih, matak mawa capé kana jajantung dina ngompa getih supaya nyaliara kana sakujur awak. Kitu cenah….

(Gambar meunang nginjeum ti http://myoops.wordpress.com)

Mobil Butut


Inget mangsa keur nyaba anu jauh ti lembur singkur banjar karang pamidangan. Kabiasaan tara jauh ti lembur, ari pék kudu jauh. Karasa ngarumasna. Hayang balik waé lamun kongang mah. Sono ka lembur sorangan. Ngan kasono ka lembur téh rada kaubaran. Kabeneran anu sarua keur gawé téh kalolobaanana mah urang Sunda. Ditambah deui resep nyetél lagu Sunda samodél Mobil Butut. Jadi resep ogé kana lagu Mobil Butut. Nya tibatan euweuh bahan pikeun pangbeberah manah….

Pidio Lagu Mobil Butut

Mobil butut kaluaran baheula
Sajaman jeung bedil sundut harita
Ayeuna mah mobil butut geus jarang
Nambangan gé di kota gé geus dilarang
Dot do do lit brét
Klaksonna na tarompét
Karetna dipencét
Dot do lit dot do lit brét
Mobil butut majuna rarandegan
Knalpotna ngebul moékan jalan

Dut durut dut dut
Mobil maju na ngidul
mogok di jalan radiatorna ngebul
Kendékna turun nyiuk cai di solokan
Mobilna nginum jiga kebo dipandian
Mobil butut rék majuna didorong
Panumpangna turun titah milu ngadorong
Kendékna kuru persis jiga rorongkong
Mobil ngarongrong setoran gé loba kosong

(Gambar meunang nangkep ti youtube.com)

Teu Meunang Ngadahar Cau Padempét


Salian ti teu meunang ngadahar cau pangsisina, aya ogé pantangan pikeun barudak, teu meunang ngadahar cau anu padempét. Aya kalana dina turuyan atawa sikatan cau téh osok manggihan cau anu padempét. Cau dua siki anu sakuduna misah atawa masing-masing, bet padempét ngahiji. Manggihana mah jarang. Ngan dina sakali manggihan, osok matak panasaran hayang ngadahar cau anu padempét. Saha anu teu hayang, dua siki cau didahar ku saurang. Matak seubeuh, sigana mah.

Cau padempet

Kolot osok ngawawadianan, sangkan budak mah henteu ngadahar cau anu padempét. Budak mah pamali lamun ngadahar cau padempét téh. Cenah, lamun budak ngadahar cau padempét bakal meunang budak atawa turunan anu padempét. Saha atuh anu hayang meunang kaayaan anu sarupa kitu. Anu sieunan mah, moal daékeun ngadahar cau anu padempét.

Kumaha atuh lamun budakna tetep ngarenghik hayang ngadahar cau anu padempét? Pokna kolot mah, bisa waé atawa meunang ngadahar cau padempét, tapi teu meunang duanana. Kudu salasahijina. Cau padempét téh dibagi dua (dipisahkeun). Anu hiji bisa didahar ku budak anu hiji, ari anu anu hiji deui bisa didahar ku nu lian.

Kitu cenah….

(Gambar meunang nginjeum ti http://amoebasterix.multiply.com/)

Tambal Ban Tubeless, Lain Nambal ku Jalan Ditubles


Mimitina mah sugan téh anu ngaranna tambal ban tubeless téh tambal ban kujalan ditubles. Ban mobil atawa ban motor jeung ban sapédah anu kacugak ku paku atawa bitu, ditambalna téh ditubles. Ari pék téh lain kitu maksudna. Paingan waktu arék nambal ban sapédah anu bitu, ditolak ku tukang nambal banna, pokna téh ieu mah tambal ban tubles. Bari jeung teu apal naon maksudna bet teu bisaeun nambal ban sapédah, kapaksa néangan tukang nambal ban nu lianna.

Ka béh dieunakeun, kakara apal naon anu ngaranna ban tubles (tubeless maksudna mah). Ban tubeless mah béda reujeung ban biasa. Lamun ban biasa mah miboga ban jero, ari ban tubeless mah henteu miboga ban jeroan. Ban tubeless mah ngan ukur miboga ban luar wungkul. Jadi dina nambalna ogé béda reujeung ban biasa.

Tambal ban tubeless

Dina waktuna kacugak ku paku, ban biasa mah langsung kempés. Ari ban tubeless mah henteu langsung kempés (kusabab ban tubeless mah dijieun tina bahan anu béda reujeung ban biasa). Dina nambalna, ban biasa mah ditambalna maké karét anu dirapetkeun atawa dilém pikeun nutupan anu bolongna dina ban jero, ari ban tubeless mah nambalna téh ku jalan dipaseuk ban luar anu bolongna maké bahan husus paranti nambal ban tubeless.

(Gambar meunang nginjeum ti http://mandacutie.wordpress.com/)