Bekel Lamun Anclub Nyieun Program Aplikasi dina Wéb


Saméméh asup atawa anclub kana widang aplikasi atawa program aplikasi wéb, kudu apal heula naon waé bekel anu kudu dipiboga. Sahanteuna apal heula kudu bisa kana naon waé supaya dina prak-prakanana nyieun aplikasi wéb téh henteu bingung teuing.
Aya sababaraha hal anu kudu jadi bekel supaya bisa anclub kana nyieun aplikasi wéb, diantarana waé html, css, javascript, CGI, PHP jeung ASP. Diantara anu aya teu kudu kabéhanana dileukeunan supaya bisa. Bisa waé ngan ukur sawaréhna, gumantung kana pangaresep jeung pangabutuh.

Supaya gampangna mah, sakumaha wangunanana, aplikasi wéb kabagi dua nyaéta aplikasi anu jalan di penyungsi wéb (client) reujeung aplikasi anu jalan dina pangladén wéb. Jadi dina nyieun aplikasi wéb kudu apal jeung ngawasaan bekel eukeur nyieun aplikasi anu jalan di panyungsi wéb reujeung anu jalan di pangladén wéb. Bagéan aplikasi anu jalan di panyungi wéb nyaéta html, css jeung javascript. Sedengkeun aplikasi anu jalan di pangladén wéb nyaéta CGI, PHP jeung ASP.

Anu panghandapna atawa dadasar pikeun nyieun aplikasi wéb mah nyaéta html. Unggal payil anu  arék diancokeun ka anu keur nyungsi wéb diwangun ku mangrupa dokumén html. Jadi kudu apal wangunan dokumen html heula dina nyieun aplikasi wéb. Dokumén html diwangun ku pananda atawa tag-tag html. Unggal pananda miboga mangpaat masing-masing, pikeun ngawangun ancoan atawa pidangan anu bakal diancokeun dina panyungsi wéb.

Ancoan aplikasi web

Sanggeus apal jeung ngawasaan html, kakara nincak kana bagéan css. CSS mah biasana dipaké pikeun ngaalusan aancoan dokumén html. Supaya dokumén html anu diancokeun téh matak pikaresepeun, dialusan maké css. Terus javascript mangrupakeun panambah anu bisa dipaké pikeun nambahan kamonésan kana dokumén html supaya bisa nangkep kaayaan atawa kajadian, saperti kumaha lamun anu keur nyungsi wéb téh neken hiji kenop atawa ngagerakeun panuduh mouse.

Ngeunaan basa CGI, PHP jeung ASP, biasana mah pilihan. Arék dikawasaan kabéhanana atawa milih salasahijina. Hal gumantung kana jinis pangladén wébna, naha maké basa PHP, CGI atawa ASP. Lamun nyieun aplikasi wéb anu pangladén wébna maké basa PHP, kudu apal kana basa PHP jeung kudu maké PHP dina nyieun aplikasina. Pon kitu deui reujeung CGI atawa ASP. Kaayeunakeun mah, CGI jarang dipaké. Anu osok dipaké téh nyaéta PHP jeung ASP.

Anu Anyar dina WordPress téh Geningan Instant Post Feedback


Ancoan anyar nalika ngasupkeun/medalkeun tulisan di WordPress téh mangrupakeun kamonésan anyar anu disebutna Instant Post Feedback. Nurutkeun tulisan anu bisa dibaca di dieu, Instant Post Feedback mangrupakeun hasil panalungtikan anu dilakukeun ku tim WordPress ngeunaan kumaha, iraha jeung kunanon jalma-jalma medalkeun tulisanana, jeung naon anu biasana dipigawé sanggeusna medalkeun tulisan. Cenah, kalolobaanana mah sanggeus medalkeun tulisan téh, anu medalkeun tulisan langsung nempo kumaha ancoan tulisan katempona, mariksa jinisna reujeung ngabagi tulisan ngaliwatan jaringan sosial.

Ancoan Instant Post Feedback

Ahirna mah, jadi waé sanggeus medalkeun tulisan téh bakal langsung asup kana Instant Post Feedback, anu ngancokeun progress bar, sharing jeung tagging.

Progress bar nuduhkeun parobahan jumlah tulisan muru kana hiji tujuan atawa targét. Targét disetél unggal tikel lipet 5.

Sharing nuduhkeun sabaraha urang jalma anu dibere nyaho ngeunaan medalna ieu tulisan ngaliwatan jaringan sosial saperti pesbuk jeung twitter.

Tagging, nuduhkeun tag-tag anu dipaké dina tulisan kalawan ditambahan tag anu disarankeun pikeun ieu tulisan. Pikeun ngasupkeun tag anu disarankeun, kari teken waé tagna.

Pikeun ngahirupkeun jeung maéhan Instant Post Feedback bisa ngaliwatan Dashboard dina pidangan User, Personal Settings.

Calingcing


Buahna warna héjo wangunana lonyod sarta miboga panjangna kira-kira dua buku curuk nepikeun ka saramo. Di jero buahna loba caian. Sedengkeun rasa ieu buah téh lumayan haseum. Buahna ngagarantung dina tangkal reujeung dahan tangkalna. Buahna osok didalaharan ku barudak, sanajan sakadar ngan ukur ngasaan haseumna wungkul.

Buah calingcing dina tangkalna

Cenah, buah calingcing miboga hasiat pikeun obat batuk. Salian ti éta, calingcing ogé ngandung Vitamin C.

Tangkal calingcing mangrupakeun tatangkalan anu masih kénéh saturunan reujeung balingbing. Tangkalna leutik. Jangkungna kira-kira 5 méter nepikeun ka 15 méter. Daunna dina sagagang téh lumayan loba reujeung papasangan, kénca katuhu. Ari kembangna laleutik kaluar tina tangkal atawa dahan tangkal calingcing.